រាជធានីភ្នំពេញ៖​ ស្ត្រីទី១នៃកម្ពុជា លោកជំទាវបណ្ឌិត ពេជ ចន្ទមុន្នី នៅយប់ថ្ងៃ១៩កញ្ញា បានចេញសារនៅលើគណនីហ្វេសប៊ុកថា (ថ្ងៃ២០កញ្ញានេះ) គឺជាថ្ងៃដែលចេញលទ្ធផលប្រលងបាក់ឌុប នឹងមានអ្នកសប្បាយរីករាយ និងមានអ្នកខកចិត្ត។ លោកជំទាវបណ្ឌិត សូមលើកទឹកចិត្តដល់អ្នកប្រលងធ្លាក់ កុំទាន់អាលមានអារម្មណ៍ថាខកចិត្ត ព្រោះនៅមានឱកាសជាច្រើនទៀតដូចជា ការរៀនយកជំនាញវិជ្ជាជីវៈ ជាដើម...។

ស្ត្រីទី១នៃកម្ពុជា គូសបញ្ជាក់យ៉ាងដូច្នេះថា៖ «ក្មួយៗត្រូវចាំថាឱ្យតែយើងមានជំនាញមួយច្បាស់លាស់ គឺយើងនឹងទទួលបានភាពជោគជ័យជានិច្ច»។ ជាមួយគ្នា លោកជំទាវបណ្ឌិត សូមផ្តាំដលឪពុកម្តាយក៏ដូចជាអាណាព្យាបាល កុំបន្ទោសកូនៗ ប៉ុន្តែត្រូវលេីកទឹកចិត្តកូនៗឱ្យបន្តរៀនយកជំនាញណាមួយ ដើម្បីអនាគតរបស់ពួកគាត់ជាជាងឱ្យពួកគាត់ឈប់រៀន ហើយលោកជំទាវបណ្ឌិត សូមជូនពរបេក្ខជនទាំងអស់ឱ្យមានជោគជ័យក្នុងជីវិត។

សូមជម្រាបថា នៅរសៀល​ថ្ងៃ១៩ ខែកញ្ញា​ ឆ្នាំ២០២៥នេះ ក្រសួងអប់រំ បានចេញផ្សាយថា បេក្ខជនដែលប្រលងបាក់ឌុប ជាប់មានជាង១២,២ម៉ឺននាក់ ស្មើនឹង ៨៤,៥៦ភាគរយ ដោយក្នុងនោះ និទ្ទេស A ជាង៣ពាន់នាក់, និទ្ទេស B ជិត១ម៉ឺននាក់, និទ្ទេស C ជាង២,៨ម៉ឺននាក់។ អ្នកធ្លាក់មានចំនួន១៥,៤៤ភាគរយ។​ គួរដឹងថា ការប្រលងសញ្ញាបត្រមធ្យមសិក្សាទុតិយភូមិ ឬបាក់ឌុប ធ្វើទ្បើងកាលពីថ្ងៃទី២៨-២៩ ខែសីហា កន្លងទៅ ខណៈបេក្ខជនប្រលងនៅឆ្នាំនេះមានចំនួនជាង១៤ម៉ឺន៦ពាន់នាក់៕