រដ្ឋធានីកូឡុំបូ៖ ព្យុះកំបុតត្បូងមួយ បានកួចបក់បោកពាសពេញប្រទេសស្រីលង្កា នៅថ្ងៃសុក្រទី២៨ ខែវិច្ឆិកានេះ ដោយបានផ្តាច់ជីវិតមនុស្សចំនួន៤៦នាក់ និង២៣នាក់ទៀតកំពុងបាត់ខ្លួន។ នាយកដ្ឋានអាកាសធាតុបានព្រមានថា ព្យុះកំណាចមួយនេះ អាចនឹងមានកម្លាំងបោកបក់ខ្លាំងនៅពេលវាផ្លាស់ទីឆ្លងកាត់កោះនេះ ក្នុងរយៈពេល១២ម៉ោងបន្ទាប់...។
ព្យុះកំបុតត្បូងនេះមានឈ្មោះថា «ឌីតវ៉ាហ៍ (Ditwah)» បានបោកបក់លើប្រទេសកោះនេះគ្មានត្រាប្រណី ដោយតំបន់ភាគខាងកើត និងភាគកណ្តាលរងផលប៉ះពាល់យ៉ាងធ្ងន់ធ្ងរបំផុត។ ព្យុះកំណាចមួយនេះ បានដឹកនាំទឹកភ្លៀងធ្លាក់ខ្លាំងក្នុងរយៈពេល ២៤ម៉ោងកន្លងទៅ នាំឱ្យមានការបាក់ស្រុតដីយ៉ាងគំហុក។ មជ្ឈមណ្ឌលគ្រប់គ្រងគ្រោះមហន្តរាយ (DMC) បានលើកឡើងនៅក្នុងសេចក្តីថ្លែងការណ៍មួយថា នៅទូទាំងប្រទេស មនុស្សចំនួន៤៣៩៩១នាក់ត្រូវបានជម្លៀសទៅកាន់សាលារៀន និងទីជម្រកសាធារណៈផ្សេងទៀត រួមទាំងគ្រួសារជាប់គាំងនៅលើដំបូលផងដែរ។ សាលារៀនបិទទ្វារ សេវារថភ្លើងត្រូវបានផ្អាក ហើយផ្សារហ៊ុនកូឡុំបូបានប្រកាសផ្អាកការជួញដូរមុនកាលកំណត់ ដោយសារភ្លៀងធ្លាក់ខ្លាំងពេក។
លោក អេស ដាម៉ាវីករ៉េម៉ា (S.Dharmawickrema) នាយកប្រតិបត្តិការសង្គ្រោះបន្ទាន់នៅ DMC បានសង្កត់ធ្ងន់ថា៖«យើងកំពុងបន្តប្រតិបត្តិការជួយសង្គ្រោះនៅតំបន់ដែលរងគ្រោះខ្លាំងបំផុត ប៉ុន្តែភូមិខ្លះពិបាកទៅដល់ណាស់ ដោយសារផ្លូវត្រូវបានស្ទះព្រោះការរអិលបាក់ដី[..]យើងកំពុងប្រឹងប្រែងអស់ពីសមត្ថភាព ដើម្បីឱ្យអ្នកគ្រប់គ្នាទៅកាន់ទីទួលសុវត្ថិភាព»។ ប្រព័ន្ធផ្សព្វផ្សាយក្នុងស្រុកបានរាយការណ៍ថា ជើងហោះហើរចំនួន៦ រួមទាំងពីទីក្រុងមូសខេត(Muscat) ទីក្រុងឌូបៃ រដ្ឋធានីញូវដេលី និងរាជធានីបាងកក ត្រូវបានប្តូរទិសដៅរួចហើយ ចេញពីអាកាសយានដ្ឋានអន្តរជាតិបានដារ៉ាណៃគី (Bandaranaike) របស់កូឡុំបូ៕
