ក្រុងសំរោង៖ លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន កាលពីយប់ថ្ងៃទី៣០កក្កដា បានឱ្យដឹងថា មន្រ្តីជំនាញបានចុះពិនិត្យផ្លូវក្នុងខេត្តឧត្តរមានជ័យ រកឃើញ ផ្លូវជាតិលេខ៥៨ ផ្លូវជាតិលេខ៦៨ និងផ្លូវលេខ២៥៦៧ បានរងការខូចខាតដោយគ្រាប់ផ្លោងកាំភ្លើងធំ និងអាវុធធុនធ្ងន់របស់ទាហានថៃ…។
អ្នកនាំពាក្យសាធារណការ បានគូសបញ្ជាក់ថា ផ្លូវរងការខូចខាតនោះស្ថិតក្នុងភូមិសាស្ត្រស្រុកបន្ទាយអំពិល និងក្រុងសំរោង រួមមាន ផ្លូវជាតិលេខ៥៨ ពីព្រំប្រទល់ខេត្តបន្ទាយមានជ័យ-វង្វង់មូលផ្អុង ក្រុងសំរោង មានករណីគ្រាប់កាំភ្លើងធំផ្លោងធ្លាក់ចន្លោះគីទ្បូម៉ែត្រ ១១៨+៥០០ ដល់ គីទ្បូម៉ែត្រ ១៦៣+៣០០ ធ្លុះបេតុងស្ពាន២ម៉ែត្រការ៉េ។ រីឯ ផ្លូវជាតិលេខ៦៨ ព្រំប្រទល់សៀមរាប-អូរស្មាច់ មានករណីគ្រាប់កាំភ្លើងធំផ្លោង ចន្លោះគីទ្បូម៉ែត្រ ៩០+០០០ ដល់ គ.ម១០៤+០០០។ ដោយទ្បែក ផ្លូវខេត្តលេខ ២៥៦៧ គោកមន-ប្រាសាទតាមាន់ មានករណីគ្រាប់កាំភ្លើងធំផ្លោង៧ករណី ចន្លោះគីទ្បូម៉ែត្រ ១៥+០០០ ដល់ គីទ្បូម៉ែត្រ ២២+០០០។
អ្នកនាំពាក្យបន្ថែមថា ចំពោះផ្លូវជាតិលេខ៥៦ គឺនៅមានសុវត្ថិភាពអាចធ្វើដំណើរបានធម្មតា លើកលែងតែកំណាត់ផ្លូវខាងលើត្រូវការជួសជុលសិន។ សូមជម្រាបថា មិនមែនមានតែផ្លូវក្នុងខេត្តឧត្តរមានជ័យ ដែលរងការខូចខាតដោយសារគ្រាប់កាំភ្លើងធំធ្លាក់ ជាក់ស្តែង កាលពីថ្ងៃទី២៩កក្កដាកន្លងទៅ ក្រុមការងារមន្ទីរសាធារណការ និងដឹកជញ្ជូនខេត្តព្រះវិហារ បានចុះពិនិត្យលម្អិតខ្សែផ្លូវក្នុងភូមិសាស្ត្ររកឃើញមាន ផ្លូវខេត្តលេខ ២៦២៨ (ច្រកតាថាវ) និងផ្លូវខេត្តលេខ ២PVH៥ (ជាំក្សាន្ត-អានសេះ) បានរងការខូចខាតផងដែរ ៕
