រាជធានីភ្នំពេញ៖ ត្រឹមរយៈពេល៣សប្តាហ៍ដំបូងនៃខែកក្កដា ឆ្នាំ២០២៥នេះ អាជ្ញាធរ បានបណ្តេញជនជាតិវៀតណាមចំនួន៣៤៨នាក់ចេញពីប្រទេសកម្ពុជា តាមប៉ុស្តិ៍នគរបាលច្រកទ្វារព្រំដែនអន្តរជាតិនានា ក្រោយរកឃើញថា ជនជាតិវៀតណាមទាំងនោះ លួចសម្ងំលាក់ខ្លួនប្រព្រឹត្តការងារល្មើសច្បាប់នៅកម្ពុជា...។

តាមការស្រង់ទិន្នន័យដែលផ្សព្វផ្សាយដោយ អគ្គនាយកដ្ឋានអន្តោប្រវេសន៍ គិតចាប់ពីថ្ងៃទី៣រហូតដល់ថ្ងៃទី១៩កក្កដា នាយកដ្ឋានស៊ើបអង្កេត និងអនុវត្តនីតិវិធី បានបណ្តេញជនជាតិវៀតណាមចេញពីកម្ពុជាចំនួន៥លើក។ ក្នុងនោះរួមមានលើកទី១. ចំនួន៣៨នាក់ (ស្រី១១នាក់), លើកទី២.ចំនួន៦៥នាក់ (ស្រី៧នាក់), លើកទី៣.ចំនួន៤៥នាក់ (ស្រី១០នាក់), លើកទី៤.ចំនួន៣៩នាក់ (ស្រី១១នាក់) និងលើទី៥.ចំនួន១៦១នាក់ (ស្រី២៨នាក់)។ ជនជាតិវៀតណាម ដែលត្រូវបណ្តេញចេញក្នុងខែកក្កដានេះ គឺត្រូវបានរកឃើញថា លួចឆ្លងដែនខុសច្បាប់ លួចស្នាក់នៅធ្វើការងារខុសច្បាប់ ទាំងមានលិខិតឆ្លងដែន និងគ្មានលិខិតឆ្លងដែន ខណៈខ្លះទៀតជួញដូរដោយខុសច្បាប់នូវសារធាតុញៀន ហើយត្រូវបានអាជ្ញាធរកម្ពុជាឃាត់ខ្លួន អនុវត្តទោសចប់ទើបបណ្តេញចេញទៅប្រទេសកំណើតវិញនាពេលនេះ។

បើតាមលោកឧត្តមសេនីយ៍ឯក សុខ វាសនា អគ្គនាយកនៃអគ្គនាយកដ្ឋានអន្តោប្រវេសន៍ ក្នុងរយៈពេល៦ខែ ឆ្នាំ២០២៥ មានជនបរទេសជិត៥ពាន់នាក់ស្មើនឹង៨៨សញ្ជាតិ ត្រូវបានអគ្គនាយកដ្ឋានអន្តោប្រវេសន៍អនុវត្តនីតិវិធីបណ្ដេញចេញពីប្រទេសកម្ពុជា ទៅកាន់ប្រទេសកំណើតរៀងៗខ្លួន ក្រោយរកឃើញប្រព្រឹត្តបទល្មើសលួចឆ្លងដែន ចូលមកធ្វើការងារដោយខុសច្បាប់ ឬប្រព្រឹត្តបទល្មើសនានា។ កម្ពុជា បានបង្កើនការរឹតបន្តឹងច្បាប់អន្តោប្រវេសន៍ ដោយអនុវត្តយ៉ាងម៉ឺងម៉ាត់ លើករណីជាអាទិ៍៖ ការឆ្លងដែនចូលមកដោយខុសច្បាប់ ការស្នាក់នៅហួសសុពលភាព ការលួចធ្វើការដោយគ្មានច្បាប់អនុញ្ញាត និងការប្រើប្រាស់ឯកសាររដ្ឋបាលដោយក្លែងបន្លំជាដើម។ ដូចប្រទេសនានាដែរ រាល់ជនបរទេសប្រព្រឹត្តបទល្មើស អគ្គនាយកដ្ឋានអន្តោប្រវេសន៍ បានអនុវត្តនីតិវិធីបណ្ដេញចេញ និងខ្លះទៀតដាក់ចូលបញ្ជីខ្មៅមិនឱ្យមកជាន់ដីកម្ពុជាទៀតឡើយ៕