រាជធានីភ្នំពេញ៖ លោកទេសរដ្ឋមន្រ្តី លី ធុច អនុប្រធានទី១នៃអាជ្ញាធរមីន បានគូសបញ្ជាក់ថា ការបោសសម្អាតមីនតាមបណ្ដោយព្រំដែនកម្ពុជា-ថៃ មិនមែនជាបញ្ហាចោទសម្រាប់កម្ពុជានោះឡើយ ប៉ុន្តែអ្វីដែលសំខាន់ គឺតំបន់នោះមិនទាន់មានការឯកភាពគ្នាច្បាស់លាស់នៅឡើយ...។

លោកទេសរដ្ឋមន្រ្តី ថ្លែងបែបនេះក្នុងជំនួបពិភាក្សាការងារជាមួយ លោក Igor Driesmans ប្រធានគណៈប្រតិភូសហគមន៍អឺរ៉ុបប្រចាំកម្ពុជា កាលពីរសៀលថ្ងៃទី១៦ កញ្ញាម្សិលមិញ។ លោកទេសរដ្ឋមន្រ្តី លី ធុច បានជម្រាបប្រាប់លោក Igor Driesmans ថា កិច្ចការបោសសម្អាតមីនមនុស្សធម៌នៅតាមបណ្តោយព្រំដែនកម្ពុជា-ថៃ នៅតែបន្ត ស្របតាមកម្មវិធីដែលបានកំណត់។ កម្ពុជានៅតែបន្តបេសកកម្មនៃសកម្មភាពបោសសម្អាតមីនជាធម្មតា ស្របតាមគោលការណ៍ច្បាប់ និងគោលការណ៍មនុស្សធម៌ ក្រោមគំនិតផ្តួចផ្តើមរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា។ ការបោសសម្អាតមីន ត្រូវផ្តោតសំខាន់ជាអាទិភាពលើតំបន់មានការខណ្ឌសីមាច្បាស់លាស់ ទីកន្លែងដែលមានប្រជាជនរស់នៅ និងទីកន្លែងបម្រើដល់សេដ្ឋកិច្ចសង្គម។

លោកសង្កត់ធ្ងន់ថា៖«ការងារបោសសម្អាតមីនមនុស្សធម៌នៅតាមបណ្តោយព្រំដែនកម្ពុជា-ថៃ មិនមែនចោទជាបញ្ហាចម្បងនោះទេ តែបញ្ហាសំខាន់ គឺតំបន់តាមបណ្តោយព្រំដែនមិនទាន់ទទួលបានការឯកភាពគ្នា និងកំណត់ខណ្ឌសីមាច្បាស់លាស់នៅឡើយរវាងកម្ពុជា-ថៃ»។ បើតាមលោក លី ធុច ជម្លោះប្រដាប់អាវុធបន្ទាប់ពីយោធាថៃចូលឈ្លានពានរយៈពេល៥ថ្ងៃកន្លងទៅ យោធាថៃបានបន្សល់ទុកនូវយុទ្ធភណ្ឌគ្រឿងផ្ទុះយ៉ាងច្រើន និងបង្កផលប៉ះពាល់ជាអវិជ្ជមានយ៉ាងធ្ងន់ធ្ងរដល់ប្រជាពលរដ្ឋស្លូតត្រង់រយៈពេលយូរ។ ជាពិសេស វាបានបង្កើនបន្ទុកបន្ថែមដល់រាជរដ្ឋាភិបាលកម្ពុជា ក្នុងការដោះស្រាយយុទ្ធភណ្ឌគ្រឿងផ្ទុះទាំងនោះ បន្ថែមលើបញ្ហាមីនដែលនៅសេសសល់នៅតាមបណ្តោយព្រំដែន ដែលកម្ពុជាកំពុងយកចិត្តទុកដាក់ និងបោសសម្អាតមីនឱ្យអស់ ដើម្បីសម្រេចបាននូវគោលដៅកម្ពុជាគ្មានមីន៕