មជ្ឈិមបូព៌ា៖ បណ្តាប្រទេសជុំវិញពិភពលោក មិនថាតូច ឬធំ បាននិងកំពុងរង់ចាំមើលការឆ្លើយតបរបស់អ៊ីរ៉ង់ បន្ទាប់ពីសហរដ្ឋអាម៉េរិកបានវាយប្រហារឥតត្រាប្រណីលើទីតាំងនុយក្លេអ៊ែរអ៊ីរ៉ង់សំខាន់ៗចំនួន៣។ បងធំអាម៉េរិក បានចូលដៃចូលជើងជាមួយអ៊ីស្រាអែលប្រឆាំងនឹងសាធារណរដ្ឋអ៊ិស្លាមនិយម...។
អ៊ីរ៉ង់សច្ចាប្តេជ្ញាការពារខ្លួនមួយថ្ងៃបន្ទាប់ពីស្តេចឥន្ទ្រីអាម៉េរិក ហោះត្រដាងស្លាបសំគាំងកណ្តាលលម្ហមេឃា ទម្លាក់គ្រាប់បែកទម្ងន់១៣៦០៧គីឡូក្រាម ទៅលើទីតាំងនុយក្លេអ៊ែរធំៗរបស់អ៊ីរ៉ង់ ដែលលាក់ខ្លួនពួនអាត្មានៅខាងក្រោមភ្នំ ខណៈមេដឹកនាំអាម៉េរិកព្រមានឱ្យរដ្ឋធានីតេហេរ៉ង់លត់ជង្គង់សុំចុះចាញ់។ ប្រធានាធិបតីសហរដ្ឋអាម៉េរិក ដូណាល់ ត្រាំ បានលើកឡើងពីគំនិតនៃការផ្លាស់ប្ដូររបបដឹកនាំនៅក្នុងប្រទេសអ៊ីរ៉ង់ថា៖«ការផ្លាស់ប្តូររបបនយោបាយ វាមិនត្រឹមត្រូវទេ ប៉ុន្តែប្រសិនបើរបបតេហេរ៉ង់បច្ចុប្បន្នមិនអាចធ្វើឱ្យអ៊ីរ៉ង់មានភាពអស្ចារ្យឡើងវិញបានទេ ហេតុអ្វីមិនមានការផ្លាស់ប្តូររបបនេះ?..»។ លោក ត្រាំ ក៏បានអះអាងថា៖«នេះគឺជាជោគជ័យខាងយោធាដ៏អស្ចារ្យ។ កន្លែងផលិតនុយក្លេអែរសំខាន់ៗរបស់អ៊ីរ៉ង់ ត្រូវបានបំផ្លាញចោលទាំងស្រុង»។
ជាងនេះ លោក ត្រាំ បានអំពាវនាវឱ្យអ៊ីរ៉ង់បោះបង់ចោលគំនិតចង់សងសឹក បើមិនដូច្នោះទេ ការវាយប្រហារកាន់តែធំ និងបំផ្លិចបំផ្លាញជាងនេះ។ ជុំវិញរឿងរ៉ាវខាងលើ អង្គការឃ្លាំមើលនុយក្លេអ៊ែររបស់អង្គការសហប្រជាជាតិ (ទីភ្នាក់ងារថាមពលអាតូមិកអន្តរជាតិ) បានបង្ហាញថា មិនមានការភាយកម្រិតវិទ្យុសកម្មនៅខាងក្រៅរោងចក្រថាមពលនុយក្លេអ៊ែរនោះទេ។ ថ្លែងនៅក្នុងទីក្រុងអ៊ីស្តង់ប៊ុល រដ្ឋមន្ត្រីការបរទេសអ៊ីរ៉ង់ លោក អាបបាស អារ៉ាក់ឈី (عباس عراقچی) បានអះអាងថា អ៊ីរ៉ងនឹងពិចារណារាល់ការឆ្លើយតបដែលអាចកើតមាន ដោយលោកសង្កត់ធ្ងន់ថា៖«សហរដ្ឋអាម៉េរិកមិនគោរពច្បាប់អន្តរជាតិទេ[..]»។ យ៉ាងណា រដ្ឋមន្ត្រីការបរទេសអាម៉េរិក លោក ម៉ាកូ រ៉ូប៊ីអូ បានលើកឡើងថា៖«គ្មានប្រតិបត្តិការយោធាដែលបានគ្រោងទុកផ្សេងទៀតប្រឆាំងនឹងអ៊ីរ៉ង់ទេ លុះត្រាតែអ៊ីរ៉ង់នៅតែគឃ្លើន»។
ក្រុមប្រឹក្សាសន្តិសុខអង្គការសហប្រជាជាតិ បានជួបប្រជុំគ្នាកាលពីថ្ងៃអាទិត្យទី២២ ខែមិថុនា ដើម្បីពិភាក្សាអំពីការវាយប្រហាររបស់សហរដ្ឋអាម៉េរិក ខណៈរុស្ស៊ី ចិន និងប៉ាគីស្ថាន បានស្នើឱ្យមានបទឈប់បាញ់ជាបន្ទាន់ និងដោយគ្មានលក្ខខណ្ឌនៅមជ្ឈិមបូព៌ា។ លើសពីនេះ អគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គូតេរ៉ែស បានប្រាប់ក្រុមប្រឹក្សាសន្តិសុខ ថា ការទម្លាក់គ្រាប់បែករបស់អាម៉េរិកលើអ៊ីរ៉ង់ គឺជាចំណាត់ការដ៏គ្រោះថ្នាក់មួយនៅក្នុងតំបន់ ហើយបានជំរុញឱ្យបញ្ឈប់ការប្រយុទ្ធ និងត្រឡប់ទៅការចរចាលើកម្មវិធីនុយក្លេអ៊ែររបស់អ៊ីរ៉ង់វិញ។
ក្រោយការវាយប្រហារដ៏ប្រល័យលើអ៊ីរ៉ង់ ក្រសួងសន្តិសុខសហរដ្ឋអាម៉េរិកបានព្រមានអំពីបរិយាកាសគំរាមកំហែងកាន់តែខ្លាំងនៅក្នុងប្រទេស ដោយលើកឡើងពីលទ្ធភាពនៃការវាយប្រហារតាមអ៊ីនធឺណិត ឬអំពើហិង្សានានា។ ក្រុមអនុវត្តច្បាប់នៅក្នុងទីក្រុងធំៗរបស់សហរដ្ឋអាម៉េរិក បានបង្កើនការល្បាតដោយផ្តោតលើទីកន្លែងសាសនា វប្បធម៌ និងការទូត។ លើសពីនេះ ក្រសួងការបរទេសអាម៉េរិកបានចេញសេចក្តីព្រមានសុវត្ថិភាពសម្រាប់ពលរដ្ឋអាម៉េរិកទាំងអស់នៅបរទេស ជាពិសេសនៅទូទាំងតំបន់មជ្ឈិមបូព៌ា។ រហូតមកដល់ពេលនេះ រដ្ឋធានីតេហេរ៉ង់ នៅមិនទាន់បានអនុវត្តការសងសឹកប្រឆាំងនឹងសហរដ្ឋអាម៉េរិកនោះទេ ទាំងការកំណត់គោលដៅមូលដ្ឋានសហរដ្ឋអាម៉េរិក ឬការរារាំងលើការផ្គត់ផ្គង់ប្រេងពិភពលោក ប៉ុន្តែសាធារណរដ្ឋអ៊ីស្លាមមួយនេះប្រហែលជាទប់កំហឹងមិនជាប់ទេ។
ភ្លើងជម្លោះនៅមជ្ឈិមបូព៌ា កំពុងឆាបឆេះយ៉ាងសន្ធោសន្ធៅ។ ជាក់ស្តែង អ៊ីរ៉ង់-អ៊ីស្រាអែល បានបន្តការវាយប្រហារដោយប្រើមីស៊ីល ខណៈយន្តហោះចម្បាំងអ៊ីស្រាអែល បានវាយប្រហារគោលដៅយោធានៅភាគខាងលិចប្រទេសអ៊ីរ៉ង់ ហើយអ៊ីរ៉ង់ បានបាញ់មីស៊ីលស្រោចលើររដ្ឋធានីហ្សេរ៊ុយសាឡិម និងទីក្រុងតែលអាវីវ ដែលបណ្ដាលឱ្យមនុស្សជាច្រើននាក់ស្លាប់ និងរងរបួស។ ជាចុងក្រោយ អាជ្ញាធរអ៊ីរ៉ង់បានបញ្ជាក់ថា មនុស្សជាង៤០០នាក់ត្រូវបានសម្លាប់ ចាប់តាំងពីការវាយប្រហាររបស់អ៊ីស្រាអែលលើរដ្ឋធានីតេហេរ៉ង់៕
