រដ្ឋធានីវៀងច័ន្ទន៍៖ របាយការណ៍នៃការបាញ់ប្រហារគ្នារវាងកងកម្លាំងឡាវ និងកងប្រដាប់អាវុធកម្ពុជា គឺមិនពិតនោះទេ។ នេះបើយោងតាមប្រភពពីកងទ័ពប្រជាជនឡាវ រាយការណ៍ទៅសារព័ត៌មានស៊ីនហួរ កាលពីថ្ងៃទី២៦ខែកក្កដាម្សិលមិញ...។
សារព័ត៌មានកងទ័ពប្រជាជនឡាវ បានបញ្ជាក់ថា ខ្លួនមិនមានរបាយការណ៍ផ្លូវការណាមួយ ទាក់ទងនឹងឧបទ្ទវហេតុនេះទេ។ នៅព្រឹកថ្ងៃដដែល ប្រព័ន្ធផ្សព្វផ្សាយមួយចំនួនបានរាយការណ៍ថា យោធាឡាវ បានចេញសេចក្តីជូនដំណឹងជាបន្ទាន់មួយ ដោយអះអាងថា មានការបាញ់ប្រហារគ្នាយ៉ាងខ្លាំងក្លារវាងកងកម្លាំងឡាវ និងកងប្រដាប់អាវុធកម្ពុជា ដែលត្រូវបានចោទប្រកាន់ថា បានឆ្លងដែនខុសច្បាប់។ យោងតាមរបាយការណ៍កាឡៃទាំងនោះ គឺមនុស្ស១០នាក់ត្រូវបានចាប់ខ្លួន និងដកហូតអាវុធ ដោយមានរូបថតនៃសេចក្តីថ្លែងការណ៍ដែលបានភ្ជាប់មកជាមួយ។ យ៉ាងណា តាមការផ្ទៀងផ្ទាត់ រូបថតនោះ ត្រូវបានរកឃើញថា ចេញពីសេចក្តីថ្លែងការណ៍របស់កងកម្លាំងប្រតិបត្តិការពិសេសយោធាខេត្តចម្ប៉ាស័ក ដែលបានរៀបរាប់លម្អិតថា ក្នុងអំឡុងពេលមានការប៉ះទង្គិចគ្នារវាងកងកម្លាំងថៃ និងកម្ពុជា ចាប់ពីថ្ងៃទី២៤ដល់ថ្ងៃទី២៥ ខែកក្កដា គ្រាប់កាំភ្លើងធំចំនួន១០គ្រាប់ បានធ្លាក់ទៅលើទឹកដីឡាវ។ សេចក្តីថ្លែងការណ៍នោះ ក៏បានកត់សម្គាល់ផងដែរថា មិនច្បាស់ថា ភាគីណាបានបាញ់គ្រាប់ផ្លោងនោះទេ។
អនុរដ្ឋលេខាធិការ និងជាអ្នកនាំពាក្យក្រសួងការពារជាតិកម្ពុជា ឧត្តមសេនីយ៍ឯក ម៉ាលី សុជាតា បានថ្លែងនៅក្នុងសន្និសីទសារព័ត៌មានថា៖«អាជ្ញាធរឡាវ មិនទាន់បានចោទប្រកាន់ ឬបើកការស៊ើបអង្កេតលើករណីនេះនៅឡើយទេ ប៉ុន្តែភាគីថៃបែរជាចោទប្រកាន់កម្ពុជា»។ លោកស្រីបន្ថែមថា កងទ័ពកម្ពុជាបានបើកការវាយប្រហារតបត ដោយផ្តោតតែលើមូលដ្ឋានយោធាថៃប៉ុណ្ណោះ។ លោកស្រី សុជាតា ក៏បានច្រានចោលរបាយការណ៍របស់សារព័ត៌មានថៃ ដែលថាកម្ពុជាបានគំរាមប្រើមីស៊ីលរយៈចម្ងាយឆ្ងាយ PHL-03 ដើម្បីវាយប្រហារប្រទេសថៃផងដែរ។
យោធាភូមិភាគទី២ របស់ប្រទេសថៃ កាលពីថ្ងៃសៅរ៍ បានបង្ហោះសារតាមប្រព័ន្ធផ្សព្វផ្សាយសង្គមទាំងងងឹតងងុលថា គ្រាប់ផ្លោងដែលធា្លក់ទៅលើប្រទេសឡាវ អំឡុងពេលមានការប៉ះទង្គិចគ្នានៅតាមព្រំដែនកម្ពុជា-ថៃ ដូចដែលបានរាយការណ៍ដោយប្រព័ន្ធផ្សព្វផ្សាយមួយចំនួន គឺបានមកពីកងកម្លាំងកម្ពុជា។ លើសពីនេះ ទូរទស្សន៍ប៉ុស្តិ៍លេខ៧របស់ប្រទេសថៃ បានរាយការណ៍បន្ថែមថា មានការប៉ះទង្គិចគ្នារវាងប្រទេសថៃ និងកម្ពុជា គ្រាប់កាំភ្លើងធំចំនួន១០គ្រាប់ បានធ្លាក់ចូលទឹកដីឡាវ ដោយបានបំផ្លាញផ្ទះជនស៊ីវិល។ គួរបញ្ជាក់ថា បច្ចុប្បន្ន ភាគីពាក់ព័ន្ធកំពុងស៊ើបអង្កេត និងផ្ទៀងផ្ទាត់ប្រភពនៃសំបកគ្រាប់ឆ្លងដែន៕
