រាជធានីភ្នំពេញ៖ ក្រុមការងារវិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប សហការជាមួយគម្រោងអច្ឆរិយភាពនៃទន្លេមេគង្គ និងម្ចាស់ដាយ​ត្រី លែងប្រភេទ​ត្រី​កំពុង​រងគ្រោះចំនួន១១ក្បាល ចូលទៅក្នុងទន្លេសាបវិញ។ នេះបើយោងតាមការឱ្យដឹងពីមន្រ្តីក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃ៦ធ្នូ...។

មន្រ្តីក្រសួងកសិកម្ម គូសបញ្ជាក់ថា ប្រភេទត្រីកំពុងរងគ្រោះដែលបានដោះលែងនោះ មានរហូតដល់​១១ក្បាលមានដូចជា៖ ត្រីរាជចំនួន១ក្បាល មានទម្ងន់៤២គីឡូក្រាម ប្រវែង១៥០សង់ទីម៉ែត្រ និងត្រីប្រាចំនួន១០ក្បាលមាន​ទម្ងន់​ចាប់ពី១០ ទៅ២៥គីឡូក្រាម និងមានប្រវែងចាប់ពី១១០ទៅ១៥០សង់​ទីម៉ែត្រ។ នេះជាព្រឹត្តិការណ៍មួយដ៏អស្ចារ្យ ដែលក្រុមការងារបានលែងត្រីក្នុងថ្ងៃ​ពេញ​បូណ៌មី ចុងក្រោយបំផុតក្នុងឆ្នាំ២០២៥ សបញ្ជាក់ឱ្យ​ឃើញអំពីការទទួលខុសត្រូវរបស់គ្រប់គ្នាក្នុងការការពារ និងថែរក្សាធន​ធាន​ជលផលទន្លេមេគង្គឱ្យមាននិរន្តរភាព។

ជាមួយគ្នានេះដែរ ក្រសួងក៏បានថ្លែងអំណរគុណដល់ក្រុម​ការងារ​ពាក់ព័ន្ធ​ទាំងអស់ ក៏ដូច​ជាម្ចាស់ដាយត្រីលេខ២សេ និង២ដេ ដែលបានចូលរួម​យ៉ាងសកម្ម ក្នុងការជួយសម្រួលដល់ក្រុមការងារស្រាវជ្រាវចុះទៅ​បំពាក់​ស្លាក​ដើម្បីសិក្សា និងស្វែងយល់ពីការផ្លាស់ទីជម្រកនៅរដូវប្រាំង និងលែង​ត្រី​ចូលទៅជម្រកធម្មជាតិវិញ៕