រដ្ឋធានីដាកា៖ ក្រុមមន្រ្តីបានអះអាងថា អគ្គិភ័យដ៏កំណាចមួយបានឆាបឆេះនៅតំបន់អនាធិបតេយ្យដ៏ធំបំផុតមួយនៃរដ្ឋធានីដាកា ប្រទេសបងក្លាដែស កាលពីល្ងាចថ្ងៃអង្គារទី២៥ ខែវិច្ឆិកា ដោយបានធ្វើឱ្យមនុស្សរាប់ពាន់នាក់គ្មានផ្ទះសម្បែងជ្រកកោន...។
ភ្លើងចាប់ផ្តើមឆាបឆេះភ្លាមៗ លើតំបន់អនាធិបតេយ្យដ៏ធំបំផុត និងមានមនុស្សរស់នៅច្រើនកកកុញរបស់ប្រទេសបង់ក្លាដែស។ តំបន់អនាធិបតេយ្យមួយនេះ ជាផ្ទះរបស់មនុស្សជិត៨ម៉ឺននាក់ បានតាំងទីលំនៅស្ថិតនៅចន្លោះសង្កាត់ហ្គូលសាន (Gulshan) និងបាណានី (Banani) ហើយត្រូវបានអមដោយសំណង់នៃអគារផ្ទះល្វែងទំនើបៗ។ អណ្តាតភ្លើងពណ៌ទឹកក្រូច បានឆាបឆេះអណ្តែតពេញផ្ទៃមេឃនៅពេលយប់ ហើយផ្សែងហុយខ្លាំង បានគ្របដណ្ដប់លើតំបន់នេះ ខណៈមនុស្សម្នារបានរត់ភៀសខ្លួនជាមួយនឹងអ្វីដែលពួកគេអាចយកទៅតាមខ្លួនបាន។
មន្ត្រីសេវាពន្លត់អគ្គិភ័យ លោក តាឡា ប៊ីន ហ្សាស៊ីម (Talha Bin Zasim) បានអះអាងថា យ៉ាងហោចណាស់មានម៉ាស៊ីនពន្លត់ភ្លើងចំនួន១៩គ្រឿង ត្រូវបានបញ្ជូនទៅ ដើម្បីដោះស្រាយគ្រោះអគ្គិភ័យនេះ។ លោកបានសង្កត់ធ្ងន់ថា៖«ចរាចរណ៍មាមារញឹកខ្លាំងបានពន្យឺតការមកដល់របស់យើង ហើយនៅពេលចូលទៅក្នុងផ្លូវតូចចង្អៀតបានបង្ខំយើងឱ្យដាក់ម៉ាស៊ីនចុះ នៅចម្ងាយឆ្ងាយ[ពីកន្លែងកើតហេតុ]»។ ក្រុមអ្នកពន្លត់អគ្គិភ័យបានអូសទុយោវែងកាត់តាមផ្លូវតូចចង្អៀត ដោយបានចាយពេលអស់រយៈពេលជាង៥ម៉ោងដើម្បីពន្លត់ភ្លើង។ យ៉ាងណា មូលហេតុនៃការឆេះនៅមិនទាន់ដឹងច្បាស់នៅឡើយទេ។ គិតមកទល់ពេលនេះ មិនទាន់មានសេចក្តីរាយការណ៍ភ្លាមៗអំពីការស្លាប់ និងរបួសនោះទេ៕
