រាជធានីភ្នំពេញ៖ ប្រមុខរាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត នាយករដ្ឋមន្រ្តី កាលពីរសៀលថ្ងៃទី២៨សីហា បានជួបពិភាក្សាការងារជាមួយគណៈប្រតិភូសភាអាម៉េរិក អំពីការពង្រឹង និងពង្រីកកិច្ចសហប្រតិបត្តិការលើវិស័យសំខាន់ៗទ្វេភាគី ជាពិសេសផ្នែកសន្ដិសុខ និងការពារជាតិ...។

តាមរយៈជំនួបផ្ទាល់មុខ ជាមួយមេដឹកនាំកម្ពុជានៅរាជធានីភ្នំពេញ ក្នុងវិមានសន្តិភាព គណៈប្រតិភូសភាអាម៉េរិក ដឹកនាំដោយ លោកស្រី បេដ វេញដាញ (Beth Van Duyne) សមាជិកសភាប្រចាំរដ្ឋតិចសាស, លោកវេជ្ជបណ្ឌិត រីឆាដ ម័គកូមិក (Richard McCormick) សមាជិក​សភាប្រចាំរដ្ឋចចជៀរ និង​លោក​ ស៊ូហាស សាប្រានៀម (Suhas Subraanyam) សមាជិក​សភា​ប្រចាំរដ្ឋ​វឺជីញ៉ា។ ក្នុងជំនួបនោះ សម្ដេចធិបតីនាយករដ្ឋមន្រ្តី មានប្រសាសន៍ប្រាប់ប្រតិភូអាម៉េរិក អំពីស្ថានភាពព្រំដែនកម្ពុជា-ថៃ ការអនុវត្តបទឈប់បាញ់ សំដៅឈានទៅរកការស្តារឡើងវិញនូវទំនាក់ទំនងរវាងប្រទេសទាំងពីរ។ ត្រង់ចំណុចនេះ គណៈប្រតិភូ​សភាអាម៉េរិក បានបញ្ជាក់ពីជំហររបស់​សហរដ្ឋអាម៉េរិក ក្នុង​ការគាំទ្រ​បទឈប់បាញ់​ និង​វិលទៅរកសន្តិភាព​ និង​ស្ថិរភាពឡើងវិញ​ ហើយសហរដ្ឋ​អាម៉េរិកនឹង​បន្តយកចិត្តទុកដាក់តាមដានលើការងារនេះ។

ភាគីទាំងពីរបានគូសរំលេច៖«អំពីការពង្រឹង ពង្រីកកិច្ចសហប្រតិបត្តិការលើវិស័យសំខាន់ៗរវាងប្រទេសទាំងពីរ ដូចជា វិស័យសន្ដិសុខ និងការពារជាតិ ការប្រយុទ្ធប្រឆាំងនឹងបទល្មើសឆ្លងដែន និងការធ្វើមាតុភូមិនិវត្តន៍ពលរដ្ឋកម្ពុជា ពីសហរដ្ឋអាម៉េរិកមកកម្ពុជាជាដើម»។ ក្រៅតែពីបានពិភាក្សាលើផ្នែកសន្ដិសុខ និងការពារជាតិ សភាអាម៉េរិកបានកោតសរសើរ និងវាយតម្លៃខ្ពស់ ចំពោះការរីកចម្រើនលើកំណើនសេដ្ឋកិច្ចប្រកបដោយភាពធន់ ការធានាបាននូវស្ថិរភាពម៉ាក្រូសេដ្ឋកិច្ច អត្រាអតិផរណាទាប ដែលកម្ពុជាសម្រេចបានក្នុងរយៈពេលប៉ុន្មានទសវត្សរ៍នេះ តាមរយៈកិច្ចខិតខំប្រឹងប្រែងរបស់រាជរដ្ឋាភិបាល ក្នុងការដាក់ចេញនូវគោលនយោបាយសំខាន់ៗ ដើម្បីទាក់ទាញវិនិយោគិនបរទេស។ លោកស្រី បេដ វេញដាញ បានសម្ដែងនូវការពេញចិត្តចំពោះវឌ្ឍនភាពនៃទំនាក់ទំនងអាម៉េរិក-កម្ពុជា ជាពិសេសលើវិស័យពាណិជកម្ម និងវិនិយោគ។ លោកស្រី ក៏បានគូសបញ្ជាក់ពីការប្ដេជ្ញាចិត្តរបស់លោកស្រី ដើម្បីចូលរួមចំណែកដល់ការពង្រឹង និងពង្រីកទំនាក់ទំនងប្រទេសទាំងពីរ ឱ្យកាន់តែល្អប្រសើរថែមទៀត។

ជាការឆ្លើយតប សម្ដេចធិបតីនាយករដ្ឋមន្ត្រី បានថ្លែងអំណរគុណដល់រដ្ឋាភិបាលសហរដ្ឋអាម៉េរិក ដែលបានសម្រេចទម្លាក់អត្រាពន្ធលើការនាំចូលទំនិញពីកម្ពុជា។ សម្ដេចក៏បានគូសរំលេចអំពីគោលនយោបាយ និងការដាក់ចេញកែទម្រង់សំខាន់ៗរបស់រាជរដ្ឋាភិបាលកម្ពុជា ដូចជា ការធ្វើសម្រួលនីតិវិធីនៃការចុះបញ្ជីវិនិយោគឱ្យកាន់តែមានប្រសិទ្ធភាពជាងមុន ការរៀបចំវេទិការាជរដ្ឋាភិបាល-ផ្នែកឯកជន ដើម្បីដោះស្រាយបញ្ហាប្រឈម និងសំណូមពររបស់វិស័យឯកជន ការដាក់ចេញនូវគោលនយោបាយការវិនិយោគ ជាក់ស្ដែង ក៏ដូចជាកញ្ចប់វិធានការលើកទឹកចិត្តនានា សំដៅទាក់ទាញវិនិយោគិនបរទេសមកកម្ពុជា ឱ្យកាន់តែច្រើនថែមទៀត៕