ក្រុងសៀមរាប៖ ក្នុងពេលចុះពិនិត្យការប្រមូលផលស្រូវនៅស្រុកសូទ្រនិគម និងស្រុកជីក្រែង ខេត្តសៀមរាប លោក ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានស្នើដល់ម្ចាស់រោងម៉ាស៊ីនកិនស្រូវទាំងអស់ ជួយប្រមូលទិញស្រូវពីប្រជាកសិករក្នុងតម្លៃមួយសមរម្យ ដែលអាចទទួលយកបានទាំងសងខាង…។
មន្រ្តីក្រសួងកសិកម្ម កាលពីយប់ថ្ងៃទី១៣សីហា បានគូសបញ្ជាក់ថា ក្នុងឱកាសចុះពិនិត្យការប្រមូលផលស្រូវ លោករដ្ឋលេខាធិការ បានណែនាំឱ្យមន្ត្រីជំនាញ និងមន្រ្តីកសិកម្មឃុំ-សង្កាត់ បន្តផ្តល់ការគាំទ្របច្ចេកទេស និងផ្សព្វផ្សាយអំពីស្ថានភាពតម្លៃស្រូវតាមទីផ្សារជូនប្រជាកសិករ។ ជាមួយគ្នានេះ លោករដ្ឋលេខាធិការ ក៏បានលើកទឹកចិត្ត និងជំរុញបងប្អូនប្រជាកសិករ ឱ្យចូលរួមចងក្រងជាសហគមន៍កសិកម្មទំនើប ដាំដុះនូវពូជស្រូវយុទ្ធសាស្ត្ររបស់ជាតិរួមមាន៖ ស្រូវសែនក្រអូប ផ្ការំដួល និងចំប៉ីស៧០ ព្រោះពូជស្រូវទាំងនេះ មានតម្រូវការក្នុងទីផ្សារ។ លោកបញ្ជាក់ថា ការដាំដុះស្រូវតាមការចុះកិច្ចសន្យាទិញលក់ទុកជាមុន កាត់បន្ថយការចំណាយលើជី-ថ្នាំកសិកម្ម និងទទួលបានផលចំណេញច្រើន។
សូមជម្រាបថា ការចុះពិនិត្យតាមដានវឌ្ឍនភាពនៃផលិតកម្មដំណាំស្រូវរបស់ប្រជាកសិករ ឃើញថា មន្រ្តីកសិកម្មតែងចុះទៅជាក់ស្តែង កាលពីថ្ងៃទី១២សីហាកន្លងទៅ មន្ត្រីក្រសួងកសិកម្ម ក៏បានចុះទៅស្រុកចំនួន៣ក្នុងខេត្តតាកែវដូចជា ស្រុកសំរោង ស្រុកព្រៃកប្បាស និងស្រុកអង្គរបុរីផងដែរ៕
