រាជធានីបាងកក៖ នាយករដ្ឋមន្ត្រីចាំផ្ទះរបស់ថៃ លោក អនុទីន ឆានវីរគុល បានអះអាងកាលពីថ្ងៃទី២២ធ្នូថា បេសកជនចិន លោក តេង ស៊ីជុន (Deng Xijun) មិនបានដាក់សម្ពាធប្រទេសថៃលើបទឈប់បាញ់នៅប្រទេសកម្ពុជាទេ ខណៈលោកនៅតែទទូចថា រាជរដ្ឋាភិបាលរាជធានីភ្នំពេញ ត្រូវតែបំពេញលក្ខខណ្ឌ៣យ៉ាងដែលខ្លួនបានដាក់ចេញជាចាំបាច់...។

លោក អនុទីន ឆានវីរគុល បាននិយាយកាលពីថ្ងៃទី២២ធ្នូថា៖«បេសកជនពិសេសរបស់ចិនទទួលបន្ទុកកិច្ចការអាស៊ី មិនបានដាក់សម្ពាធលើប្រទេសថៃឱ្យយល់ព្រមលើបទឈប់បាញ់ជាមួយប្រទេសកម្ពុជាទេ។ លោក តេង ស៊ីជុន តំណាងពិសេសទទួលបន្ទុកកិច្ចការអាស៊ីនៅក្រសួងការបរទេសចិន គ្រាន់តែបង្ហាញពីក្តីសង្ឃឹមរបស់ចិនចំពោះសន្តិភាពនៅក្នុងតំបន់ ដោយសង្កត់ធ្ងន់ថា រដ្ឋធានីប៉េកាំង កំពុងប្រកាន់ជំហរមិនលម្អៀង។»

លោក អនុទីន បាននិយាយទៅកាន់អ្នកយកព័ត៌មានបន្ទាប់ពីជួបលោកតេង និងលោក ចាង ជានវៃ ឯកអគ្គរដ្ឋទូតចិនប្រចាំប្រទេសថៃ នៅវិមានរាជរដ្ឋាភិបាល។ ដំណើររបស់លោកតេង បន្ទាប់ពីមកទស្សនកិច្ចនៅកម្ពុជា ចំពេលមានភាពតានតឹងតាមព្រំដែន លោក តេង បានមកដល់ប្រទេសកម្ពុជា មុនពេលធ្វើដំណើរទៅកាន់ប្រទេសថៃ ចំពេលមានរបាយការណ៍ថា លោកកំពុងលើកទឹកចិត្តប្រទេសជិតខាងទាំងពីរឱ្យកាត់បន្ថយការប្រយុទ្ធគ្នាតាមបណ្តោយព្រំដែន។

លោក អនុទីន និយាយថា៖«លោកតេង មិនបានស្នើសុំឱ្យប្រទេសថៃទទួលយកបទឈប់បាញ់នោះទេ។ លោកគ្រាន់តែបង្ហាញពីបំណងប្រាថ្នារបស់ប្រទេសចិន ក្នុងការមើលឃើញសន្តិភាព។ ថៃបញ្ជាក់ថា សន្តិភាពអាស្រ័យលើការបំពេញតាមលក្ខខណ្ឌបទឈប់បាញ់របស់កម្ពុជា។» នាយករដ្ឋមន្ត្រីចាំផ្ទះរូបនេះ បាននិយាយថា សន្តិភាពនឹងអាចធ្វើទៅបានលុះត្រាតែកម្ពុជាគោរពតាមលក្ខខណ្ឌរបស់ប្រទេសថៃ សម្រាប់ការឈប់បាញ់។ ក្រសួងការបរទេស និងយោធាថៃ បានលើកឡើងម្ដងហើយម្ដងទៀតនូវលក្ខខណ្ឌសំខាន់ៗចំនួនបី៖ កម្ពុជាត្រូវតែប្រកាសបទឈប់បាញ់ពិតប្រាកដជាមុនសិន ព្រោះប្រទេសថៃអះអាងថា កម្ពុជាជាអ្នកឈ្លានពាន, បទឈប់បាញ់ត្រូវតែប្រកាន់យ៉ាងខ្ជាប់ខ្ជួន ដោយគ្មានការវាយប្រហារបន្ថែមទៀត និងកម្ពុជាត្រូវតែបង្ហាញពីភាពស្មោះត្រង់ ក្នុងកិច្ចសហប្រតិបត្តិការលើការបោសសម្អាតមីន។

លោក អនុទីន បដិសេធមិនបង្ហាញព័ត៌មានលម្អិតអំពីជំនួបជាមួយបេសកជនចិន ដោយជំរុញឱ្យមានការគាំទ្រដល់កងទ័ព និងអ្នកជម្លៀសចេញ។ លោក អនុទីន បាននិយាយថា លោកនឹងមិនបង្ហាញព័ត៌មានលម្អិតនៃការពិភាក្សានេះទេ ដោយលើកឡើងពីពិធីសារការទូត ប៉ុន្តែបានបន្ថែមថា បេសកជនពិសេសរូបនេះបានដឹងពីជំហរ និងការទាមទាររបស់ប្រទេសថៃ។ កិច្ចប្រជុំពិសេសរដ្ឋមន្ត្រីការបរទេសអាស៊ានបានពិភាក្សាអំពីការប៉ះទង្គិចគ្នា ប៉ុន្តែប្រទេសថៃទទូចលើដំណោះស្រាយទ្វេភាគី។ លោក អនុទីន បាននិយាយថា បញ្ហានេះត្រូវបានពិភាក្សានៅក្នុងកិច្ចប្រជុំរដ្ឋមន្ត្រីការបរទេសអាស៊ាននៅរាជធានីគូឡាឡាំពួរ កាលពីថ្ងៃចន្ទទី២២ធ្នូ ប៉ុន្តែប្រទេសថៃបានអះអាងថា ដំណោះស្រាយណាមួយត្រូវតែសម្រេចបានលើមូលដ្ឋានទ្វេភាគី។ លោកនឹងរង់ចាំរដ្ឋមន្ត្រីការបរទេស សីហស័ក្តិ ភួងកេតកែវ ត្រឡប់មកពីកិច្ចប្រជុំវិញ ហើយជម្រាបជូនលោកអំពីការពិភាក្សា៕