ខេត្តពោធិ៍សាត់៖ គិតមកត្រឹមម៉ោងប្រមាណ១០ព្រឹកថ្ងៃទី២៩ ខែកញ្ញា ឆ្នាំ២០២៥ កំណាត់ផ្លូវក្នុងតំបន់អន្ទង់អាំង ​ភ្នំ១៥០០ ខេត្តពោធិ៍សាត់ ដែលរងផលប៉ះពាល់ដោយជំនន់ទឹកភ្លៀងបង្កទៅជាការបាក់ដីធ្លាក់បាំងតួផ្លូវ ត្រូវបានបើកឱ្យចរាចរណ៍ឡើងវិញហើយ។ នេះបើតាមការបង្ហោះលើទំព័រហ្វេសប៊ុកលោក ផន រឹម អ្នកនាំពាក្យក្រសួងសាធារណការ និងដឹកជញ្ជូន..។

លោក ផន រឹម បញ្ជាក់តាមរយៈសំណេរដដែលថា កំណាត់ផ្លូវជាតិលេខ៥៥(ចំណុចអន្ទង់អាំង)គីឡូម៉ែត្រPK១៤១+៣០០ ដែលរងការបាក់ច្រោះដីធ្លាក់ភក់ ដើមឈើ និងថ្មលើតួផ្លូវ កាត់ផ្តាច់ចរាចរណ៍រយៈពេលខ្លីចំពោះមធ្យោបាយគ្រប់ប្រភេទ ពេលនេះត្រូវបានបើកដំណើរការឡើងវិញ។ លោកអះអាងបន្ថែមថា ការបើកដំណើរការឡើងវិញនេះ ក្រោយក្រុមការងារជំនាញផ្លូវថ្នល់នៃមន្ទីរសាធារណការខេត្ត ព្រមទាំងអង្គភាពពាក់ព័ន្ធចុះទៅអន្តរាគមន៍ កាយភក់ ដើមឈើ ដី ថ្ម និងកម្ទេចកម្ទីចេញពីលើតួផ្លូវ ព្រមទាំងកាយមុខទឹកឱ្យវិលទៅរកស្ថានភាពដូចដើមវិញ។

សូមរំឭកថា ក្រោយភ្លៀងធ្លាក់ខ្លាំងជាប់ៗគ្នាឥតដាច់ ពលរដ្ឋក្នុងតំបន់បានរាយការណ៍ពីហេតុការណ៍បាកដី ធ្លាក់កាត់ផ្លូវនៅតំបន់អន្ទង់អាំង ផ្លូវជាតិ៥៥ ក្នុងខេត្តពោធិ៍សាត់នៅព្រឹកថ្ងៃ២៩កញ្ញា ឆ្នាំ២០២៥។ ហេតុការណ៍នេះកើតឡើង ស្របពេលដែលកម្ពុជា កំពុងទទួលរងឥទ្ធិពលព្យុះទី២០ឈ្មោះ ប៊ូឡូយ(Bualoi) បណ្តាលឱ្យភ្លៀងធ្លាក់ស្ទើរទូទាំងប្រទេសពី៥០ទៅ៦០ភាគរយ ចាប់ពីថ្ងៃទី២៩កញ្ញា ដល់ថ្ងៃទី១តុលា ឆ្នាំ២០២៥។ នេះបើតាមការព្យាកររបស់ក្រសួងធនធានទឹក និងឧតុនិយមកម្ពុជា៕