រាជធានីភ្នំពេញ៖ ឯកអគ្គរដ្ឋទូតចិនប្រចាំកម្ពុជា លោក វ៉ាង វិនពីន បានបញ្ជាក់ពីចំណងមិត្តភាពល្អរវាងចិន និង កម្ពុជា ដែលកំពុងបន្តអភិវឌ្ឍទៅមុខឥតឈប់ឈរ ហើយមិនថា បច្ចុប្បន្ននេះ និងអនាគត ចិននៅតែជាដៃគូដែលអាចទុកចិត្តបានរបស់កម្ពុជា...។

«ប្រទេសចិន គឺជាប្រទេសដំបូងគេដែលផ្តល់ជំនួយដល់កម្ពុជា បន្ទាប់កាលពីមានជម្លោះព្រំដែនរវាងកម្ពុជា-ថៃ ចិនក៏ជាប្រទេសដែលបានផ្តល់ជំនួយច្រើនជាងគេផងដែរ»។ នេះជាសាររបស់លោក វ៉ាង វិនពីន ឯកអគ្ករដ្ឋទូតចិនប្រចាំកម្ពុជា ដែលបានបង្ហោះនៅលើទំព័រហ្វេសប៊ុករបស់លោកនៅព្រលប់ថ្ងៃទី២កញ្ញា ឆ្នាំ២០២៥។ សំខាន់ជាងនេះ លោកបានគូសរំលេចថា «ប្រទេសចិន ជាដៃគូដែលអាចទុកចិត្តបានរបស់កម្ពុជាទាំងកាលពីអតីតកាល ទាំងពេលបច្ចុប្បន្នកាល និងអនាគតកាល»។ ទោះជាមានរឿងអ្វីកើតឡើងក៏ដោយ លោក វ៉ាង វិនពីន មានជំនឿជាក់ថា ចំណងមិត្តភាពរវាងចិន និងកម្ពុជា នឹងត្រូវបានបន្តនិងអភិវឌ្ឍបន្ថែមទៀត។ 

ឯកអគ្គរដ្ឋទូតចិនរូបនេះ ក៏បានចូលរួមអបអរសាទរដល់ប្រមុខរាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត ដែលបានចូលរួមដោយជោគជ័យក្នុងកិច្ចប្រជុំរបស់អង្គការសហប្រតិបត្តិការសៀងហៃ (បូក) ដោយលោកកត់សម្គាល់ឃើញថា សំឡេងរបស់ប្រទេសកម្ពុជាកាន់តែខ្លាំងឡើងៗនៅលើឆាកអន្តរជាតិ ហើយ។ «កម្ពុជា ស៊ូៗ» នេះជាសារផ្ដល់កម្លាំងចិត្តរបស់លោក វ៉ាង វិនពីន ឯកអគ្គរដ្ឋទូតចិនប្រចាំកម្ពុជា ជូនចំពោះថ្នាក់ដឹកនាំ និងប្រជាជនកម្ពុជា។

ជម្រាបថា ចិនជាប្រទេសមួយក្នុងចំណោមប្រទេសជាច្រើនទៀត ដែលបានរួមចំណែកជួយអភិវឌ្ឍប្រទេសកម្ពុជា។ ចុងក្រោយនេះ មហាយក្សចិនដែលជាមិត្តដែកថែបរបស់កម្ពុជា ក៏បានប្រកាសផ្ដល់ជំនួយមនុស្សធម៌ចំនួន២០លានយ័ន ឬស្មើប្រមាណជិត៣លានដុល្លារអាម៉េរិកដល់កម្ពុជា ដើម្បីជួយសម្រួលទុក្ខលំបាករបស់ប្រជាពលរដ្ឋដែលរងគ្រោះ ក្នុងជម្លោះព្រំដែនវាងកម្ពុជា-ថៃ៕