រាជធានីបាងកក៖ ក្រសួងការពារជាតិថៃ បានចេញមុខលន់តួសុំទោសឡាវ បន្ទាប់ពីយោធភូមិភាគ២ រឹតបន្តឹងការគ្រប់គ្រងនៅតំបន់ច្រក[ឆងមេក]ដោយឯកតោភាគី ក្នុងបំណងដើម្បីបញ្ឈប់ការផ្គត់ផ្គង់ប្រេងឥន្ធនៈ និងបរិក្ខាសឹកដល់យោធាកម្ពុជា។ យ៉ាងណា ការណ៍នេះ បានធ្វើឱ្យឡាវក្ដៅស្លឹកត្រចៀក ទើបភាគីថៃស្លន់ស្លោ និងបង្ហាញពីការសោកស្ដាយ ចំពោះទង្វើដ៏អសីលធម៌របស់ខ្លួន...។
គេនៅចាំបានថា ចាប់ពីម៉ោង១២ៈ០០នាទីយប់រំលងអាធ្រាត្រថ្ងៃចន្ទទី១៥ ខែធ្នូនេះ យោធភូមិភាគ២ បានចេញបទបញ្ជារឹតបន្តឹងការត្រួតពិនិត្យលើការនាំចេញប្រេងឥន្ធនៈ និងការផ្គត់ផ្គង់ទាក់ទងនឹងបរិក្ខាយោធា តាមរយៈច្រកព្រំដែនអចិន្ត្រៃយ៍ឆងមេក ស្ថិតក្នុងឃុំឆងមេក ស្រុកសិរិនថរ (สิรินธร) ខេត្តឧប្បលរាជធានី ដែលមានព្រំប្រទល់ជាប់ប្រទេសឡាវ។ ជុំវិញបញ្ហានេះ លោក សុរៈសាន់ គង្គសិរិ (สุรสันต์ คงสิริ ) អ្នកនាំពាក្យក្រសួងការពារជាតិ បានលើកឡើងដោយចោទប្រកាន់កម្ពុជាស្រស់ៗថា មូលហេតុសំខាន់ គឺភស្តុតាងបង្ហាញថា ប្រេងឥន្ធនៈ និងគ្រឿងផ្គត់ផ្គង់យោធាផ្សេងទៀត ត្រូវបានដឹកជញ្ជូនកាត់ច្រកនេះ ចូលប្រទេសឡាវ រួចបន្តបញ្ជូនទៅកម្ពុជា ដើម្បីប្រើប្រាស់ក្នុងការប្រយុទ្ធជាមួយថៃ។
យ៉ាងណាក៏ដោយ ការប្រកាសតែឯកឯង ដោយឯកតោភាគី និងទង្វើអត្តនោម័តិរបស់ភាគីថៃនេះ ធ្វើឱ្យឡាវផ្ទុះកំហឹងជាខ្លាំង ទើបអ្នកនាំពាក្យក្រសួងការពារជាតិថៃ លោក សុរៈសាន់ ចេញមុខសុំទោសថា៖«ថៃគ្មានចេតនាបង្កគ្រោះថ្នាក់ដល់ប្រទេសជិតខាង[ឡាវ]ទេ។ ជម្លោះពាក់ព័ន្ធនឹងប្រទេសតែ២ប៉ុណ្ណោះ[កម្ពុជា-ថៃ] ហើយប្រទេសផ្សេងទៀតមិនពាក់ព័ន្ធទេ»។ ជាចុងក្រោយ អ្នកនាំពាក្យរូបនេះ បានសុំទោសប្រជាជនឡាវ ដែលរងផលប៉ះពាល់ដោយការរឹតត្បិតនេះ ប៉ុន្តែអាជ្ញាធរថៃ នឹងអនុវត្តវិធានការនេះឱ្យបានលឿនតាមដែលអាចធ្វើទៅបាន ដើម្បីកាត់បន្ថយការរំខាន[ដល់ប្រជាជនឡាវ]៕
