ខេត្តត្បូងឃ្មុំ៖ មន្ត្រីគយចល័តខេត្តត្បូងឃ្មុំ ចុះចាប់ម៉ូតូ១៥១គ្រឿង ដែលអាជីវករកំពុងដាក់តាំងលក់៩ទីតាំងផ្សេងគ្នា នៅក្នុងស្រុកមេមត់ ខេត្តត្បូងឃ្មុំ។ បើតាមមន្រ្តីគយ ម៉ូតូទាំងនោះ ត្រូវបាននាំចូលដោយគ្មានពន្ធ..។

លោក រ៉ា បូរ៉ាន់ឌី ព្រះរាជអាជ្ញារងអមសាលាដំបូងខេត្តត្បូងឃ្មុំ បានថ្លែងប្រាប់ SBM News តាមប្រព័ន្ធតេឡេក្រាម នៅព្រឹកថ្ងៃទី២៧ ខែកញ្ញា ឆ្នាំ២០២៥នេះថា ប្រតិបត្តិការចុះបង្ក្រាបនេះធ្វើឡើងកាលពីថ្ងៃទី២៦កញ្ញា ដោយលោកដឹកនាំកម្លាំងសការជាមួយមន្ត្រីគយចល័តផ្ទាល់។ ក្នុងនោះ សមត្ថកិច្ចរកឃើញម៉ូតូគ្មានបង្កាន់ដៃបង់ពន្ធនាំចូលត្រឹមត្រូវចំនួន១៥១គ្រឿង មានទាំងម៉ូតូថ្មី និងម៉ូតូដែលត្រូវបានគេប្រើប្រាស់រួច។ តាមលោកព្រះរាជអាជ្ញារងដដែល ម៉ូតូទាំងនោះត្រូវមន្ត្រីជំនាញប្រមូលយកទៅរក្សាទុកនៅគយចល័តខេត្តត្បូងឃ្មុំ ដើម្បីអនុវត្តទៅតាមនីតិវិធីច្បាប់៕