សុខភាព៖ មនុស្សភាគច្រើនធ្វើការជាមួយកុំព្យូទ័រ ដោយអ្នកខ្លះក្នុងមួយថ្ងៃៗប្រើពេលយូរម៉ោងទៀត។ ដឹងទេថា ការអង្គុយធ្វើការយូរម៉ោងមុខកុំព្យូទ័រអាចបង្កបញ្ហាដល់ភ្នែក ខ្នង និង-ក? ដើម្បីចៀសវាងបញ្ហាទាំងនេះ លោកអ្នកអាចសាកល្បងអនុវត្តតិចនិក៥យ៉ាងនេះ…។
១.សម្រាកពីការងារ៖ ការសម្លឹងកុំព្យូទ័រយូរម៉ោងមិនត្រឹមតែប៉ះពាល់ដល់ភ្នែក និងខ្នងទេ អាចប៉ះពាល់ដល់សុខភាពផ្លូវចិត្ត អាចនឹងមានអារម្មណ៍តប់ប្រមល់ ស្ត្រេស និងហត់ ប្រសិនជាព្យាយាមធ្វើការខ្លាំង។ យកល្អគួរសម្រាក និងបន្ធូរអារម្មណ៍ដោយការលេងហ្គេម ឬអាចឆ្លៀតពេលបន្តិចជជែកជាមួយមិត្តរួមការងារ។ ក្រោយពីធ្វើបែបនេះ អាចមានអារម្មណ៍ប្រសើរឡើង និងអាចផ្ចង់អារម្មណ៍ធ្វើការបន្តទៀត។ ២.រៀបចំតុធ្វើការ៖ កន្លែងដាក់កុំព្យូទ័រសម្រាប់ធ្វើការ គឺសំខាន់សម្រាប់ភ្នែកណាស់ ប្រសិនជាមើលទៅក្រោមពេក យើងអាចឈឺខ្នង និងចុក-ក ហើយបើងើយទៅលើពេក ក៏អាចនឹងមានបញ្ហាភ្នែកស្ងួត។ ដូចនេះ គួរជ្រើសរើសតុសម្រាប់កុំព្យូទ័រ ឬដាក់សៀវភៅកល់ខាងក្រោមកុំព្យូទ័រ ដើម្បីឱ្យភ្នែកមើលទៅអេក្រង់ត្រឹមតែ១០ដឺក្រេ។
៣.ផឹកទឹកឱ្យគ្រប់គ្រាន់៖ ការផឹកទឹកគឺជួយឱ្យសុខភាពល្អ និងអាចជួយសម្រកទម្ងន់ និងបន្ថែមថាមពលដល់រាងកាយ។ ការទទួលទឹកជួយឱ្យយើងងើបពីតុធ្វើការ ដើម្បីទៅដាក់ទឹកបន្ថែម ឬទៅបន្ទប់ទឹក ជាឱកាសឱ្យភ្នែកបានសម្រាកខ្លះ។ ៤.ងើបឡើង និងធ្វើចលនា៖ បញ្ហាឈឺខ្នង ឈឺភ្នែក កើតឡើងមកពីការអង្គុយយូរមុខកុំព្យូទ័រដោយមិនងើបឡើងធ្វើចលនា។ គួរងើបឡើង និងធ្វើចលនាឱ្យបានច្រើនរៀងរាល់មួយម៉ោងម្ដង ដើម្បីឱ្យបានងើបឡើង និងធ្វើចលនាដូចជាការដើរជាដើម។ ការដើរ គឺអាចជួយសម្រួលដល់ចរន្តឈាម បំបាត់ការឈឺខ្នង និង-ក និងអាចដុតកាឡូរីបានទៀត។ ៥.សម្រាកភ្នែក៖ ការសម្លឹងកុំព្យូទ័រយូរអាចធ្វើឱ្យភ្នែកមានបញ្ហា ឈឺក្បាល ឬបញ្ហាសុខភាពផ្សេងទៀត។ ដូចនេះ អាចសម្រាកភ្នែកបន្តិចដោយងាកមើលវត្ថុផ្សេងចម្ងាយយ៉ាងតិច៦ម៉ែត្ររយៈពេល២០វិនាទី។ ក្រៅពីនេះ គួរដំឡើងទំហំអក្សរនៅលើកុំព្យូទ័រឱ្យធំ ដើម្បីងាយស្រួលក្នុងការមើលព្រោះនៅពេលខំប្រឹងមើលភ្នែកនឹងហត់ ហើយក៏មានអាការឈឺក្បាល៕ ដកស្រង់ពី៖ Hello គ្រូពេទ្យ
