រាជធានីភ្នំពេញ៖ ទីភ្នាក់ងារអាល្លឺម៉ង់ សម្រាប់កិច្ចសហប្រតិបត្តិការបច្ចេកទេស(GIZ) តាមរយៈគម្រោង GIZ FABRIC Cambodia បានប្រគល់ឧបករណ៍បច្ចេកទេស ៤៥គ្រឿងដល់ ក្រសួងការងារ និងបណ្តុះបណ្តាលវិជ្ជាជីវៈទុកឱ្យមន្ត្រីជំនាញអធិការកិច្ច ប្រើប្រាស់ពេលចុះធ្វើអធិការកិច្ចពាក់ព័ន្ធនឹងអនុលោមភាព នៃលក្ខខណ្ឌសុវត្ថិភាព និងសុខភាពការងារ(OSH) នៅតាមសហគ្រាស និងគ្រឹះស្ថាននានា…។
ឧបករណ៍បច្ចេកទេសដែលគម្រោង GIZ FABRIC Cambodia ប្រគល់មកកាន់ក្រសួងការងារនាពេលនេះរួមមាន៖ ឧបករណ៍កំណត់សញ្ញាណឧស្ម័នពុលក្នុងបរិយាកាស និងឧបករណ៍ចាប់យកសារធាតុគ្រោះថ្នាក់នៅក្នុងខ្យល់,ឧបករណ៍វាស់កម្រិតសំឡេង, ឧបករណ៍វាស់កម្រិតសំឡេងរំខាន, ឧបករណ៍វាស់កម្រិតពន្លឺ, ឧបករណ៍វាស់បរិយាការណ៍កម្តៅ។ ពិធីប្រគល់ និងទទួលនេះ ធ្វើឡើងកាលពីថ្ងៃទី២៦សីហា នៅទីស្ដីការក្រសួង ដោយ លោក សោម ចំណាន រដ្ឋលេខាធិការក្រសួងការងារ មន្ត្រីអធិការកិច្ចផ្នែកសុវត្ថិភាព និងលោក Anwer Hasso នាយកគម្រោង GIZ FABRIC Cambodia ព្រមទាំងក្រុមការងារសម្របសម្រួលនៃគម្រោង។
ថ្លែងនាឱកាសនោះ លោក សោម ចំណាន បានវាយតម្លៃខ្ពស់ចំពោះគម្រោងGIZ FABRIC Cambodia ដែលបន្តកិច្ចសហប្រតិបត្តិការយ៉ាងជិតស្និទ្ធជាមួយក្រសួងការងារ ហើយទទួលបាននូវវឌ្ឍនភាព និងសមិទ្ធផលជាច្រើន សម្រាប់ការរួមចំណែកដល់ការពង្រឹងប្រព័ន្ធអធិការកិច្ចការងារនៅកម្ពុជា ឱ្យកាន់តែមានសមត្ថភាព តម្លាភាព ប្រសិទ្ធភាព និងទទួលបានការជឿជាក់ពីគ្រប់ភាគីពាក់ព័ន្ធទាំងអស់។ លោកបន្ថែមថា ឧបករណ៍បច្ចេកទេសនេះ ពិតជាមានសារសំខាន់ និងចាំបាច់ ដើម្បីពង្រឹងការអនុវត្តច្បាប់ និងលិខិតបទដ្ឋានគតិយុត្តពាក់ព័ន្ធវិស័យការងារ ជាពិសេសការធ្វើឱ្យប្រសើរឡើងនូវអនុលោមភាពលក្ខខណ្ឌសុវត្ថិភាព និងសុខភាពការងាររបស់បងប្អូនកម្មករនិយោជិត៕
