សុខភាព៖ ក្រៅពីចំណីអាហារការទទួលទឹក គឺមានសារសំខាន់ណាស់សម្រាប់រាងកាយ លើសពីនេះ បើបានបន្ថែមទឹកឃ្មុំទៅក្នុងទឹកក្ដៅឧណ្ហៗពិសារាល់ថ្ងៃនោះ នឹងផ្តល់ប្រយោជន៍៨យ៉ាងដល់រាងកាយ..។
១.បង្ការជំងឺបេះដូង៖ សារធាតុ flavonoids និងសារធាតុប្រឆាំងអុកស៊ីតកម្មក្នុងទឹកឃ្មុំជួយការពារ និងបន្ថយហានិភ័យ ជំងឺបេះដូង។ ការសិក្សាបង្ហាញថា ទឹកឃ្មុំពន្យឺតដំណើរអុកស៊ីតកម្មនៃខ្លាញ់អាក្រក់នៅក្នុងឈាម ដែលអាចបង្កគ្រោះថ្នាក់ដល់បេះដូង និងឈានទៅរកការគាំងបេះដូង និងជំងឺដាច់សរសៃឈាមក្នុងខួរក្បាល។ ២.ជួយសម្រកទម្ងន់៖ ជាតិស្ករក្នុងទឹកឃ្មុំ គឺខុសពីពពួកស្ករសធម្មតា ព្រោះស្ករក្នុងទឹកឃ្មុំជាស្ករធម្មជាតិ ហើយស្ករធម្មជាតិនេះ អាចជួយមិនឱ្យឃ្លានអាហារដែលមានជាតិស្ករ និងភេសជ្ជៈផ្អែម។ បើអាចផ្លាស់ប្ដូរទម្លាប់ដោយងាកមកពិសាភេសជ្ជៈ ដែលមានជាតិស្ករមកពីទឹកឃ្មុំ គឺល្អជួយបន្ថយកាឡូរី។
៣.បន្ថយឧស្ម័នក្នុងពោះវៀន៖ មានបញ្ហាហើមពោះ ឬមានអារម្មណ៍ថា មានឧស្ម័នក្នុងពោះជាប្រចាំ គួរទទួលទានទឹកក្ដៅឧណ្ហៗលាយជាមួយទឹកឃ្មុំ ព្រោះអាចជួយបន្សាបឧស្ម័នចេញពីពោះវៀន។ ៤.សម្រួលដល់អាការឈឺ-ក៖ ទឹកក្ដៅឧណ្ហៗលាយជាមួយទឹកឃ្មុំ អាចជួយសម្រាលអាការឈឺ-ក។ មួយវិញទៀត ទឹកឃ្មុំជាឱសថធម្មជាតិសម្រាប់ជួយព្យាបាលការឆ្លងមេរោគនៅផ្លូវដង្ហើម និងអាការក្អក។ ៥.រក្សាកម្រិតជាតិស្ករក្នុងឈាម៖ ស្ករក្នុងទឹកឃ្មុំជាស្ករធម្មជាតិដែលជា fructose និង glucose។ ស្ករពីរប្រភេទនេះ អាចជួយរាងកាយរក្សាកម្រិតជាតិស្ករក្នុងឈាម និងបញ្ចុះកូលេស្តេរ៉ូល។
៦.ពង្រឹងប្រព័ន្ធភាពស៊ាំ៖ ទឹកឃ្មុំអាចជួយពង្រឹងប្រព័ន្ធភាពស៊ាំបានយ៉ាងល្អ។ ក្នុងនោះ ទឹកឃ្មុំធម្មជាតិ គឺអាចផ្តល់ប្រយោជន៍កាន់តែច្រើនដល់សុខភាព ដោយសារទឹកឃ្មុំសម្បូរទៅដោយអង់ស៊ីម វីតាមីន និងជាតិរ៉ែ ដែលអាចការពារបាក់តេរីផ្សេងៗ។ ៧.បញ្ចេញជាតិពុល៖ ទឹកក្ដៅឧណ្ហៗលាយជាមួយទឹកឃ្មុំ គឺជាជម្រើសដ៏ល្អ ដើម្បីបញ្ចេញជាតិពុលពីក្នុងខ្លួន។ ដូច្នេះ គួរសាកទទួលទានដើម្បីបានសុខភាពល្អ។ ៨.ស្បែកភ្លឺរលោង៖ ទឹកឃ្មុំ គឺជាសារធាតុប្រឆាំងអុកស៊ីតកម្មធម្មជាតិ ដែលអាចកម្ចាត់នូវកាកសំណល់ផ្សេងៗ ហើយទឹកឃ្មុំក៏ជាសារធាតុប្រឆាំងបាក់តេរី អាចជួយរក្សាស្បែកឱ្យស្អាត និងភ្លឺរលោង។ ដកស្រង់ពី៖ Hello គ្រូពេទ្យ
