សុខភាព៖ ផ្លែឈើមានច្រើនប្រភេទ ខ្លះមានជាតិផ្អែម ខ្លះមានជាតិជូរ ចំពោះអត្ថប្រយោជន៍វិញល្អសម្រាប់រាងកាយទាំងអស់ ក្នុងនោះបើចង់ឱ្យបេះដូងមានសុខភាពល្អ គួរពិសាផ្លែឈើទាំង៨ដែលមានដូចខាងក្រាម…។
១.ផ្លែប៉ោម៖ ប៉ោម គឺជាផ្លែឈើដែលមានសារធាតុប្រឆាំងអុកស៊ីតកម្ម វីតាមីន សម្បូរជាតិសរសៃ និងសារធាតុចិញ្ចឹមផ្សេងៗជាច្រើន និងមានអត្ថប្រយោជន៍ចំពោះសុខភាពបេះដូង។ ២.ផ្លែប័រ៖ ពពួកប័រ គឺជាផ្លែឈើដែលល្អសម្រាប់សុខភាព និងមានរសជាតិឆ្ងាញ់ ហើយក៏សម្បូរទៅដោយសារធាតុខ្លាញ់មិនឆ្អែតអាចកាត់បន្ថយកូលេស្តេរ៉ូល ដែលកូលេស្តេរ៉ូលនេះអាចបណ្ដាលឱ្យមានជំងឺបេះដូង។ ៣.ផ្លែប្លូបឺរី (blueberry)៖ ប្ល៊ូបើរី អាចយកមកច្នៃជាភេសជ្ជៈមានរសជាតិឆ្ងាញ់ ដែលសម្បូរទៅដោយសារធាតុប្រឆាំងអុកស៊ីតកម្ម អាចបន្ថយសម្ពាធឈាម និងការរីកសរសៃឈាម។ បើសិនជាទទួលទានផ្លែ ប្ល៊ូបើរី ក្នុងបរិមាណប្រហែលមួយកែវ អាចជួយកាត់បន្ថយហានិភ័យជំងឺសរសៃឈាមបេះដូង។
៤.ផ្លែក្រូច៖ ក្រូច មិនត្រឹមតែអាចជួយប្រឆាំងជាមួយជំងឺផ្ដាសាយ លើសពីនេះ ក្រូចក៏ជួយដល់សុខភាពបេះដូងដោយសារតែសម្បូរទៅដោយជាតិសរសៃ ប៉ូតាស្យូម choline វីតាមីន A B6 និង C។ ដោយក្នុងនោះ ប៉ូតាស្យូម គឺជួយកាត់បន្ថយហានិភ័យនៃជំងឺសរសៃឈាមបេះដូង។ ៥.ផ្លែក្រូចថ្លុង៖ ក្រូចថ្លុង មានផ្ទុកសារជាតិ flavonoids ខ្ពស់ដែលអាចជួយកាត់បន្ថយហានិភ័យនៃជំងឺគ្រោះថ្នាក់សរសៃឈាមខួរក្បាល។ ក្រូចថ្លុង ក៏មានបរិមាណវីតាមីន C ខ្ពស់អាចបន្ថយហានិភ័យនៃជំងឺបេះដូង។ ៦.ផ្លែក្រូចឆ្មា៖ ក្រូចឆ្មារ ជាផ្លែឈើដែលមានរសជាតិជូរ ប៉ុន្តែវាមានអត្ថប្រយោជន៍មិនចាញ់ផ្លែក្រូចផ្សេងៗ ដោយសារតែសម្បូរទៅដោយវីតាមីន C និងអាចជួយកាត់បន្ថយសម្ពាធឈាម ធ្វើឱ្យបេះដូងមានសុខភាពល្អ។
៧.ផ្លែគីវី៖ គីវី ជាផ្លែឈើដែលសម្បូរទៅដោយវីតាមីន C និង E ហើយក៏ជាប្រភពរបបអាហារមានជាតិសរសៃ។ ជាទូទៅអាហារដែលមានជាតិសរសៃខ្ពស់ អាចធ្វើឱ្យឆ្អែតបានយូរ និងជួយដល់ការគ្រប់គ្រងសម្ពាធឈាម កូឡេស្តេរ៉ូល និងជាតិស្ករក្នុងឈាម។ ៨.ផ្លែទទឹម៖ ទទឹម ជាប្រភេទផ្លែឈើដែលមានរសជាតិផ្អែម និងពោរពេញទៅដោយសារធាតុ polyphenols ជួយដល់សរសៃឈាម និងបេះដូងឱ្យមានសុខភាពល្អ។ ជាមួយគ្នា បើទទួលទានទឹកផ្លែទទឹម ជាប្រចាំនឹងជួយកាត់បន្ថយកម្រិតសម្ពាធឈាម៕អត្ថបទដកស្រង់ពី៖ Hello គ្រូពេទ្យ
