រាជធានីគូឡាឡាំពួ៖ រដ្ឋមន្ត្រីការបរទេស និងមន្ត្រីមកពីអាស៊ាន គ្រោងនឹងជួបប្រជុំគ្នានៅរាជធានីនៃប្រទេសម៉ាឡេស៊ី នៅរសៀលថ្ងៃចន្ទទី២២ធ្នូនេះ សម្រាប់កិច្ចប្រជុំពិសេសមួយ ដើម្បីដោះស្រាយស្ថានការណ៍ដែលកំពុងបន្តរវាងកម្ពុជា និងថៃ។

កិច្ចប្រជុំពិសេសរដ្ឋមន្ត្រីការបរទេសអាស៊ាន (AMM) ដែលដឹកនាំដោយរដ្ឋមន្ត្រីការបរទេសម៉ាឡេស៊ី លោក ម៉ូហាម៉ាដ ហាសាន់ (Mohamad Hasan) ត្រូវបានគេរំពឹងថា នឹងមានការចូលរួមពីមន្ត្រីសរុបចំនួន២៣រូប រួមទាំងអគ្គលេខាធិការអាស៊ាន លោក កៅ គឹមហួន។ ក្រសួងការបរទេសកម្ពុជា បានបញ្ជាក់កាលពីថ្ងៃអាទិត្យទី២១ធ្នូនៅក្នុងសេចក្ដីថ្លែងការណ៍មួយ ដែលបានបង្ហោះនៅលើបណ្តាញសង្គមហ្វេសប៊ុកថា លោក ប្រាក់ សុខុន ឧបនាយករដ្ឋមន្ត្រី និងរដ្ឋមន្ត្រីការបរទេស នឹងចូលរួមកិច្ចប្រជុំនេះ។ កាលពីសប្តាហ៍មុន អគ្គនាយកនៃនាយកដ្ឋានព័ត៌មាននៅក្រសួងការបរទេសថៃ លោក នីករតេជ្ជ ផ្លាងកូ ក៏បានបញ្ជាក់ផងដែរថា រដ្ឋមន្ត្រីការបរទេសថៃ លោក សីហស័ក្តិ ភួងកេតកែវ នឹងចូលរួមកិច្ចប្រជុំនេះ។ រដ្ឋមន្ត្រីការបរទេសផ្សេងទៀត ដែលត្រូវបានគេរំពឹងថា នឹងចូលរួមគឺលោក ស៊ូហ្គីអូណូ (Sugiono) នៃប្រទេសឥណ្ឌូណេស៊ី, លោក ថងសុវណ្ណ ភូមិវិហាន (Thongsavanh Phomvihane) នៃប្រទេសឡាវ, លោក វីវៀន បាឡាគ្រីសណាន (Vivian Balakrishnan) នៃប្រទេសសិង្ហបុរី, លោក ប៊ែនឌីតូ ដូស សាន់តូស ហ្វ្រៃតាស (Bendito dos Santos Freitas) នៃប្រទេសទីម័រខាងកើត និងលោក ថេរេសា ឡាហ្សារ៉ូ (Theresa P. Lazaro) រដ្ឋមន្ត្រីការបរទេសហ្វីលីពីន។

ប្រទេសព្រុយណេត្រូវបានគេរំពឹងថានឹងមានតំណាងដោយរដ្ឋមន្ត្រីការបរទេសលំដាប់ទី២ លោក ដាតុក អេរីវ៉ាន់ ពេហ៊ីន យូសូហ្វ (Datuk Erywan Pehin Yusof) ខណៈដែលប្រទេសវៀតណាមត្រូវបានគេរំពឹងថា នឹងបញ្ជូនអនុរដ្ឋមន្ត្រីការបរទេសរបស់ខ្លួនគឺលោក ដាំង ហួង យ៉ាង (Dang Hoang Giang)។ មន្ត្រីមីយ៉ាន់ម៉ាត្រូវបានគេរំពឹងថា នឹងចូលរួមកិច្ចប្រជុំតាមអ៊ីនធឺណិត។ ក្រសួងការបរទេសម៉ាឡេស៊ី បានប្រកាសនៅក្នុងសេចក្ដីថ្លែងការណ៍មួយកាលពីថ្ងៃអាទិត្យទី២១ធ្នូថា កិច្ចប្រជុំពិសេសនេះ នឹងត្រូវកោះប្រជុំស្របតាមការសម្រេចចិត្តរបស់នាយករដ្ឋមន្ត្រីម៉ាឡេស៊ី កម្ពុជា និងថៃ នៅថ្ងៃទី១១ ខែធ្នូ។ ក្រសួងបានបញ្ជាក់ថា កិច្ចប្រជុំនេះនឹងផ្តល់វេទិកាសម្រាប់រដ្ឋមន្ត្រីការបរទេសអាស៊ានដើម្បីផ្លាស់ប្ដូរទស្សនៈលើស្ថានភាពបច្ចុប្បន្ន និងពិចារណាលើជំហានដែលអាចធ្វើទៅបានដែលអាស៊ានអាចអនុវត្តដើម្បីគាំទ្រដល់កិច្ចខិតខំប្រឹងប្រែងដែលកំពុងបន្តឆ្ពោះទៅរកការបន្ធូរបន្ថយភាពតានតឹង និងការបញ្ឈប់អរិភាពក្នុងផលប្រយោជន៍នៃសន្តិភាព និងស្ថិរភាពរវាងរដ្ឋសមាជិកអាស៊ានទាំងពីរ និងតំបន់ទូលំទូលាយ។

រដ្ឋមន្ត្រី​នៃ​សមាគម​ប្រជាជាតិ​អាស៊ីអាគ្នេយ៍​នឹង​ស្វែងរក​ការ​ស្តារឡើង​វិញ​នូវ​បទ​ឈប់​បាញ់​រយៈពេល​ខ្លី​ដែល​សម្របសម្រួល​ដោយ​ប្រទេស​ម៉ាឡេស៊ី ប្រធាន​អាស៊ាន​ឆ្នាំ​នេះ និង​ប្រធានាធិបតី​សហរដ្ឋ​អាម៉េរិក ដូណាល់ ត្រាំ។ បន្ថែមពីនោះ ក្រសួងការបរទេសម៉ាឡេស៊ី បានកត់សម្គាល់ថា ការកោះប្រជុំពិសេសនេះ ឆ្លុះបញ្ចាំងពីការប្តេជ្ញាចិត្តរបស់រដ្ឋសមាជិកអាស៊ានចំពោះការឯកភាព និងសាមគ្គីភាព ក៏ដូចជាភាពជាស្នូលរបស់អាស៊ានក្នុងការរក្សាសន្តិភាព សន្តិសុខ ស្ថិរភាព និងវិបុលភាពនៅក្នុងតំបន់នេះ ស្របតាមធម្មនុញ្ញអាស៊ាន និងសន្ធិសញ្ញាមិត្តភាព និងសហប្រតិបត្តិការនៅអាស៊ីអាគ្នេយ៍ (TAC)។

លោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី បានសម្ដែងក្ដីសង្ឃឹមថា កិច្ចប្រជុំនេះ នឹងអាចឱ្យប្រទេសថៃ និងកម្ពុជា ចរចាដោយបើកចំហ ដោះស្រាយភាពខុសគ្នា និងសម្រេចបានដំណោះស្រាយដ៏យុត្តិធម៌ និងយូរអង្វែង។ លោក អាន់វ៉ា បានរៀបរាប់នៅលើបណ្តាញសង្គម X កាលពីថ្ងៃអាទិត្យទី២១ធ្នូថា៖«ខ្ញុំបានសង្កត់ធ្ងន់លើសារសំខាន់សម្រាប់ប្រទេសកម្ពុជា និងថៃ ក្នុងការរក្សាស្មារតីនៃការសន្ទនា ប្រាជ្ញា និងការគោរពគ្នាទៅវិញទៅមក ដើម្បីបញ្ចប់ភាពតានតឹង និងរក្សាសន្តិភាព និងស្ថិរភាពនៅក្នុងតំបន់នេះ។» លោកបានជជែកជាមួយនាយករដ្ឋមន្ត្រីទាំងពីរ។​ ក្រុមអ្នកសង្កេតការណ៍អាស៊ាននឹងបង្ហាញការរកឃើញដល់រដ្ឋមន្ត្រីការបរទេសពីការសង្កេតលើទីតាំង និងទិន្នន័យដែលចាប់យកដោយបច្ចេកវិទ្យាត្រួតពិនិត្យផ្កាយរណបដែលផ្តល់ដោយសហរដ្ឋអាម៉េរិក។ បន្ថែមពីលើការជំរុញសន្តិភាពក្នុងតំបន់ បងធំពិភពលោកទាំង២ [សហរដ្ឋអាម៉េរិក និងចិន] បានបន្តកិច្ចខិតខំប្រឹងប្រែងការទូតដាច់ដោយឡែកពីគ្នា ដើម្បីបញ្ចប់ជម្លោះ ដោយគ្មានសញ្ញានៃភាពជោគជ័យរហូតមកដល់ពេលនេះ៕