សិង្ហបុរី៖ សិង្ហបុរី បានអំពាវនាវឱ្យប្រទេសកម្ពុជា និងថៃ អត់ធ្មត់ និងឱ្យភាគីទាំងពីរដោះស្រាយភាពខុសគ្នាតាមរយៈការសន្ទនា ចំពេលមានការប៉ះទង្គិចគ្នានៅតាមព្រំដែនកាន់តែកើនឡើង។
អ្នកនាំពាក្យក្រសួងការបរទេសសិង្ហបុរី បាននិយាយកាលពីថ្ងៃពុធទី១០ធ្នូថា៖«សិង្ហបុរីមានការព្រួយបារម្ភយ៉ាងខ្លាំងចំពោះការបន្តប៉ះទង្គិចគ្នាឡើងវិញនាពេលថ្មីៗនេះតាមបណ្តោយព្រំដែនថៃ-កម្ពុជា និងរបាយការណ៍អំពីអ្នកស្លាប់ និងរបួសរវាងភាគីទាំងសងខាង។ យើងសូមអំពាវនាវដល់ប្រទេសទាំងពីរឱ្យអត់ធ្មត់ និងដោះស្រាយភាពខុសគ្នារបស់ពួកគេតាមរយៈការសន្ទនា និងការចរចា ដោយអនុវត្តតាមស្មារតី និងគោលការណ៍នៃសេចក្តីប្រកាសរួម[ស្តីពីសន្តិភាព]។» ក្រសួងការបរទេសសិង្ហបុរី បន្ថែមថា ការដោះស្រាយតាមរយៈកិច្ចសន្ទនា នឹងមានសារសំខាន់សម្រាប់ទំនាក់ទំនងរយៈពេលវែងរវាងប្រទេសអាស៊ីអាគ្នេយ៍ទាំងពីរ និងអាស៊ាន។
ទន្ទឹមនឹងនោះ ក្រសួងការបរទេសសិង្ហបុរី បានណែនាំដល់ប្រជាជនសិង្ហបុរីឱ្យពន្យារពេលការធ្វើដំណើរទាំងអស់ទៅកាន់តំបន់ជម្លោះនៅតំបន់ព្រំដែនថៃ-កម្ពុជា។ ក្រសួងការបរទេសបានរៀបរាប់ថា៖«ប្រជាជនសិង្ហបុរីនៅកម្ពុជា និងថៃត្រូវបានណែនាំឱ្យតាមដានព័ត៌មានពីប្រភពផ្លូវការយ៉ាងដិតដល់ ស្ដាប់ដំបូន្មានរបស់អាជ្ញាធរមូលដ្ឋាន និងប្រុងប្រយ័ត្នចំពោះសុវត្ថិភាពផ្ទាល់ខ្លួន។»
ប្រជាជនសិង្ហបុរីនៅក្នុង ឬធ្វើដំណើរទៅកាន់ប្រទេសថៃ ឬកម្ពុជាក៏ត្រូវបានណែនាំឱ្យចុះឈ្មោះតាមអេឡិចត្រូនិកជាមួយក្រសួងការបរទេសនៅលើគេហទំព័ររបស់ខ្លួនផងដែរ។ អ្នកដែលស្ថិតនៅក្នុងប្រទេសកម្ពុជា និងថៃរួចហើយ ហើយត្រូវការជំនួយកុងស៊ុល អាចទាក់ទងស្ថានទូតសិង្ហបុរីរៀងៗខ្លួននៅរាជធានីភ្នំពេញ ឬរាជធានីបាងកក ឬការិយាល័យបំពេញកាតព្វកិច្ចក្រសួងការបរទេសដែលបើក២៤ម៉ោង៕
