រាជធានីភ្នំពេញ៖ គណៈរដ្ឋមន្រ្តី បានសម្រេចអនុម័តសេចក្តីព្រាងច្បាប់ស្តីពីថវិកាជាតិឆ្នាំ២០២៦ ដោយគ្រោងចំណាយថវិកាទៅដល់ប្រមាណ១០ពាន់លានដុល្លារអាម៉េរិក ដោយផ្តោតសំខាន់ខ្លាំងលើការពង្រឹងសមត្ថភាពការពារអធិបតេយ្យភាព និងបូរណភាពទឹកដី។

ការអនុម័តនេះ ធ្វើឡើងក្នុងកិច្ចប្រជុំពេញអង្គគណៈរដ្ឋមន្រ្តី ក្រោមវត្តមានដឹកនាំរបស់សម្តេចនាយករដ្ឋមន្ត្រី ហ៊ុន ម៉ាណែត កាលពីថ្ងៃទី២៤ ខែតុលា ឆ្នាំ២០២៥។ សេចក្តីប្រកាសព័ត៌មានស្តីពីលទ្ធផលកិច្ចប្រជុំពេញអង្គគណៈរដ្ឋមន្រ្តី បញ្ជាក់ថា៖«សេចក្តីព្រាងច្បាប់ស្តីពីហិរញ្ញវត្ថុឆ្នាំ២០២៦ ត្រូវបានរៀបចំឡើងដោយផ្តល់អាទិភាពលើការពង្រឹង សមត្ថភាពការពារអធិបតេយ្យជាតិ និងបូរណភាពទឹកដី ការទ្រទ្រង់កិច្ចប្រតិបត្តិការរបស់ស្ថាប័នរដ្ឋ និងការអនុវត្តគោលនយោបាយសំខាន់ៗ»។ ទន្ទឹមនឹងនោះ ថវិកាក៏នឹងត្រូវប្រើសម្រាប់លើការកែទម្រង់នានា ជាពិសេសគាំទ្រការអនុវត្តកម្មវិធីគោលនយោបាយអាទិភាព ដូចមានចែងក្នុងយុទ្ធសាស្ត្របញ្ចកោណ ដើម្បីឆ្លើយតបទៅនឹងទិសដៅនៃការអភិវឌ្ឍរបស់កម្ពុជាក្នុងដំណាក់កាលថ្មី ទាំងក្នុងក្របខ័ណ្ឌផ្ទៃក្នុងប្រទេស ទាំងក្នុង ក្របខ័ណ្ឌតំបន់ និងពិភពលោក។ 

ថវិការដ្ឋប្រមាណ១០ពាន់លានដុល្លារអាម៉េរិក ដែលគ្រោងចំណាយក្នុងឆ្នាំ២០២៦ កើនឡើងប្រមាណ៧,៨ភាគរយ បើធៀបនឹងច្បាប់ហិរញ្ញវត្ថុឆ្នាំ២០២៥។​ សេចក្តីប្រកាសបញ្ជាក់បន្ថែមថា តាមការវាយតម្លៃ សេដ្ឋកិច្ចកម្ពុជាត្រូវបានព្យាករថា នឹងសម្រេចបានកំណើនក្នុងរង្វង់៥,២ភាគរយ សម្រាប់ឆ្នាំ២០២៥ និងប្រមាណ៥ភាគរយ សម្រាប់ឆ្នាំ២០២៦ ស្របពេល ដែលផលិតផលក្នុងស្រុកសរុប (GDP) សម្រាប់មនុស្សម្នាក់ៗ ត្រូវបានរំពឹងថា នឹងកើនឡើងដល់៣០២០ដុល្លារអាម៉េរិក ខណៈក្នុងឆ្នាំ២០២៥នេះ មាន២៨៥៨ដុល្លារអាម៉េរិក។ កំណើនសេដ្ឋកិច្ចឆ្នាំ២០២៦ ត្រូវបានគាំទ្រដោយវិស័យនានា រួមមាន ឧស្សាហកម្ម សេវាកម្ម កសិកម្ម នេសាទ និងការចិញ្ចឹមសត្វ ជាដើម៕