ក្រុងពោធិ៍សាត់៖ ស្ពានជ័យជំនះ ឬហៅថា ស្ពានស្ទឹងមេទឹក ស្ថិតក្នុងស្រុកវាលវែង ខេត្តពោធិ៍សាត់ ត្រូវបានរងការខូចខាតយ៉ាងដំណំ ដោយសារការទម្លាក់គ្រាប់បែកពីយន្តហោះចម្បាំង F-16 របស់យោធាថៃ។ នេះបើតាមការឱ្យពីក្រសួងការពារជាតិ។

ក្រសួងការពារជាតិបានឱ្យដឹងថា នៅព្រឹកថ្ងៃសៅរ៍ទី១៣ធ្នូ ឆ្នាំ២០២៥ យោធាថៃ កំពុងប្រើប្រាស់យន្តហោះចម្បាំងF-16 ចំនួន ២គ្រឿង ទម្លាក់គ្រាប់បែកចំនួន៧គ្រាប់ ចូលមកក្នុងភូមិសាស្រ្ត ឃុំថ្មដា ស្រុកវាលវែង ខេត្តពោធិ៍សាត់។ នៅម៉ោង៥:៥០នាទី យោធាថៃបានបាញ់កម្ទេចអគារសណ្ឋាគារនៅភូមិសាស្រ្តថ្មដា ចំនួន១គ្រាប់ និងនៅម៉ោង៥:៥៥នាទី បានបាញ់កម្ទេច អគារសណ្ឋាគារនៅភូមិសាស្រ្តថ្មដា ១គ្រាប់ទៀត។ ដោយឡែក នៅម៉ោងប្រមាណ៦ព្រឹកវិញ យោធាថៃបាញ់កម្ទេចស្ពានជ័យជំនះចំនួន២គ្រាប់ និងបាញ់កម្ទេចស្ពានជ័យជំនះ១ទៀតនៅជិតគ្នា ជាស្ពានចាស់ ចំនួន១គ្រាប់ផងដែរ។ ក្រសួងការពារជាតិ អះអាងថា មកទល់នឹងពេលនេះ យន្តហោះយោធាថៃនៅមិនទាន់បញ្ឈប់សកម្មភាពទម្លាក់គ្រាប់បែកនៅឡើយទេ។

ជុំវិញករណីនេះ អ្នកនាំពាក្យក្រសួងសាធារណការ និងដឹកជញ្ជូន លោក ផន រឹម បានបង្ហោះសារលើបណ្តាញសង្គមនៅព្រឹកសៅរ៍ទី១៣ធ្នូ ដោយអះអាងថា៖«នៅចំពោះស្ថានភាពបែបនេះ យើងរង់ចាំការអនុញ្ញតិពីសមរភូមិមុខ ដើម្បីចូលជួសជុល ធ្វើផ្លូវវាង ធានាការតភ្ជាប់ សម្រួលដល់ការចរាចរណ៍ឡើងវិញ»។ គួរជម្រាបថា ស្ពានជ័យជំនះ(ស្ពានស្ទឹងមេទឹក) ​មានចម្ងាយពីព្រំដែនប្រហែល៨,៥គីឡូម៉ែត្រ ជាច្រកងាយស្រួលតែមួយគត់ ភ្ជាប់ទៅប្រជុំជនថ្មដា ស្រុកវាលវែង។ ស្ពាននេះ ត្រូវបានស្ថាបនារួចក្នុងឆ្នាំ២០១៨ ហើយជាស្ពានបេតុង ដែលតភ្ជាប់ពីពីត្រើយម្ខាងទៅម្ខាងទៀតនៃស្ទឹងមេទឺក៕