បាលត់ទាត់ពិភពលោក៖ ប្រធានក្រុមបាល់ទាត់ជម្រើសជាតិព័រទុយហ្គាល់ គ្រីសស្ទៀណូ រ៉ូណាល់ដូ (Cristiano Ronaldo) បានក្លាយជាកីឡាករបាល់ទាត់ដំបូងគេ ដែលក្លាយខ្លួនជាមហាសេដ្ឋី។ នេះបើយោងតាមសន្ទស្សន៍មហាសេដ្ឋីរបស់ Bloomberg ​​ចុងក្រោយបង្អស់ ដែលបានវាយតម្លៃទ្រព្យសម្បត្តិរបស់កីឡាកររូបនេះមានរហូតដល់ទៅ១,៤ពាន់លានដុល្លារអាម៉េរិក។

ទំហំទ្រព្យសម្បត្តិរបស់ខ្សែប្រយុទ្ធវ័យ៤០ឆ្នាំរូបនេះ បានកើនឡើងយ៉ាងខ្លាំង បន្ទាប់ពីរូបគេចុះហត្ថលេខាលើកិច្ចសន្យាថ្មីជាមួយក្រុម Al-Nassr ក្នុងខែមិថុនា ដែលត្រូវបានគេរាយការណ៍ថា មានតម្លៃជាង៤០០លានដុល្លារអាម៉េរិកឯណោះ។ Bloomberg បានរាយការណ៍ថា រ៉ូណាល់ដូ រកបានច្រើនជាង៥៥០លានដុល្លារសម្រាប់ប្រាក់ខែចន្លោះឆ្នាំ២០០២ ដល់២០២៣ បន្ថែមដោយកិច្ចព្រមព្រៀងរយៈពេល១០ឆ្នាំជាមួយក្រុមហ៊ុនយក្ស Nike មានតម្លៃជិត១៨លានដុល្លារក្នុងមួយឆ្នាំ និងជាដៃគូរជាមួយក្រុមហ៊ុន Armani, Castrol និងផ្សេងៗទៀត ដែលបន្ថែមច្រើនជាង១៧៥លានដុល្លារដល់ទ្រព្យសម្បត្តិរបស់គេ។

ការផ្ទេរពី Manchester United ទៅចូលរួមជាមួយ Al-Nassr ក្នុងឆ្នាំ២០២៣ ធ្វើឱ្យ រ៉ូណាល់ដូ ក្លាយជាកីឡាករមានប្រាក់ខែខ្ពស់បំផុតក្នុងប្រវត្តិសាស្ត្របាល់ទាត់រួចទៅហើយ ជាមួយនឹងប្រាក់បៀវត្សរ៍ប្រចាំឆ្នាំ ២៣៧,៥២លានដុល្លារអាម៉េរិក បូករួមទាំងប្រាក់រង្វាន់ និងភាគហ៊ុន១៥ភាគរយនៅក្នុងក្លឹបអារ៉ាប៊ីសាអូឌីតនេះ។

អត្តពលិកទទួលបានងារជាមហាសេដ្ឋី​ គឺកម្រមានណាស់ ខណៈបច្ចុប្បន្នមានតែកីឡាករបាល់បោះ ម៉ៃឃើល ចូឌែន (Michael Jordan), ម៉ាជីក ចនសុន (Magic Johnson) ឡេប្រុន ជេម (LeBron James) កីឡាករវាយកូនហ្គោល ថៃឃឺ វូដ (Tiger Woods) និងកីឡាករវាយកូនបាល់ រ៉ូជើរ ហ្វេដឺរ័រ (Roger Federer)៕