រដ្ឋធានីវ៉ាស៊ីនតោន៖ លោកប្រធានាធិបតីសហរដ្ឋអាម៉េរិក ដូណាល់ ត្រាំ បានបញ្ជាឱ្យសហរដ្ឋអាម៉េរិក ដកខ្លួនចេញពីទីភ្នាក់ងារវប្បធម៌របស់អង្គការសហប្រជាជាតិ ឬអង្គការយូណេស្កូ (UNESCO)​ សាជាថ្មី...។

សេតវិមាន បានប្រកាសពីការសម្រេចចិត្តនេះ កាលពីថ្ងៃទី២២កក្កដា ដោយបញ្ជាក់ថា វានឹងចូលជាធរមាននៅថ្ងៃទី៣១ ខែធ្នូ ឆ្នាំ២០២៦។ អ្នកនាំពាក្យសេតវិមាន លោកស្រី អាន់ណា ខេលី (Anna Kelly) បានថ្លែងយ៉ាងដូច្នេះថា៖«ប្រធានាធិបតីត្រាំ បានសម្រេចចិត្តដកសហរដ្ឋអាម៉េរិកចេញពីអង្គការយូណេស្កូ ដែលគាំទ្រដល់វប្បធម៌ និងសង្គមបែកបាក់គ្នា ដែលផ្ទុយនឹងគោលនយោបាយ ដែលប្រជាជនអាម៉េរិកបោះឆ្នោតជ្រើសរើសកាលពីខែវិច្ឆិកា»។ ក្រសួងការបរទេស បានលើកឡើងថា ការបន្តសមាជិកភាពរបស់សហរដ្ឋអាម៉េរិក មិនស្ថិតនៅក្នុងផលប្រយោជន៍ជាតិនោះទេ ដោយបានចោទប្រកាន់ទីភ្នាក់ងារនេះ ពីការលើកកម្ពស់របៀបវារៈនៃការអភិវឌ្ឍសកលនិយម ផ្ទុយនឹងគោលនយោបាយការបរទេស America First។ ក្រសួងបន្តថា ការសម្រេចចិត្តឆ្នាំ២០១១ របស់ទីភ្នាក់ងារ ក្នុងការទទួលស្គាល់ប៉ាឡេស្ទីនជារដ្ឋសមាជិក គឺមានបញ្ហាជាខ្លាំង ហើយបានរួមចំណែកដល់វោហាសាស្ត្រប្រឆាំងនឹងអ៊ីស្រាអែល។

នេះ​ជា​លើក​ទី​ពីរ​ហើយ​ដែល​លោក ត្រាំ បាន​ដក​អាម៉េរិក​ចេញ​ពី​អង្គការយូណេស្កូ ដោយ​បាន​ធ្វើ​ដូច្នេះ​ ក្នុង​ឆ្នាំ២០១៧ ជុំវិញ​កង្វល់​ស្រដៀង​គ្នា​នេះ។ គួររំឭកថា សហរដ្ឋអាម៉េរិក បានដកខ្លួនចេញពីអង្គការយូណេស្កូ លើកដំបូងក្នុងឆ្នាំ១៩៨៤ ក្រោមការដឹកនាំរបស់លោក រ៉ូណាល់ រីហ្គែន (Ronald Reagan) ដោយលើកឡើងពីការគ្រប់គ្រងហិរញ្ញវត្ថុមិនត្រឹមត្រូវ និងការលម្អៀងប្រឆាំងនឹងអាម៉េរិក។ អាម៉េរិក បានចូលជាសមាជិកវិញនៅឆ្នាំ២០០៣ ក្រោមការដឹកនាំរបស់លោក ចច វ៉កឃើរ ប៊ូស (George Walker Bush)។ បច្ចុប្បន្ន អង្គការយូណេស្កូ បានចុះបញ្ជីបេតិកភណ្ឌពិភពលោកចំនួន២៦នៅសហរដ្ឋអាម៉េរិក រួមទាំងរូបសំណាកតំណាងសេរីភាព ក្នុងចំណោមទីតាំងពិភពចំនួន១២៤៨ ដែលមានតម្លៃជាសកល៕