រាជធានីភ្នំពេញ៖«[..]ជំហរកម្ពុជា[..]នឹងមិនផ្លាស់ប្ដូរទេ ហើយកម្ពុជាក៏មិនធ្វើថោកទៅសុំឱ្យ[ថៃ]បើកច្រកព្រំដែននោះដែរ[..]»។ នេះជាប្រសាសន៍ដ៏ម៉ឺងម៉ាត់របស់ថ្នាក់ដឹកនាំកម្ពុជា គឺ សម្ដេចតេជោ ហ៊ុន សែន ធ្លាប់បញ្ជាក់ម្ដងរួចមកហើយ និងនៅតែបន្តប្រកាន់ជំហរបែបនេះដដែល ដែលហាក់ផ្ទុយដាច់ស្រឡះទៅនឹងការបំភ្លៃព័ត៌មានរបស់កាសែតថៃ The Nation ដែលបានលើកឡើងថា កម្ពុជាស្នើសុំថៃបើកច្រកព្រំដែនគោកឡើងវិញ នៅថ្ងៃទី២០ ខែតុលា ឆ្នាំ២០២៥ខាងមុខ...។ 

លោក ជា ធីរិទ្ធ អ្នក​នាំពាក្យសម្តេចតេជោ និងព្រឹទ្ធសភាកម្ពុជា នៅរាត្រីថ្ងៃទី១៥ ខែតុលា ឆ្នាំ២០២៥ បានបដិសេធយ៉ាងដាច់អហង្កា ចំពោះ​ការ​លើក​ឡើង​របស់ ​អ្នក​នាំ​ពាក្យ​ក្រសួង​ការពារជាតិថៃ លោក សុរសាន់ គង់សិរិ (สุรสันต์ คงสิริ) ដែលត្រូវបានកាសែត The Nation ស្រង់សម្តីយកទៅចុះផ្សាយបន្តថា៖«សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានដាក់សម្ពាធឱ្យប្រទេសថៃបើកច្រកព្រំដែននៅថ្ងៃទី២០តុលា ឆ្នាំ២០២៥ ខាងមុខនេះ»។ 

លោក ជា ធីរិទ្ធ បានរំឭកថា កន្លងទៅសម្ដេចតេជោ ធ្លាប់បញ្ជាក់ពីជំហរជាបន្តបន្ទាប់ និងបានផ្សាយលើទំព័រហ្វេសប៊ុកផ្លូវការរបស់សម្ដេច កាលពីថ្ងៃទី២៣កញ្ញាកន្លងទៅថ្មីៗនេះថា ចាប់តាំងពីយោធាថៃ បិទព្រំដែនជាឯកតោភាគីមក កម្ពុជាមិនដែលបានសុំភាគីថៃបើកច្រកវិញទេ គ្រាន់តែប្រាប់ទៅភាគីថៃថា (ថៃជាអ្នកបិទ ថៃគឺជាអ្នកបើក មិនបាច់ចរចាជាមួយកម្ពុជាទេ ហើយកម្ពុជានឹងបើកតាមក្រោយយ៉ាងយូរ៥ម៉ោង)។ ជំហរកម្ពុជានេះ នឹងមិនផ្លាស់ប្ដូរទេ ហើយកម្ពុជាក៏មិន[ធ្វើថោក]ទៅសុំឱ្យបើកច្រកព្រំដែននោះដែរ។ មួយវិញទៀត សម្តេចតេជោធ្លាប់មានប្រសាសន៍ថា៖«ថៃអាចបន្តបិទសូម្បី១០០ឆ្នាំទៀត ក៏កម្ពុជាមិនស្លាប់ដែរ»។

សូមរំឭកថា ពាក់ព័ន្ធនឹងការបើកដំណើរការច្រកទ្វារព្រំដែនរវាងកម្ពុជា-ថៃឡើងវិញនេះ ភាគីទាំងពីរ ក៏ធ្លាប់បានលើកយកមកជជែកគ្នាដែរ នៅក្នុងកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ ដែលរៀបចំនៅខេត្តកោះកុង កាលពីថ្ងៃទី១០ ខែកញ្ញា ឆ្នាំ២០២៥​។ យ៉ាងណា ភាគីទាំងពីរ បានត្រឹមជជែកគ្នាប៉ុណ្ណោះ ប៉ុន្តែនៅមិនទាន់មានការព្រមព្រៀងគ្នាជាផ្លូវការឡើយ។ គួរជ្រាបថា យោធាថៃ បានសម្រេចបិទច្រកទ្វារព្រំដែនទាំងអស់ជាមួយកម្ពុជា ដោយឯកតោភាគី កាលពីយប់ថ្ងៃទី២៣ ខែមិថុនា ដោយអនុញ្ញាតឱ្យតែអ្នកជំងឺ និងសិស្សឆ្លងកាត់តែប៉ុណ្ណោះ។ ក្រោយមកកម្ពុជា ក៏សម្រេចបិទច្រកទ្វារព្រំដែនទាំងអស់ជាមួយថៃដែរ ខណៈគិតមកដល់ថ្ងៃទី១៦ ខែតុលា ឆ្នាំ២០២៥ គឺមានរយៈពេលជិត៤ខែហើយ៕