រាជធានីគូឡាឡាំពួរ៖ អូស្ត្រាលីបានបង្ហាញពីគម្រោងបោះទុនវិនិយោគតម្លៃ ២០ពាន់លានដុល្លារអូស្ត្រាលី ឬស្មើនឹងប្រមាណ១៣,០២ពាន់លានដុល្លារអាម៉េរិក នៅទូទាំងអាស៊ីអាគ្នេយ៍ ខណៈរដ្ឋធានីកង់បេរ៉ាឈានទៅដំណាក់កាលថ្មីនៃកិច្ចសហប្រតិបត្តិការសេដ្ឋកិច្ចក្នុងតំបន់ ដែលជាសញ្ញាបង្ហាញពីការប្តេជ្ញាចិត្តកាន់តែខ្លាំង ចំពោះសមាហរណកម្មអាស៊ានកាន់តែស៊ីជម្រៅ។

នាយករដ្ឋមន្ត្រីអូស្ត្រាលី លោក អេនថូនី អាលបានីស បានលើកឡើងថា មហិច្ឆតារបស់អូស្ត្រាលី គឺចង់ក្លាយជាដៃគូចូលរួម វិនិយោគនៅក្នុងកំណើនក្នុងតំបន់អាស៊ីអាគ្នេយ៍។ លោកបាននិយាយថា ការប្តេជ្ញាចិត្តនេះ គឺដោយសារតែវឌ្ឍនភាពដ៏រឹងមាំដែលសម្រេចបានកាលពីឆ្នាំមុន ជាមួយនឹងពាណិជ្ជកម្មទ្វេភាគីឈានដល់កម្រិតខ្ពស់បំផុត កើនឡើងជិត៦ពាន់លានដុល្លារអូស្ត្រាលី ខណៈការវិនិយោគរបស់អូស្ត្រាលីបានកើនឡើងប្រហែល២ពាន់លានដុល្លារអូស្ត្រាលី នៅក្នុងតំបន់អាស៊ីអាគ្នេយ៍។ ការរួមបញ្ចូលគ្នានេះមានន័យថា អូស្ត្រាលីកំពុងធ្វើការបណ្តាក់ទុនថ្មីៗក្នុងការធ្វើកសិកម្មនៅប្រទេសឡាវ ថាមពលក្នុងប្រទេសថៃ ហេដ្ឋារចនាសម្ព័ន្ធនៅវៀតណាម និងការដឹកជញ្ជូននៅទូទាំងអាស៊ីអាគ្នេយ៍។

លោក អាលបានីស បាននិយាយនៅក្នុងសុន្ទរកថាពិសេសនៅឯវេទិកាអាស៊ាន-ឥណ្ឌូប៉ាស៊ីហ្វិក (AIPF) ឆ្នាំ២០២៥ថា៖«តាមទស្សនៈរបស់រដ្ឋាភិបាលរបស់យើងនេះ គ្រាន់តែជាការចាប់ផ្តើមប៉ុណ្ណោះ។ មានគម្រោងវិនិយោគចំនួន២០ពាន់លានដុល្លារអូស្ត្រាលី ដែលយើងមើលឃើញពីតម្លៃសម្រាប់មូលធន និងហិរញ្ញវត្ថុរបស់អូស្ត្រាលី»។ ដើម្បីពន្លឿនវឌ្ឍនភាពនេះ លោក អាលបានីស បានប្រកាសដើមទុនថ្មី រួមទាំងប្រាក់ចំនួន១៧៥លានដុល្លារអូស្ត្រាលី ទៅក្នុងមូលនិធិ IFM Investors Asia Fund ដែលនឹងបើកទីផ្សារនៅអាស៊ីអាគ្នេយ៍ សម្រាប់មូលនិធិសោធននិវត្តន៍អូស្ត្រាលីចំនួន១៥។ ទន្ទឹមនោះ អូស្ត្រាលីក៏នឹងវិនិយោគទឹកប្រាក់ចំនួន៥០លានដុល្លារអាម៉េរិក ដើម្បីបង្កើតវេទិកាថ្មីមួយដែលដឹកនាំដោយ Plenary Group ដែលជាអ្នកឯកទេសអូស្ត្រាលីក្នុងគម្រោងហេដ្ឋារចនាសម្ព័ន្ធភាពជាដៃគូសាធារណៈ និងឯកជន។

ជាផ្នែកមួយនៃការពង្រឹងការសម្របសម្រួលអាជីវកម្ម លោក អាលបានីស បាននិយាយថា អូស្ត្រាលី ក៏បានសម្រួលទិដ្ឋាការអាជីវកម្ម ពង្រឹងភាពបត់បែនសម្រាប់អ្នកធ្វើដំណើរញឹកញាប់ និងបង្ហាញការិយាល័យច្រកចេញចូលតែមួយ ដើម្បីសម្រួលដំណើរការវិនិយោគបរទេសចូលមកក្នុងប្រទេស។ លោកមានប្រសាសន៍៖«នេះគឺជាវឌ្ឍនភាពដែលយើងវាស់វែងក្នុងសកម្មភាពនៃភាពជាដៃគូជាក់ស្តែង ដែលកិច្ចសហប្រតិបត្តិការសេដ្ឋកិច្ចបង្កើតការងារ កែលម្អប្រាក់ឈ្នួល និងបង្កើនឱកាស។ ជាមួយនឹងការចូលរួមផ្នែកសេដ្ឋកិច្ចកាន់តែស៊ីជម្រៅ វានាំមកនូវការយល់ដឹងកាន់តែច្រើន និងពង្រឹងសន្តិភាព និងសន្តិសុខសម្រាប់អាស៊ីអាគ្នេយ៍។ នោះហើយជាមូលហេតុដែលអូស្ត្រាលីមានមោទនភាពយ៉ាងខ្លាំង ដែលបានបណ្តាក់ទុកនៅអាស៊ីអាគ្នេយ៍»៕