រាជធានីគូឡាឡាំពួរ៖ នៅឯកិច្ចប្រជុំកំពូលនាប្រទេសម៉ាឡេស៊ី អគ្គលេខាធិការអង្គការសប្រជាជាតិ លោក អង់តូនីញ៉ូ ហ្គូតេរ៉ែស បោះសម្តីចំៗថា ក្រុមប្រឹក្សាសន្តិសុខអង្គការសហប្រជាជាតិ (UNSC) ប្រែក្លាយទៅជា «គ្មានប្រសិទ្ធភាព» ក្នុងការដោះស្រាយវិបត្តិជាច្រើនរបស់ពិភពលោក ដោយសារតែសមាជិករបស់ក្រុមនេះ តែងតែមានទស្សនៈផ្ទុយគ្នា។ នេះបើតាមការចុះផ្សាយកាសែត CNA នៅថ្ងៃទី២៨ ខែតុលា។

ប្រធានអង្គការសហប្រជាជាតិលោក អង់តូនីញ៉ូ ហ្គូតេរ៉ែស បានអះអាងថា សមាជិកអចិន្ត្រៃយ៍ទាំង៥ (សហរដ្ឋអាម៉េរិក រុស្ស៊ី អង់គ្លេស បារាំង និងចិន) របស់ក្រុមប្រឹក្សាសន្តិសុខអង្គការសហប្រជាជាតិ បានប្រើប្រាស់អំណាចវេតូដើម្បីបម្រើផលប្រយោជន៍ផ្ទាល់ខ្លួនរបស់ពួកគេ ដោយបានបំផ្លាញភាពជឿទុកចិត្តរបស់អង្គការអន្តររដ្ឋាភិបាលពិភពលោកមួយនេះ។ ជុំវិញបញ្ហាខាងលើ លោកបានរំលឹកឱ្យធ្វើកំណែទម្រង់ឡើងវិញ។ លោក​ ហ្គូតេរ៉ែស បាន​បន្ត​ថា បញ្ហា​ប្រឈម​ស្នូល​ស្ថិត​នៅ​ក្នុង​ភាពប្រេះឆា​យ៉ាង​រ៉ាំរ៉ៃ​ក្នុង​ចំណោម​មហាអំណាច​ពិភពលោក ដែល​បង្កើត​ជាបញ្ហាចម្បង​របស់​អង្គការ​សហប្រជាជាតិ​សម្រាប់​ការ​រក្សា​សន្តិភាព និង​សន្តិសុខ​អន្តរជាតិ។ មិនតែប៉ុណ្ណោះ លោកបានសង្កត់ធ្ងន់៖«វាជាការពិតដែលក្រុមប្រឹក្សាសន្តិសុខភាគច្រើនអសមត្ថភាពទាក់ទងនឹងបញ្ហាសំខាន់ៗ[..] ហើយហេតុផល គឺការបែកបាក់គ្នាក្នុងចំណោមប្រទេសមហាអំណាច»។

ក្រុមប្រឹក្សាសន្តិសុខអង្គការសហប្រជាជាតិ មានសមាជិកទាំងអស់ចំនួន១៥ប្រទេស ហើយសមាជិកអចិន្ត្រៃយ៍មាន៥ គឺចិន បារាំង រុស្ស៊ី ចក្រភពអង់គ្លេស និងសហរដ្ឋអាម៉េរិក ដោយពួកគេអាចរារាំងសេចក្តីសម្រេចណាមួយក៏បាន ដោយគ្រាន់តែលើកដៃវេតូ ចំណែកសមាជិកចំនួន១០ផ្សេងទៀត ត្រូវបានជ្រើសរើសតាមតំបន់ជារៀងរាល់២ឆ្នាំម្ដង។ យ៉ាងណា លោកហ្គូតេរ៉ែស បានពណ៌នារចនាសម្ព័ន្ធនេះថា ហួសសម័យ និងមិនតំណាងឱ្យពិភពលោកនៃសម័យទំនើបទៀតទេ។ អគ្គលេខាធិការអង្គការសប្រជាជាតិបានសង្កត់ធ្ងន់ថា៖«យើងត្រូវតែធ្វើកំណែទម្រង់ក្រុមប្រឹក្សាសន្តិសុខ។ [វាមាន]សមាជិកអចិន្ត្រៃយ៍អឺរ៉ុបចំនួន៣ អាស៊ី១[..]គ្មានអាហ្រ្វិក គ្មានអាម៉េរិកឡាទីន។ សមាសភាពត្រូវផ្លាស់ប្ដូរ និងសម្របខ្លួនទៅនឹងអ្វីដែលជាការពិតនាពេលបច្ចុប្បន្ននេះ[..]»។

ក្រៅពីនេះ ប្រធានអង្គការសហប្រជាជាតិរូបនេះ បាននិយាយទៅកាន់ CNA នៅខាងក្រៅកិច្ចប្រជុំកំពូលនៅរាជធានីគូឡាឡាំពួរ កាលពីថ្ងៃចន្ទទី២៧ ខែតុលា អំពីសង្គ្រាមស៊ីវិលនៅក្នុងប្រទេសមីយ៉ាន់ម៉ា វិបត្តិនៅតំបន់ហ្កាហ្សា និងបញ្ហាសមុទ្ទចិនខាងត្បូង៕