រាជធានីភ្នំពេញ៖ ក្រុមហ៊ុន Jin Yuan Xi Garment Co., Ltd ជាប្រភេទរោងចក្រកាត់ដេរសម្លៀកបំពាក់ មានទីតាំងស្ថិតនៅភូមិត្រពាំងថ្លឹង២ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ ត្រូវបានក្រសួងបរិស្ថានរកឃើញបានប្រព្រឹត្តល្មើសច្បាប់ ដោយបានដុតកម្ទេចក្រណាត់ ក្នុងច្រវាក់ផលិតកម្មរបស់ខ្លួន បំពុលខ្យល់ល្មើសនឹងច្បាប់ ថែមទាំងមិនអនុវត្តតាមកិច្ចសន្យាការពារបរិស្ថានផងដែរ។ 

ក្រុមការងារអធិការកិច្ច នៃអគ្គនាយកដ្ឋានគាំពារបរិស្ថាន ក្រសួងបរិស្ថាន ដឹកនាំដោយលោក ឡៅ គឹមឈី អនុប្រធានាយកដ្ឋាន កាលពីថ្ងៃទី៤ ខែតុលា ឆ្នាំ២០២៥ បានចុះពិនិត្យ និងរកឃើញក្រុមហ៊ុន Jin Yuan Xi Garment Co., Ltd បានប្រព្រឹត្តផ្ទុយពីច្បាប់។ បើតាមក្រសួងបរិស្ថាន ក្រោយចុះពិនិត្យនៅក្នុងរោងចក្រ ក្រុមការងារជំនាញបានរកឃើញសារធាតុ និង ករណីបង្កឱ្យមានការបំពុលបរិស្ថានមួយចំនួនដូចជា៖ មានសំណល់កម្ទេចក្រណាត់លាយផេះនៅមាត់ឡចំហាយ, មានកន្លែងស្តុកកម្ទេចក្រណាត់ជាប់បន្ទប់ដាក់ឡចំហាយ។ មន្រ្តីជំនាញ ក៏បានធ្វើតេស្ដសារធាតុបំពុលខ្យល់ពីបំពង់ផ្សែងឡចំហាយផងដែរ។ ក្រោយរកឃើញកំហុស ក្រសួងបរិស្ថានសម្រេចចាត់វិធានការ ដោយហាមដាច់ខាតដល់ក្រុមហ៊ុនយកកម្ទេចក្រណាត់ទៅដុតក្នុងឡចំហាយ ទោះក្នុងករណីណាក៏ដោយ។

ក្រុមហ៊ុន Jin Yuan Xi Garment Co., Ltd ត្រូវរងពិន័យអន្តរការណ៍ករណីល្មើសមាត្រា១៥៦ និងមាត្រា៦៩៤ នៃក្រមបរិស្ថាន និងធនធានធម្មជាតិ។ ក្រសួងបរិស្ថាន ក៏តម្រូវឱ្យក្រុមហ៊ុនត្រូវបង់សំណងខូចខាតប៉ះពាល់បរិស្ថាន ខណៈឡចំហាយ ត្រូវដំណើរការប្រព័ន្ធចម្រោះសម្អាតផ្សែងឱ្យបានត្រឹមត្រូវជាប់ជាប្រចាំ។ យ៉ាងណាក៏ដោយ ក្រសួងបរិស្ថាន បានអរគុណដល់ប្រជាពលរដ្ឋ និងប្រព័ន្ធផ្សព្វផ្សាយដែលបានផ្តល់ព័ត៌មាន និងរាយការណ៍ករណីបំពុលបរិស្ថានខាងលើ ព្រោះវាជាការពង្រឹងការអនុវត្តសកម្មភាពដើម្បីកម្ពុជាមានភាពស្អាត តាមរយៈភាពស្អាតលើដី និងភាពស្អាតក្នុងទឹក៕