រាជធានីភ្នំពេញ៖ លោក ​ស៊ូដានស៊ូ Sudhanshu លេខាធិការនៃអាជ្ញាធរ​អភិវឌ្ឍន៍ការនាំចេញផលិតផលកសិកម្ម ​ និងអាហារកែច្នៃ(APEDA)​ បានបង្ហាញចំណាប់អារម្មណ៍ចង់ពង្រីកការវិនិយោគនៅកម្ពុជា តាមរយៈការបង្កើតរោងចក្រ សម្រាប់កែច្នៃគ្រាប់ស្វាយចន្ទីនៅខេត្តកំពង់ធំ នាំចេញទៅកាន់ទីផ្សារឥណ្ឌា…។

លោក ​ស៊ូដានស៊ូ និងសហការី បានបង្ហាញចំណាប់អារម្មណ៍ដូច្នេះ ក្នុងជំនួបជាមួយ លោក តូច​ ប៊ុនហួរ​ រដ្ឋលេខាធិការក្រសួងកសិកម្ម​ រុក្ខាប្រមាញ់​ និងនេសាទ​ នៅថ្ងៃចន្ទទី៨កញ្ញា ឆ្នាំ២០២៥។ ​ក្នុងឱកាសនោះ លោក តូច​ ប៊ុនហួរ ​បានសម្ដែងការស្វាគមន៍ចំពោះគណៈប្រតិភូឥណ្ឌា ​ ដែលមានបំណងពង្រឹងកិច្ចសហប្រតិបត្តិការទ្វេភាគី​ និងស្វែងរកឱកាសវិនិយោគផលិតផលសក្តានុពលកម្ពុជា ​ តាមរយៈការបង្កើនការនាំចូលគ្រាប់ស្វាយចន្ទីស្រស់​ទៅកាន់ទីផ្សារឥណ្ឌា ពង្រឹងពង្រីកការវិនិយោគលើដំណាំស្វាយចន្ទី ការកែច្នៃ និងការនាំចេញ ដោយបង្កើតរោងចក្រ សម្រាប់កែច្នៃគ្រាប់ស្វាយចន្ទីនៅខេត្តកំពង់ធំ ​ និងពង្រីកការវិនិយោគលើវិស័យកសិកម្មដែលមានសក្តានុពល។ លោកគូសបញ្ជាក់ថា៖«ប្រទេសកម្ពុជា​បើកកទូលាយស្វាគមន៍ដល់អ្នកវិនិយោគទាំងឡាយណា ដែលមានបំណងចង់បង្កើតរោងចក្រកែច្នៃគ្រាប់ស្វាយចន្ទី​ និងនាំចេញទៅកាន់ទីផ្សារអន្តរជាតិ»​។

ក្រសួងកសិកម្មបានឱ្យដឹងដែរថា ក្រោយកិច្ចប្រជុំ គណៈប្រតិភូឥណ្ឌា​ បន្តជួបជាមួយវិស័យឯកជន​​ និងធ្វើទស្សនកិច្ចឆ្ពោះទៅខេត្តកំពង់ធំ​ ដែលជាតំបន់សក្តានុពលស្វាយចន្ទី​ សំដៅបង្កើនការវិនិយោគលើកែថ្នៃគ្រាប់ស្វាយចន្ទី​កម្ពុជា​។ គួរបញ្ជាក់ថា បើតាម លោក តូច​ ប៊ុនហួរ​ កម្ពុជា ជាប្រទេសផលិតគ្រាប់ស្វាយច្រើន មានប្រភេទពូជល្អ គុណភាពខ្ពស់ និងរសជាតិឆ្ងាញ់ ដូចជាប្រភេទពូជ៖ M23 M10 H09 និងIM4។ គួរឱ្យដឹងបន្ថែមថា ចំណាប់អារម្មណ៍នេះ ក៏ធ្វើឡើងស្របពេល ក្រុមហ៊ុន អ៊ែមភល ​អាហ្រ្គោ ប្រដាក់ ជាសហគ្រាសបង្កើតឡើងដោយស្ត្រីខ្មែរ បានផលិតគ្រាប់ស្វាយចន្ទីកែច្នៃសម្រេចទាំងស្រុងប្រមាណ១៤តោន នាំចេញទៅលក់នៅទីផ្សារប្រទេសអ៊ីតាលីជាលើកដំបូងរបស់ខ្លួនដែរ៕