រាជធានីភ្នំពេញ៖ ចាប់ពីថ្ងៃទី២៦ ដល់ថ្ងៃទី២៨ ខែមិថុនា ឆ្នាំ២០២៥ កម្ពុជានឹងមានភ្លៀងធ្លាក់លាយឡំជាមួយផ្គរ រន្ទះ និងខ្យល់កន្ត្រាក់លើផ្ទៃដីប្រមាណជាង ៣០ភាគរយ ដោយសារទទួលរងឥទ្ធិពលព្យុះទី២ក្នុងឆ្នាំ២០២៥។ នេះបើតាមការព្យាកររបស់ក្រសួងធនធានទឹក និងឧតុនិយម…។

ក្រសួងអះអាងថា៖«ព្យុះទី២ក្នុងឆ្នាំ២០២៥ ដែលមានឈ្មោះ សេពផេត (Sepat) នៅបន្តមានឥទ្ធិពលលើសម្ពាធទាប គ្របដណ្ដប់លើសមុទ្រចិនខាងត្បូង សមុទ្រអានដាមម៉ែន ឈូងសមុទ្រថៃ អាងទន្លេមេគង្គ លើរបបខ្យល់មូសុងនិរតី និងកម្ពុជា»។ យ៉ាងណា ក្រសួងអះអាងថា ព្យុះសេពផេតនេះពុំមានឥទ្ធិពលខ្លាំងមកលើព្រះរាជាណាចក្រកម្ពុជានោះទេ។ ប៉ុន្តែនឹងធ្វើឱ្យស្ថានភាព តំបន់វាលទំនាប មានខ្យល់បក់មកពីទិសនិរតីនិងអាគ្នេយ៍មានល្បឿនមធ្យម៥ម៉ែត្រក្នុង១វិនាទី។

ខេត្តបន្ទាយមានជ័យ បាត់ដំបង ពោធិ៍សាត់ កំពង់ឆ្នាំង សៀមរាប កំពង់ធំ កំពង់ចាម ត្បូងឃ្មុំ ព្រៃវែង កណ្តាល តាកែវ ស្វាយរៀង និងភ្នំពេញ អាចមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់គ្របដណ្ដប់លើផ្ទៃដី៣០ភាគរយ។ រី​ឯតំបន់ខ្ពង់រាប មានខ្យល់បក់មកពីទិសនិរតីនឹងអាគ្នេយ៍មានល្បឿនមធ្យម៤ម៉ែត្រក្នុង១វិនាទី។ ខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី ជួរភ្នំដងរែក និងតំបន់ជួរ ភ្នំក្រវាញ អាចមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់គ្របដណ្ដប់លើផ្ទៃដី ៣៥ភាគរយ។

ដោយឡែក តំបន់មាត់សមុទ្រ មានខ្យល់បក់មកពីទិសនិរតីនិងបស្ចិម មានល្បឿនមធ្យម៣ម៉ែត្រក្នុង១វិនាទី។ ខេត្តកោះកុង ព្រះសីហនុ កំពត កែប និងជួរភ្នំបូកគោ អាចមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់គ្របដណ្ដប់លើផ្ទៃដី ៣០ភាគរយ ។ រលកសមុទ្រមានកម្ពស់មធ្យមអប្បបរមា០,៥០ម៉ែត្រនិងកម្ពស់មធ្យមអតិបរមា ១,៥០ម៉ែត្រ។ គួរជម្រាបថា«សេពផេត»ជាឈ្មោះព្យុះទីពីរ ហើយដែលមានឥទ្ធិពលបោកបក់តិចតួចចូលមកកម្ពុជា បន្ទាប់ពីព្យុះ«វូទីព» អស់ឥទ្ធិពល និងក្លាយទៅជាសម្ពាធទាបគ្របដណ្ដប់លើសមុទ្ទចិនខាងត្បូងតាំងតែពីថ្ងៃទី១៧មិថុនា៕