រាជធានីបាងកក៖ នាយករដ្ឋមន្ត្រីថៃ លោកស្រី ផែថងថាន ឈិនៈវ័ត កាលពីថ្ងៃអង្គារទី២៤មិថុនា បានច្រានចោលការចោទប្រកាន់ដែលថាការបិទព្រំដែនធ្វើឡើងក្រោមហេតុផលនយោបាយ ដោយទទូចថា រាជរដ្ឋាភិបាលបានអនុវត្តវិធានការជំនួយសម្រាប់សហគមន៍ព្រំដែន...។

ថ្លែងបន្ទាប់ពីកិច្ចប្រជុំគណៈរដ្ឋមន្ត្រីប្រចាំសប្តាហ៍ លោកស្រី ផែថងថាន បានបញ្ជាក់ជាថ្មីថា ការបិទច្រកព្រំដែនមិនមានហេតុផលនយោបាយទេ ប៉ុន្តែមានគោលបំណងកាត់បន្ថយផលប៉ះពាល់សាធារណៈ និងការពារផលប្រយោជន៍ជាតិ។ លោកស្រី​បញ្ជាក់​ថា រាជរដ្ឋាភិបាល​ បាន​រៀបចំ​វិធានការ​ផ្តល់​ជំនួយ​គ្រប់​ជ្រុងជ្រោយ​​សម្រាប់​សហគមន៍​ព្រំដែន ជា​ពិសេស​ទាក់ទង​នឹង​ពាណិជ្ជកម្ម​កសិកម្ម។ ស្តីពីបញ្ហាសន្តិសុខជាតិ និងថាមពល លោកស្រី ផែថងថាន បាននិយាយថា ក្រសួងថាមពលបានរៀបចំផែនការបន្ទាន់ ដើម្បីរក្សាបម្រុងថាមពល ហើយនឹងដាក់ចេញវិធានការគាំទ្រក្នុងករណីមានការខ្វះខាត ឬឡើងថ្លៃ។

ទន្ទឹមគ្នានោះ ដើម្បីដោះស្រាយបញ្ហាប្រឈមផ្នែកសេដ្ឋកិច្ច និងហិរញ្ញវត្ថុ រួមទាំងបំណុលគ្រួសារ លោកស្រីបានណែនាំក្រសួងហិរញ្ញវត្ថុឱ្យកំណត់គោលដៅច្បាស់លាស់ និងអនុវត្តវិធានការជាក់ស្តែង ដើម្បីគាំទ្រដល់ប្រជាពលរដ្ឋ និងអាជីវកម្មគ្រប់លំដាប់ថ្នាក់ ដោយផ្តោតលើការជំរុញសេដ្ឋកិច្ចមូលដ្ឋាន។ ទាក់ទិននឹងការធ្លាក់ថ្លៃកសិផល លោកស្រី ផែថងថាន បាននិយាយថា ក្រសួងពាណិជ្ជកម្ម និងកសិកម្មត្រូវបានប្រគល់ភារកិច្ចឱ្យដោះស្រាយបញ្ហាជាបន្ទាន់ ជាពិសេសតម្លៃស្រូវធ្លាក់ចុះ។ មិនត្រឹមតែប៉ុណ្ណោះ នាយករដ្ឋមន្ត្រីរូបនេះ ក៏បានលើកឡើងពីការព្រួយបារម្ភចំពោះការរត់ពន្ធទំនិញខុសច្បាប់ពីប្រទេសជិតខាង ដែលលោកស្រីថា កំពុងធ្វើឱ្យតម្លៃកសិផលក្នុងស្រុកធ្លាក់ចុះ។ លោក​ស្រី​បាន​អំពាវនាវ​ឱ្យ​មាន​វិធានការ​ច្បាស់លាស់ និង​ម៉ឺងម៉ាត់ ដើម្បី​ដោះស្រាយ​បញ្ហា។ 

ជុំវិញបញ្ហាគ្រឿងញៀន លោកស្រីបានបញ្ជាឱ្យក្រសួងការពារជាតិ សហការជាមួយអភិបាលខេត្ត និងស្នងការនគរបាលទូទាំងប្រទេស ដើម្បីអនុវត្តវិធានការប្រឆាំងគ្រឿងញៀនឱ្យបានច្បាស់លាស់។ ងាកមកវិស័យទេសចរណ៍វិញ លោកស្រីបានផ្តាំផ្ញើដល់ក្រសួងទេសចរណ៍ និងកីឡា ឱ្យពិនិត្យឡើងវិញនូវវិធានការជំរុញការធ្វើដំណើរទាំងក្នុង និងក្រៅប្រទេសឱ្យបានឆាប់រហ័ស ដើម្បីធានាបាននូវសុវត្ថិភាព និងសុវត្ថិភាពជូនភ្ញៀវទេសចរ និងប្រជាពលរដ្ឋក្នុងស្រុក។ ជាចុងក្រោយ លោកស្រីបានជំរុញឱ្យក្រសួងការងារពន្លឿនដំណើរការដំឡើងប្រាក់ឈ្នួលអប្បបរមាឱ្យទាន់ពេលវេលា ដើម្បីអនុវត្តឱ្យបានមុនខែកក្កដា៕