រដ្ឋធានីបាងកក៖ កងទ័ពភូមិន្ទថៃ បានបដិសេធការអះអាងរបស់កម្ពុជា ដែលថា ទាហានថៃបានរំលោភលើអធិបតេយ្យភាព និងបូរណភាពទឹកដីរបស់កម្ពុជា ដោយការជីកលេណដ្ឋាន(ត្រង់សេ) និងការលុកលុយផ្សេងៗតាមជើងគោក។ នេះបើតាមការចុះផ្សាយរបស់កាសែតបាងកកប៉ុស្តិ៍ កាលពីថ្ងៃទី១៨ ខែមិថុនា...។
ការគ្រវីក្បាលបដិសេធពីសំណាក់ភាគីថៃ កើតឡើងក្រោយក្រសួងការពារជាតិកម្ពុជាអះអាងនៅក្នុងរបាយការណ៍ថា ភាគីថៃមិនបានគោរពកិច្ចព្រមព្រៀងទេ ហើយថែមទាំងបានបង្កើនសកម្មភាព ដែលផ្ទុយទៅនឹងអនុស្សរណៈនៃការយោគយល់គ្នាឆ្នាំ២០០០ (MoU 2000) រវាងប្រទេសទាំងពីរ។ ក្រសួងការពារជាតិកម្ពុជា បានអះអាងបន្ថែមថា ភាគីថៃ បានបង្ហោះយន្តហោះគ្មានមនុស្សបើកជាច្រើន ជីកលេណដ្ឋាន ចល័តកងទ័ព និងបង្កើនអាវុធជំនួយជាច្រើនប្រភេទ សាងសង់ហេដ្ឋារចនាសម្ព័ន្ធ និងពង្រាយកងទ័ពបន្ថែមនៅតាមព្រំដែនក្នុងខេត្តព្រះវិហារ និងខេត្តឧត្តរមានជ័យ។ ចំណាត់ការទាំងនេះគឺជាការគំរាមកំហែងយ៉ាងធ្ងន់ធ្ងរដល់សន្តិភាព និងសន្តិសុខនៃប្រទេសទាំងពីរ។
ជុំវិញរឿងនេះ អ្នកនាំពាក្យរងកងទ័ពភូមិន្ទថៃ(RTAF) លោក សុរៈសាន់ គង់សិរី (สุรสันต์ คงสิริ) បានឆ្លើយតបវិញថា យោធាថៃប្រកាន់ខ្ជាប់នូវពិធីសារអន្តរជាតិ ហើយសកម្មភាពទាំងអស់ គឺស្របតាមMoUឆ្នាំ២០០០។ លោកបន្តថា សកម្មភាពទាំងអស់នេះត្រូវបានធ្វើឡើងក្នុងដែនអធិបតេយ្យរបស់ប្រទេសថៃ ហើយការកែលម្អផ្នែកផ្សេងៗ និងប្រតិបត្តិការរបស់កងកម្លាំងយោធានៅក្នុងតំបន់ទាំងនោះ គឺជាការអនុវត្តយោធាស្ដង់ដារ ដែលទាមទារឱ្យមានការអភិវឌ្ឍ ដើម្បីពង្រឹងសន្តិសុខ។
ចំពោះផលប៉ះពាល់នៃការហាមប្រាមរបស់កម្ពុជា លើការនាំចូលកសិផលពីប្រទេសថៃនោះ ក្រសួងពាណិជ្ជកម្មកំពុងព្យាយាមបន្ធូរបន្ថយផលប៉ះពាល់ ដោយការសម្របសម្រួលនៃការចែកចាយឡើងវិញទៅកាន់បណ្តាញផ្សារទំនើបក្នុងស្រុក នូវផលិតផលដែលមានគោលដៅនាំចេញ។ នេះបើតាម លោក សុរៈសាន់។ ជាចុងក្រោយ អ្នកនាំពាក្យរងរបស់កងទ័ពភូមិន្ទថៃបញ្ជាក់ថា ស្ថានទូតថៃនៅភ្នំពេញ ក៏កំពុងរក្សាទំនាក់ទំនងជិតស្និទ្ធជាមួយជនជាតិថៃដែលរស់នៅក្នុងរាជធានីនៃប្រទេសកម្ពុជា ដើម្បីធានាសុវត្ថិភាពរបស់ពួកគេដែរ៕
