រដ្ឋធានីវែលីងតោន៖ នូវែលហ្សេឡង់ និងសិង្ហបុរី កាលពីថ្ងៃសុក្រទី១០តុលា បានចុះហត្ថលេខាលើភាពជាដៃគូយុទ្ធសាស្ត្រគ្រប់ជ្រុងជ្រោយ (CSP) ដោយនាយករដ្ឋមន្ត្រីរបស់ប្រទេសទាំង២ បានសន្យាថា នឹងបន្តស្វែងរកមធ្យោបាយធ្វើការរួមគ្នា ដើម្បីរក្សាសណ្តាប់ធ្នាប់ដោយផ្អែកលើច្បាប់អន្តរជាតិ នៅពេលមានភាពតានតឹងភូមិសាស្ត្រនយោបាយ និងសេដ្ឋកិច្ចកើនឡើង។
នាយករដ្ឋមន្ត្រីនូវែលហ្សេឡង់ លោក គ្រីស្តូហ្វឺ លូហ្សុន (Christopher Luxon) បាននិយាយនៅក្នុងសេចក្តីថ្លែងការណ៍មួយបន្ទាប់ពីការចុះហត្ថលេខាលើកិច្ចព្រមព្រៀងនេះថា៖«សិង្ហបុរី..គឺជាដៃគូជិតស្និទ្ធបំផុតរបស់យើង។ ក្នុងនាមជារដ្ឋតូចៗ វាជារឿងសំខាន់ដែលយើងធ្វើការជាមួយគ្នា ដើម្បីរក្សាពាណិជ្ជកម្មបើកចំហ ពង្រឹងសន្តិសុខ និងការពារសណ្តាប់ធ្នាប់ដែលផ្អែកលើច្បាប់»។ លោក លូហ្សុន បានបន្ថែមថា៖«តាមរយៈភាពជាដៃគូយុទ្ធសាស្ត្រគ្រប់ជ្រុងជ្រោយ យើងបានប្តេជ្ញាចិត្តក្នុងការដោះស្រាយបញ្ហាប្រឈមជំនាន់ក្រោយជាមួយគ្នា ចាប់ពីភាពធន់នៃខ្សែច្រវាក់ផ្គត់ផ្គង់ និងពាណិជ្ជកម្មឌីជីថល រហូតដល់ការប្រែប្រួលអាកាសធាតុ និងសន្តិសុខដែនសមុទ្ទ»។
ប្រទេសទាំងពីរ ក៏បានបញ្ចប់កិច្ចព្រមព្រៀងស្តីពីពាណិជ្ជកម្មលើការផ្គត់ផ្គង់សំខាន់ៗ ដោយរៀបចំជាផ្លូវការនូវការរៀបចំដែលបានចាប់ផ្តើមក្នុងអំឡុងពេលជំងឺរាតត្បាតកូវីដ-១៩ នៅពេលដែលការដឹកជញ្ជូនតាមផ្លូវអាកាសបន្តរវាងប្រទេសទាំងពីរ ទោះបីជាមានអ្នកដំណើរតិចតួចនៅលើជើងហោះហើរក៏ដោយ។ ប្រទេសទាំងពីរ បានរក្សាទំនាក់ទំនងនយោបាយអស់រយៈពេល៦០ឆ្នាំ ហើយនៅឆ្នាំ២០១៩ បានចុះហត្ថលេខាលើកិច្ចព្រមព្រៀងភាពជាដៃគូដែលបានពង្រឹង គ្របដណ្ដប់លើពាណិជ្ជកម្ម និងសេដ្ឋកិច្ច ការការពារ និងសន្តិសុខ និងខ្សែច្រវាក់ផ្គត់ផ្គង់។
នាយករដ្ឋមន្ត្រីសិង្ហបុរី លោក ឡរ៉េន វ៉ុង (Lawrence Wong) បាននិយាយនៅក្នុងសន្និសីទសារព័ត៌មានរួមគ្នាមួយនៅថ្ងៃសុក្រទី១០តុលាថា កិច្ចព្រមព្រៀងស្របច្បាប់មានន័យថា រដ្ឋាភិបាលទាំងពីរបានប្តេជ្ញាថា នឹងមិនដាក់កំហិតលើការនាំចេញ សូម្បីតែក្នុងអំឡុងពេលមានវិបត្តិក៏ដោយ លើផលិតផលសំខាន់ៗមួយចំនួនដូចជាថ្នាំពេទ្យ និងការផ្គត់ផ្គង់សំខាន់ៗផ្សេងទៀត។លោកបន្តថា៖«ខ្ញុំគិតថា នោះជាកិច្ចព្រមព្រៀងដែលនឹងផ្តល់ការធានាដល់ប្រទេសរបស់យើងទាំងពីរ និងប្រជាជនរបស់យើងថានៅពេលមានតម្រូវការ យើងនឹងគាំទ្រគ្នាទៅវិញទៅមកជានិច្ច»។ លោក វ៉ុង ដែលនឹងចាកចេញពីប្រទេសនូវែលសេឡង់នៅថ្ងៃសៅរ៍ទី១១តុលា បានទៅបំពេញទស្សនកិច្ចនៅអូស្ត្រាលីកាលពីដើមសប្តាហ៍ ដោយបានយល់ព្រមលើភាពជាដៃគូយុទ្ធសាស្ត្រដ៏ទូលំទូលាយរវាងរដ្ឋធានីកង់បេរ៉ា និងសិង្ហបុរី ដែលនឹងធ្វើឱ្យទំនាក់ទំនងការពារជាតិកាន់តែស៊ីជម្រៅ៕
