រដ្ឋធានីវ៉ាស៊ីនតោន៖ ប្រធានាធិបតីសហរដ្ឋអាម៉េរិក លោក ដូណាល់ ត្រាំ កាលពីថ្ងៃអាទិត្យទី២វិច្ឆិកា បានអះអាងថា ប្រធានាធិបតីចិន លោក ស៊ី ជីនពីង បានធានាដល់លោកថា រដ្ឋធានីប៉េកាំងនឹងមិនព្យាយាមបង្រួបបង្រួមតៃវ៉ាន់ជាមួយចិនដីគោកទេ ខណៈមេដឹកនាំសាធារណរដ្ឋរូបនេះ កំពុងកាន់តំណែង...។
លោក ត្រាំ បាននិយាយកាលពីថ្ងៃអាទិត្យទី២វិច្ឆិកាថា បញ្ហាដ៏ចម្រូងចម្រាសជាយូរមកហើយរបស់កោះតៃវ៉ាន់ មិនដែលលើកឡើងជាប្រធានបទនៅពេលដែលលោកបានជួបជាមួយលោក ស៊ី នៅប្រទេសកូរ៉េខាងត្បូង កាលពីថ្ងៃទី៣០តុលា សម្រាប់កិច្ចប្រជុំទល់មុខគ្នាលើកដំបូងរបស់មេដឹកនាំទាំង២ ក្នុងរយៈពេល៦ឆ្នាំ។ កិច្ចប្រជុំនេះ ភាគច្រើនផ្តោតលើភាពតានតឹងពាណិជ្ជកម្មរវាងមហាអំណាចផុតលេខទាំង២ [សហរដ្ឋអាម៉េរិក និងចិន]។
លោក ត្រាំ បានលើកឡើងក្នុងបទសម្ភាសមួយជាមួយកម្មវិធី CBS 60 Minutes ដែលបានចាក់ផ្សាយនៅថ្ងៃទី២វិច្ឆិកាថា៖«លោកបាននិយាយដោយចំហ ហើយមន្ត្រីរបស់លោកបាននិយាយដោយចំហនៅក្នុងកិច្ចប្រជុំថា ពួកគេនឹងមិនធ្វើអ្វីទេក្នុងពេលដែលលោកប្រធានាធិបតី ត្រាំ ជាប្រធានាធិបតី ពីព្រោះពួកគេដឹងពីផលវិបាក»។ នៅពេលសួរក្នុងបទសម្ភាសថា តើលោកនឹងបញ្ជាកងកម្លាំងអាម៉េរិកឱ្យចូលធ្វើសកម្មភាពឬអត់ ប្រសិនបើចិនបានធ្វើសកម្មភាពយោធាលើតៃវ៉ាន់? លោក ត្រាំ បានបដិសេធ។ សហរដ្ឋអាម៉េរិក ក្រោមរដ្ឋបាលទាំងសាធារណរដ្ឋ និងប្រជាធិបតេយ្យ បានរក្សាគោលនយោបាយនៃភាពមិនច្បាស់លាស់ជាយុទ្ធសាស្ត្រលើតៃវ៉ាន់ ដោយព្យាយាមមិនបង្ហាញពីការសម្រេចចិត្តថា តើសហរដ្ឋអាម៉េរិកនឹងមកជួយកោះនេះ ក្នុងសេណារីយ៉ូបែបនេះឬអត់?...៕
