រដ្ឋធានីកង់ប៉េរ៉ា៖ បុរសម្នាក់ត្រូវបានឃុំខ្លួន បន្ទាប់ពីបានបើកការបាញ់ប្រហារដល់ទៅ១០០គ្រាប់ ស្រោចទៅលើផ្លូវដ៏មមាញឹកនៅទីក្រុងស៊ីដនី បណ្ដាលឱ្យមនុស្ស ២០នាក់រងរបួស។ នៅថ្ងៃចន្ទទី៦ ខែតុលា ប៉ូលិសអះអាងថា ការបាញ់ប្រហារនេះមិនពាក់ព័ន្ធទៅនឹងអំពើភេរវកម្ម ឬសកម្មភាពក្រុមក្មេងទំនើងទេ...។

ហេតុការណ៍នេះ កើតឡើងកាលពីល្ងាចថ្ងៃអាទិត្យទី៥តុលា នៅតំបន់អ៊ីនណើវេស (Inner West) នៅពេលដែលខ្មាន់កាំភ្លើងបានបាញ់រះទៅលើរថយន្ត និងប៉ូលិស ខណៈមនុស្សម្នារបានរត់ភ័យស្លន់ស្លោ។ ស្នងការប៉ូលិសរដ្ឋញូវសដវ៉ែល New South Wales បានអះអាងថា ខ្មាន់កាំភ្លើងបានបាញ់ចន្លោះពី៥០ទៅ១០០គ្រាប់។ កម្លាំងសមត្ថកិច្ចជាច្រើននាក់ បានចុះទៅទីតាំងកើតហេតុ និងបានបិទផ្លូវ រួចក៏ចាប់ខ្លួនបុរសអាយុ៦០ឆ្នាំម្នាក់ និងរឹបអូស​បាន​កាំភ្លើង​២ដើមនៅ​កន្លែង​កើតហេតុ។ ជន​ជាប់​ចោទ​ ដែលជាខ្មាន់កាំភ្លើង​ត្រូវ​បាន​បញ្ជូន​ទៅ​មន្ទីរពេទ្យ និង​ព្យាបាល​របួស​ក្នុង​ពេល​ចាប់​ខ្លួន។

ប៉ូលិស​បានរាយការណ៍​ថា បុរស​ម្នាក់​បាន​រងរបួសធ្ងន់ធ្ងរ​ដោយ​គ្រាប់កាំភ្លើង​។ ចំណែកឯមនុស្ស១៩នាក់ផ្សេងទៀត ក៏ត្រូវបានបញ្ជូនទៅព្យាបាលនៅមន្ទីរពេទ្យ ក្រោយរងរបួសដោយសារត្រូវគ្រាប់ ឬអំបែងកញ្ចក់ខ្ទាតត្រូវ។ មែនទែនទៅ ការបាញ់ប្រហារទ្រង់ទ្រាយធំនៅអូស្ត្រាលី គឺកម្រមានណាស់។ ការហាមប្រាមប្រើប្រាស់អាវុធស្វ័យប្រវត្តិ និងពាក់កណ្តាលស្វ័យប្រវត្តិ បានកើតឡើងតាំងពីឆ្នាំ១៩៩៦ នៅពេលដែលខ្មាន់កាំភ្លើងម្នាក់បានសម្លាប់មនុស្សចំនួន៣៥នាក់នៅរដ្ឋតាសម៉ានៀ (Tasmania)៕