រាជធានីភ្នំពេញ៖ ក្រសួងធម្មការ និងសាសនា និងក្រសួងវប្បធម៌ និងវិចិត្រសិល្បៈ បានប្រកាសថ្កោលទោសភាគីថៃ ដែលបានវាយកម្ទេចរូបសំណាកព្រះវិស្ណុ ក្នុងទឹកដីកម្ពុជា និងស្នើឱ្យពិភពលោករួមគ្នាថ្កោលទោស ទង្វើទមិឡឥតសាសនានេះឱ្យបានខ្លាំងក្លាបំផុត...។

រូបសំណាកព្រះវិស្ណុ ដែលត្រូវបានគេដឹងថា ជាព្រះអាទិទេពដ៏សំខាន់ក្នុងសាសនាព្រាហ្មណ៍ តាមបែបហិណ្ឌូនិយម សម្រាប់ការគោរពបូជា ស្ថិតក្នុងតំបន់អានសេះ ខេត្តព្រះវិហារ ក្នុងដែនអធិបតេយ្យភាពប្រទេសកម្ពុជា ត្រូវបានយោធាថៃសាហាវយង់ឃ្នង វាយកម្ទេចចោលកាលពីពេលថ្មីៗ អមជាមួយសំឡេងសើចក្អាកក្អាយ។ ក្រសួងធម្មការ ចាត់ទុកសកម្មភាពនេះ ធ្វើឱ្យប៉ះពាល់យ៉ាងខ្លាំងដល់អារម្មណ៍របស់អ្នកគោរពសាសនានៅជុំវិញពិភពលោក ហើយក៏ជាផ្នែកមួយនៃបេតិកភណ្ឌ អារ្យធម៌រួមគ្នារបស់មនុស្សជាតិ។ ក្រសួងបានស្នើដល់សាសនិកទូទាំងពិភពលោក និងសហគមន៍អន្តរជាតិ ថ្កោលទោសសកម្មភាពទមិឡឥតសាសនារបស់កងទ័ពឈ្លានពានថៃមកលើកម្ពុជា ជាពិសេសការបំផ្លាញរូបសំណាកព្រះវិស្ណុ ដែលត្រូវបានប្រជាជនទូទៅក្នុងពិភពលោកគោរពបូជាយ៉ាងខ្ពង់ខ្ពស់។

ដូចគ្នាដែរ ក្រសួងវប្បធម៌ និងវិចិត្រសិល្បៈ បានចាត់ទុកការបំផ្លាញរូបសំណាកព្រះវិស្ណុ រូបសំណាក តា អ៊ុំ នៅតំបន់អានសេះ ខេត្តព្រះវិហារ ជាទង្វើគ្មានសីលធម៌ គ្មានសាសនា ហើយវាបានបញ្ជាក់ច្បាស់ថា ភាគីថៃយកវប្បធម៌ និងជំនឿសាសនា ធ្វើជាសត្រូវរបស់ខ្លួន។ មិនមែនតែរូបសំណាកព្រះវិស្ណុ រូបសំណាកតាអ៊ុំ តែយោធាថៃឈ្លានពាន បានប្រើប្រាស់យន្តហោះ F-16 និង T-50TH ទម្លាក់គ្រាប់បែកគ្រប់ទីកន្លែង បំផ្លាញលំនៅឋានប្រជាជន វត្តអារាម ហេដ្ឋារចនាសម្ព័ន្ធស៊ីវិល និងតំបន់បេតិកភណ្ឌ (ប្រាសាទព្រះវិហារទទួលរងការខូចខាតធ្ងន់ធ្ងរ រីឯប្រាសាទតាក្របីត្រូវបានបំផ្លាញទាំងស្រុង) ដែលនេះជាទង្វើដ៏ព្រៃផ្សៃ និងរំលោភបំពានដល់សិទ្ធិមនុស្ស ច្បាប់អន្តរជាតិ។ «យើងសូមអំពាវនាវដល់បណ្តាសហគមន៍អន្តរជាតិ ចូលរួមថ្កោលទោសចំពោះសកម្មភាពឈ្លានពានដោយកំរោលរបស់យោធាថៃ មកលើបូរណភាពទឹកដីអធិបតេយ្យភាពកម្ពុជា និងជំរុញឱ្យភាគីថៃបញ្ឈប់សកម្មភាពឈ្លានពាន បំផ្លិចបំផ្លាញបេតិកភណ្ឌកម្ពុជា»។

សូមជម្រាបថា ក្រសួងការបរទេសឥណ្ឌា កាលពីថ្ងៃទី២៤ធ្នូ ឆ្នាំ២០២៥ បានប្រតិកម្ម និងថ្កោលទោសយ៉ាងខ្លាំង ចំពោះសកម្មភាពយោធាថៃបំផ្លាញរូបសំណាកព្រះវិស្ណុ ស្ថិតក្នុងទឹកដីកម្ពុជា។ រដ្ឋធានីញូវដេលី ចាត់ទុកសកម្មភាពរបស់ភាគីថៃ ជាទង្វើខ្វះការគោរព និងប៉ះពាល់យ៉ាងធ្ងន់ធ្ងរដល់មនោសញ្ចេតនារបស់អ្នកកាន់សាសនា នៅជុំវិញពិភពលោក ហើយការបំផ្លិចបំផ្លាញនិមិត្តរូបសាសនាបែបនេះ មិនគួរកើតមានទេ៕