រាជធានីបាងកក៖ ក្រោយកូនទាហានថៃជាន់មីនផ្ទុះដាច់ជើងនៅតំបន់ព្រំដែន អ្នកនាំពាក្យរដ្ឋាភិបាលថៃ បានបង្ហើបថា លោក អានុទីន ឆានវីរគុល នាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានចុះទៅពិនិត្យប្រតិបត្តិការរបស់កងវរសេនាតូចថ្មើរជើងលេខ១១ ដែលអមដំណើរដោយ លោក ណាត់ថៈពល ណាក់ផានិច្ច រដ្ឋមន្ត្រីក្រសួងការពារជាតិ លោក សីហាស័ក្តិ ភួងកេតកែវ រដ្ឋមន្ត្រីក្រសួងការបរទេស និងលោក អាឌុល ប៊ុនថាំចារើន អនុរដ្ឋមន្ត្រីក្រសួងការពារជាតិ។ នេះបើតាមកគេហទំព័ររបស់រាជរដ្ឋាភិបាលថៃ។

ស្របស្ថានការណ៍កំពុងឡើងកម្តៅ ដោយសារស្នាដៃភាគីថៃ ស្រាប់តែលោក អានុទីន បាន​​ធ្វើ​ដំណើរ​ដើម្បី​សួរ​សុខទុក្ខ​ និង​ផ្តល់​ការ​គាំទ្រយោធាយ៉ាងពេញទំហឹង។ ទន្ទឹមគ្នានេះ លោកក៏​បាន​បញ្ជាក់​ជា​ថ្មី​ថា៖«យើង​នឹង​មិន​បោះ​បង់​ចោល​គ្នា​ទេ។ យើង​នឹង​មិនបោះបង់ទឹកដី​ទេ។ សូម​រក្សា​ការ​ប្តេជ្ញា​ចិត្ត និង​ផ្តល់​អាទិភាព​ដល់​សុវត្ថិភាព​ទាំង​អស់​គ្នា។ នាយករដ្ឋមន្ត្រី​ បាន​ធានា​ចំពោះ​រាជរដ្ឋាភិបាល​ថា បញ្ហា​ទាំងអស់​នឹង​ត្រូវ​ដោះស្រាយ​ឱ្យបាន​ហ្មត់ចត់ និង​ឆាប់រហ័ស»។ គួរជម្រាបថា លោក អានុទីន ចុះទៅសួរសុខទុក្ខយោធានេះ មិនមែនគ្រោងឯកសណ្ឋានធម្មតានោះទេ ពោលគឺលោកបានពាក់ឈុតពិសេសរបស់យោធាថៃ ឬ(ហៅម្យ៉ាងថា ឈុតសម្រាប់ធ្វើសង្គ្រាម ឬឈុតសឹក)។ នេះបង្ហាញយ៉ាងច្បាស់អំពីចេតនាទុច្ចរិតរបស់ភាគីថៃ ក្នុងបំណងយកលេសកូនទាហានជាន់មីនដាច់ជើង មកវាយប្រហារ ឬបើកការឈ្លានពានមកលើកម្ពុជាសាជាថ្មី។

ស្ថានការណ៍ព្រំដែនកំពុងក្រឡាប់ចក្រ និងកាន់តែស្មុគស្មាញ ក្រោយលោក អនុទីន ឆានវីរគុល ចេញសេចក្តីប្រកាសដោយមិនខ្វល់ពីផលអវិជ្ជមានថា«កិច្ចព្រមព្រៀងសន្តិភាពចប់ហើយ» នាថ្ងៃទី១១ ខែវិច្ឆិកា។ អ្វីដែលនាំឱ្យស្ថានការណ៍ព្រំដែនកាន់តែផុយស្រួយនោះគឺ លោកបានប្រកាសដោយមិនរអារថា ថៃមិនអនុវត្តផែនការ៤ចំណុចនៅក្នុងកិច្ចព្រមព្រៀងសន្តិភាពតទៅទៀតទេ ខណៈផែនការទាំង៤ ចំណុចនោះរួមមាន៖ ការដកអាវុធធុនធ្ងន់ ការបោសសម្អាតមីន ការបង្ក្រាបការឆបោកតាមអនឡាញ និងការគ្រប់គ្រង់តំបន់់ព្រំដែន។

ទាំងនេះបង្ហាញឱ្យឃើញថា ពន្លឺសន្តិភាពព្រំដែនរវាងកម្ពុជា-ថៃ បានស្រអាប់ទៅវិញ ក្រោយយោធាថៃ ដើរជាន់មីនផ្ទុះដាច់ជើងនៅព្រំដែនទល់មុខប្រាសាទព្រះវិហារ ដែលជាលើកទី៧ នៃការដើរជាន់មីនខ្លួនឯង។ លេសដដែលៗនេះហើយ ធ្វើឱ្យភាគីថៃ ហ៊ានផ្អាកកិច្ចព្រមព្រៀងសន្តិភាពដោយឯតោភាគី និងបញ្ជាឱ្យយោធាត្រៀមខ្លួនប្រយុទ្ធ ស្របពេលពួកគេ ក៏បានបញ្ជូនអាវុធធន់ធ្ងន់ទៅកាន់ព្រំដែនវិញ។ ទាំងនេះសបញ្ជាក់ឱ្យឃើញថា ភាគីថៃមិនគោរពកិច្ចព្រមព្រៀង ដែលមានសហរដ្ឋអាម៉េរិក និងប្រធានអាស៊ានជាសាក្សីនោះទេ ហើយក៏កំពុងប្រើលេសនេះ ដើម្បីដាក់សម្ពាធលើកម្ពុជា ក្នុងមហិច្ឆតាឈ្លានពាន។ ដោយឡែក ភាគីកម្ពុជាតែងតែគោរពកិច្ចព្រមព្រៀងសន្តិភាព អនុវត្តផែនការដែលភាគីថៃស្នើសុំ និងគ្មានបំណងចង់បានអ្វីក្រៅតែពី «សន្តិភាព»៕