ក្រុងសៀមរាប៖ រដ្ឋបាលស្រុកក្រឡាញ់ ខេត្តសៀមរាប ប្រកាសប្រាប់ពលរដ្ឋដែលរស់នៅជិតតំបន់ប្រឈមជំនន់ទឹកភ្លៀង បង្កើនការប្រុងប្រយ័ត្ន ខណៈគិតត្រឹមព្រឹកថ្ងៃទី១៩កញ្ញា ឆ្នាំ២០២៥នេះ ស្ថានភាពស្ទឹងក្រឡាញ់ ស្ថិតក្នុងកម្រិតប្រកាសប្រុងប្រយ័ត្ន និងបន្តកើនឡើងជាបន្តបន្ទាប់..។

លោក សុខ ណារ៉េត អភិបាលស្រុកក្រឡាញ់ ជំរុញឱ្យបងប្អូនប្រជាពលរដ្ឋរស់នៅតាមដងស្ទឹង ក្នុងឃុំតាអាន ឃុំកំពង់ថ្កូវ ឃុំក្រឡាញ់ និងឃុំសំបួរ បង្កើនការប្រុងប្រយ័ត្ន រៀបចំទុកដាក់ទ្រព្យសម្បត្តិ សត្វពាហនៈ មធ្យោបាយ សម្ភារ ត្រៀមបង្កាករណីស្ថានភាពទឹកត្រូវប្រកាសអាសន្ន។ ជាមួយគ្នានេះ លោកបានណែនាំឱ្យអាជ្ញាធរឃុំ បន្តពិនិត្យតាមដានស្ថានភាពទឹក ដករបាំងមុខទឹកគ្រប់ប្រភេទ ដូចជា៖ ធ្នួស ព្រួល អ៊ុយស្បៃមោង សំរាស់ ជាដើម។ល។ ដែលអារាំងស្ទះទឹកបណ្ដាលឱ្យមានការជន់លិច។

លោកអភិបាលស្រុក បញ្ជាក់បន្ថែមថា គិតត្រឹមថ្ងៃទី១៩កញ្ញានេះ ក្រៅពីទំនប់អាងទឹកក្នុងស្រុកក្រឡាញ់ក៏បន្តកើនឡើងដូចគ្នា។ ក្នុងនោះរួមមាន៖ ទំនប់អាងម្កាក់កម្ពស់ទឹក១៦,៩០ម៉ែត្រ កម្រិតប្រកាស១៧,៥០ម៉ែត្រ។ ទំនប់អាងក្សាកកម្ពស់ទឹក២,២០ម៉ែត្រ កម្រិតប្រកាស២,៥០ម៉ែត្រ។ ទំនប់អាងស្ទឹងស្រែង១កម្ពស់ទឹក២៦,៣២ម៉ែត្រ កម្រិតប្រកាស២៧,៥០ម៉ែត្រ និងទំនប់អាងស្ពានស្រែងកម្ពស់ទឹក១៣,៨៩ម៉ែត្រ កម្រិតប្រកាស១៤,៥០ម៉ែត្រ។

សូមជម្រាបថា សម្ពាធទាបដែលកើតនៅសមុទ្ទចិនខាងត្បូងបានវិវត្តទៅជាព្យុះទី១៧ឈ្មោះ «មីតាក» នឹងបោកបក់មកលើកកម្ពុជាតិចតួច ចាប់ពីថ្ងៃទី១៩ ដល់ថ្ងៃទី២១កញ្ញា បង្កឱ្យមានភ្លៀងធ្លាក់លាយទ្បំផ្គររន្ទះ និងខ្យល់កន្ត្រាក់គ្របដណ្ដប់លើផ្ទៃដី ពី៣០ទៅ៥០ភាគរយ។ នេះបើតាមការព្យាកររបស់ក្រសួងធនធានទឹក និងឧតុនិយម។ ស្ថិតក្នុងស្ថានភាពដ៏អាក្រក់នេះ មន្ទីរសាធារណការ និងដឹកជញ្ជូនខេត្តសៀមរាប កាលពីយប់ថ្ងៃ១៨កញ្ញា បានប្រកាសផ្អាកចរាចរណ៍ លើកំណាត់ផ្លូវខេត្ត ៦២-៣(បេងមាលា-ខ្វាវ) ក្នុងភូមិសាស្ត្រស្រុកស្វាយលើ ជាបណ្តោះអាសន្ន រហូតដល់មានការជូនដំណឹងសាជាថ្មី។ ការផ្អាកនេះ ធ្វើឡើងដោយសារស្ថានភាពជំនន់ទឹកភ្លៀងជន់ឡើងខ្លាំង ធ្វើឱ្យលិចលង់ដល់ហេដ្ឋារចនាសម្ព័ន្ធផ្លូវថ្នល់មួយចំនួនក្នុងតំបន់៕