ក្រុងបាត់ដំបង៖ ស្របពេលកម្ពុជា សម្រេចផ្អាកការនាំចូលបន្លែ-ផ្លែឈើពីប្រទេសថៃ សន្ទុះនៃការគាំទ្រ បន្លែ-ផ្លែឈើក្នុងស្រុកបានហក់ឡើងគួរឱ្យកត់សម្គាល់ ខណៈមានការជំរុញបន្ថែមពីអាជ្ញាធរតំបន់ តាមរយៈការបង្កើត«ព្រឹត្តិការណ៍ផ្លែឈើខេត្តបាត់ដំបង»។ ជាក់ស្តែង ត្រឹមរយៈពេលបីថ្ងៃដំបូងនៃព្រឹត្តិការណ៍នេះ ផ្លែទុរេនជិត៣០តោនត្រូវបានលក់អស់ ដោយមិនរាប់បញ្ចូលចំនួនផ្លែឈើ និងផលិតផលក្នុងស្រុកឯទៀត...។

បើតាមមន្ទីរទេសចរណ៍ខេត្តបាត់ដំបងបញ្ជាក់ថា នៅថ្ងៃទី៣០មិថុនានេះ ទោះស្ថិតក្នុងថ្ងៃដំបូងនៃព្រឹត្តិការណ៍ មានភ្លៀងធ្លាក់ខ្លាំងក៏ពិតមែន ប៉ុន្តែសន្ទុះនៃការចូលរួមពីពលរដ្ឋជិតឆ្ងាយនៅតែមានច្រើនកុះករ។ ក្នុងនោះ តាមរយៈព្រឹត្តិការណ៍ «ផ្លែឈើខេត្តបាត់ដំបង២០២៥» ដែលទើបតែរៀបចំឡើងជាលើកដំបូង មានភ្ញៀវជាតិ និងអន្តរជាតិ មកកម្សាន្តយ៉ាងច្រើន ហើយចូលរួមគាំទ្រកសិផលដែលដាំដុះដោយកសិករខ្មែរនៅក្នុងស្រុក។ របាយការណ៍ពីមន្ទីរកសិកម្មខេត្តបង្ហាញថា ថ្ងៃទី២៧មិថុនា ជាថ្ងៃបើកព្រឹត្តិការណ៍ មានម្ចាស់ចម្ការទុរេនចំនួន១៨ចម្ការនាំយកផ្លែទុរេនខ្លួនមកលក់ ហើយបានលក់អស់ជាង៧តោន ដែលស្មើនឹង៧៣៥០គីឡូក្រាម។

ដោយឡែក នៅថ្ងៃទី២៨មិថុនា មានសហគមន៍កសិកម្ម និងម្ចាស់ចម្ការចំនួន១០ ចូលរួម ហើយបានលក់ទុរេនអស់ជាង១០តោន ស្មើនឹង១០៥២០គីឡូក្រាម បូករួមទាំងផ្គត់ផ្គង់ក្នុងស្តង់ប៊ូហ្វេ។ រីឯថ្ងៃទី២៩មិថុនា សហគមន៍កសិកម្ម និងម្ចាស់ចម្ការសរុបចំនួន១២ បានបន្តយកទុរេនមកលក់អស់ជាង៩តោនទៀត ដែលស្មើនឹង ៩៤៧០គីឡូក្រាម បូករួមទាំងផ្គត់ផ្គង់ក្នុងស្តង់ប៊ូហ្វេដូចគ្នា។ «ព្រឹត្តិការណ៍ផ្លែឈើបាត់ដំបង២០២៥» គឺជាព្រឹត្តិការណ៍ដែលរៀបចំឡើងជាលើកដំបូង ដើម្បីផ្តល់ឱកាសដល់ បងប្អូនម្ចាស់ចម្ការ បន្លែ-ផ្លែឈើ និងជាអ្នកផលិត ផលិតផលផ្សេងក្នុងខេត្តបាត់ដំបង អាចយកផលិតផលមកតាំងបង្ហាញលក់ នៅទីកន្លែងដែលត្រូវបានរៀបចំជូនយ៉ាងសមរម្យ។ ម៉្យាងវិញទៀតព្រឹត្តិការណ៍នេះ ធ្វើឡើងក៏ដើម្បីទាញទាញភ្ញៀវទេសចរឱ្យមកលេងខេត្តបាត់ដំបង នារដូវកាលបៃតង និងរដូវផ្លែឈើនេះផងដែរ។

បើតាមមន្ទីរទេសចរណ៍ ព្រឹត្តិការណ៍នេះ អាចនឹងត្រូវបានរៀបចំជារៀងរាល់ឆ្នាំ និងជាគំរូមួយ ក្នុងការរៀបចំព្រឹត្តិការណ៍ផ្សេងៗទៀតទៅតាមរដូវកាល។ លើសពីនេះ វាក៏អាចក្លាយជាអត្តសញ្ញាណមួយរបស់ខេត្តបាត់ដំបងផងដែរ។ សូមរំឭកថា រដ្ឋបាលខេត្តបាត់ដំបង កាលពីថ្ងៃទី២៦មិថុនា បានប្រកាសរៀបចំ «ព្រឹត្តិការណ៍ផ្លែឈើបាត់ដំបង២០២៥» រយៈពេល៧ថ្ងៃ ពោលគឺចាប់ពីថ្ងៃទី២៧មិថុនាដល់ថ្ងៃទី៣កក្កដា ឆ្នាំ២០២៥ នៅបរិវេណទីធ្លារមុខសាលាខេត្តបាត់ដំបង។ ព្រឹត្តិការណ៍នេះ មានការតាំងលក់បន្លែផ្លែឈើចម្រុះដែលសុទ្ធសឹងជាស្នាដៃអ្នកបាត់ដំបងរួមជាមួយស្តង់លក់ទុរេន សាវម៉ាវ មង្ឃុត ផ្លែប័រ ដូងខ្ទិះ ក្រូចថ្លុង ក្រូចពោធិ៍សាត់ ម្នាស់ ម្រេច និងផលិតផលផ្លែឈើជាច្រើនប្រភេទដែលដាំដុះក្នុងខេត្ត។​ បន្ថែមពីនោះ រដ្ឋបាលខេត្ត ក៏បានរៀបចំឱ្យមានប៊ូហ្វេទុរេនរយៈពេល៣ថ្ងៃ ចាប់ពីថ្ងៃទី២៧-២៩មិថុនា ឆ្នាំ២០២៥ផងដែរ៕