ក្រុងប៉ោយប៉ែត៖ យោធាថៃបានប្រកាសបិទច្រកព្រំដែនទាំងអស់ជាមួយកម្ពុជា ជាឯកតោភាគី ដោយអនុញ្ញាតឱ្យមានការឆ្លងដែនចេញ-ចូលបានតែលើផ្នែកមនុស្សធម៌ (អ្នកជំងឺ) និងសិស្សសាលាប៉ុណ្ណោះ។ ជាក់ស្តែង នៅរសៀលថ្ងៃអង្គារទី២៤មិថុនានេះ សង្គ្រោះបឋមក្រុងប៉ោយប៉ែតដែលមានលោក នួន នីគីដា ជាប្រធាន បានដឹកនាំក្រុមការងារជួយសង្គ្រោះស្ត្រីជនជាតិថៃចំនួនពីរនាក់ឆ្លងដែនជូលទៅសង្គ្រោះអាយុជីវិតនៅឯប្រទេសថៃ និងបាននាំយកស្ត្រីជនជាតិខ្មែរពីរនាក់ពីផ្សាររុងគ្លឿចូលមកកម្ពុជាវិញ។

លោក នួន នីគីដា បានថ្លែងប្រាប់សហការីអង្គភាពសារព័ត៌មាន SBM News ប្រចាំនៅខេត្តបន្ទាយមានជ័យថា ច្រកទ្វារអន្តរជាតិបានបិទក៏ពិតមែន តែសម្រាប់សិស្សសាលា និងអ្នកជំងឺ គឺនៅអាចចេញ-ចូលឆ្លងដែនបាន។ សម្រាប់ថ្ងៃនេះ លោក និងក្រុមការងារបានបញ្ជូនស្ត្រីជនជាតិថៃមានផ្ទៃពោះពីរនាក់(មានបញ្ហារលូតកូន) ចូលទៅសង្គ្រោះអាយុជីវិតនៅឯប្រទេសថៃ និងបានយកស្ត្រីអ្នកជំងឺខ្មែរចេញពីផ្សាររុងគ្លឿមកព្យាបាលនៅក្នុងប្រទេសកម្ពុជាវិញ ហើយលោកសង្ឃឹមថា អ្វីៗនឹងល្អប្រសើរឡើងវិញចំពោះទំនាក់ទំនងនៃប្រទេសទាំងពីរ ដែលមានបញ្ហាជម្លោះព្រំដែនជាមួយគ្នានាពេលនេះ។ សូមសណ្តាប់កិច្ចសម្ភាសន៌រវាង លោក នួន នីគីដា ជាមួយអង្គភាពសារព័ត៌មាន SBM News ដូចតទៅ.........៖