រាជធានីបាងកក៖ រដ្ឋមន្ត្រីក្រសួងការពារជាតិស៊ុយអែត បញ្ជាក់ពីសិទ្ធិរបស់ប្រទេសថៃក្នុងការប្រើប្រាស់យន្តហោះចម្បាំង Gripen សម្រាប់តែការពារខ្លួន និងជំរុញឱ្យបន្ធូរបន្ថយភាពតានតឹងនៅតាមបណ្តោយព្រំដែនរវាងកម្ពុជា-ថៃ...។
រដ្ឋមន្ត្រីការពារជាតិស៊ុយអែត លោក ផាល ចនសុន (Pål Jonson) បានអះអាងថា ប្រទេសថៃ មានសិទ្ធិស្របច្បាប់ក្នុងប្រតិបត្តិការយន្តហោះចម្បាំង Gripen សម្រាប់ការពារខ្លួនក្រោមច្បាប់អន្តរជាតិ បន្ទាប់ពីចុះហត្ថលេខាលើកិច្ចព្រមព្រៀងទិញ Gripen នាពេលថ្មីៗនេះ។ លើសពីនេះ លោកក៏បានលើកទឹកចិត្តទាំងថៃ និងកម្ពុជា ឱ្យបន្ធូរបន្ថយភាពតានតឹងក្នុងតំបន់ផងដែរ។ លោក ចនសុន គូសបញ្ជាក់ថា កិច្ចព្រមព្រៀងនេះ នឹងពង្រឹងកិច្ចសហប្រតិបត្តិការផ្នែកសន្តិសុខ ហើយការប្រើប្រាស់បក្សីចម្បាំង Gripen របស់ប្រទេសថៃ គឺគោរពយ៉ាងពេញលេញជាមួយច្បាប់អន្តរជាតិ ប្រសិនបើប្រទេសនេះ ប្រកាន់ខ្ជាប់នូវកាតព្វកិច្ចផ្លូវច្បាប់របស់ខ្លួន។ លោកបានបន្ថែមថា ការផ្តល់សំណងនៃកិច្ចព្រមព្រៀងដែលចុះហត្ថលេខាដោយក្រុមហ៊ុនស៊ុយអែត Saab នឹងមានអត្ថប្រយោជន៍សង្គមកាន់តែទូលំទូលាយ ដោយពង្រីកដល់វិស័យអប់រំ ការស្រាវជ្រាវ និងការអភិវឌ្ឍ និងវិស័យកសិកម្ម។
តើលោកអ្នកដឹងទេ...? លោក ចនសុន បានលើកឡើងដោយកាន់ជើងថៃ ថា ទាក់ទិននឹងស្ថានការណ៍ព្រំដែនកម្ពុជា-ថៃ កងទ័ពអាកាសថៃ បានដាក់ពង្រាយយន្តហោះ Gripen ហើយស៊ុយអែតគោរពចំពោះប្រតិបត្តិការស្វ័យការពាររបស់ប្រទេសថៃ។ ប៉ុន្តែយ៉ាងណា លោកបានអំពាវនាវ ទាំងប្រទេសថៃ និងកម្ពុជា គួរតែធ្វើការរួមគ្នាដើម្បីកាត់បន្ថយភាពតានតឹង និងអនុញ្ញាតឱ្យគណៈកម្មាធិការសង្កេតការណ៍អាស៊ាន ជួយកាត់បន្ថយការប៉ះទង្គិចរវាងប្រទេសទាំង២។ ជាក់ស្តែង លោករដ្ឋមន្រ្តីការពារជាតិស៊ុយអែតរូបនេះ មិនបានបញ្ជាក់អំពីសកម្មភាពយោធាថៃប្រើប្រាស់ យន្តហោះចម្បាំង Gripen មកឈ្លានពានកម្ពុជាឡើយ។ នេះស-បញ្ជាក់ឱ្យឃើញថា ច្បាប់មានតែក្នុងក្រដាសកិច្ចព្រមព្រៀងទិញ-លក់តែប៉ុណ្ណោះ។
គួររំឭកថា ប្រទេសថៃកាលពីថ្ងៃចន្ទទី២៥សីហា បានចុះហត្ថលេខាលើកិច្ចសន្យាជាមួយប្រទេសស៊ុយអែត ទិញយន្តហោះចម្បាំង Gripen E/F ចំនួន៤គ្រឿងនៅក្នុងដំណាក់កាលទី១ ដែលមានតម្លៃ១៩,៥ពាន់លានបាត ឬស្មើនឹងប្រមាណជាង៥៥០ លានដុល្លារ។ កិច្ចសន្យានេះ ត្រូវបានចុះហត្ថលេខាដោយអគ្គមេបញ្ជាការទ័ពអាកាសថៃ (RTAF) លោក ភុនភក្តី ផាត់នៈកុល និងលោក មីកែល ហ្គ្រេនហូល (Mikael Granholm) អគ្គនាយករដ្ឋបាលសម្ភារការពារជាតិស៊ុយអែត (FMV) និងដោយមានរដ្ឋមន្ត្រីក្រសួងការពារជាតិស៊ុយអែត លោក ប៉ាល់ ចនសុន (Pal Jonson) ជាសាក្សីផងដែរ៕
