រាជធានីបាងកក៖ យោធាថៃបានធានាដល់ពលរដ្ឋខ្លួន ដោយជំរុញឱ្យពួកគេជឿជាក់លើការប្តេជ្ញាចិត្តយ៉ាងមុតមាំរបស់កងកម្លាំងយោធា និងប៉ូលិសលើការ[ការពារ]អធិបតេយ្យភាពជាតិ និងធានាសុវត្ថិភាពប្រជាជន ជុំវិញការវិវាទព្រំដែនជាមួយកម្ពុជា...។

កងកម្លាំងភូមិន្ទថៃ បានបើកកិច្ចប្រជុំមេទ័ពកំពូលៗលើកទី៤ ក្នុងឆ្នាំ២០២៥នេះ កាលពីថ្ងៃសុក្រទី៦មិថុនា នៅទីបញ្ជាការកងទ័ពអាកាសថៃ ក្រោមអធិបតីភាព លោក ទ្រុងវីត នន់ភក្តី (ทรงวิทย์ หนุนภักดี) នាយសេនាធិការនៃកងកម្លាំងភូមិន្ទថៃ។ កិច្ចប្រជុំនេះ មានការអញ្ជើញចូលរួមពី អគ្គមេបញ្ជាការកងទ័ពជើងគោក, អគ្គមេបញ្ជាការកងទ័ពជើងទឹក, អគ្គមេបញ្ជាការកងទ័ពអាកាស, និងអគ្គស្នងការនគរបាលជាតិថៃ។ លោក ទ្រុងវីត បានថ្លែងអំណរគុណចំពោះការគាំទ្រដ៏រឹងមាំរបស់កងទ័ពជើងទឹក-ជើងគោក កងទ័ពអាកាស និងនគរបាលតម្រួតជាតិថៃ ក្នុងការជួយគាំទ្រដល់រាជរដ្ឋាភិបាល ជាពិសេស ក្នុងការការពារអធិបតេយ្យភាពតាមតំបន់ជម្លោះព្រំដែនកម្ពុជា-ថៃ គ្រប់ស្ថានការណ៍ទាំងអស់ ​ក្នុង​ក្របខណ្ឌ​នៃ​រដ្ឋធម្មនុញ្ញ។

ប្រមុខមេបញ្ជាការទ័ពអាកាសថៃរូបនេះ បញ្ជាក់​ថា សកម្មភាព​យោធា​ថៃ​ គឺ​អនុវត្ត​យ៉ាង​តឹងរ៉ឹង​ផ្តោតទៅ​លើ​ច្បាប់ ក្នុង​ការ​ចូលរួម​ក្នុង​គោលបំណង​គ្រប់គ្រង​ស្ថានការណ៍ និង​ទប់ស្កាត់​ការ​កើនឡើង​នៃភាពតានតឹងតាមព្រំដែនជាមួយកម្ពុជា ជុំវិញតំបន់វិវាទនាពេលថ្មីៗ នៅតំបន់មុំបី-ឆងបក។ ជាមួយគ្នា មេបញ្ជាការកងទ័ពជើងគោកថៃ បានចោទកម្ពុជាទាំង[ងងើល]ថា ការប៉ះទង្គិចគ្នានេះកើតឡើង ស្របពេលកងទ័ពថៃកំពុងល្បាតក្នុងទឹកដីខ្លួន ហើយកងទ័ពកម្ពុជាបាញ់កងទ័ពថៃមុន។ យ៉ាងណា ការអះអាងរបស់មេទ័ពជើងគោកថៃរូបនេះ គ្មានមូលដ្ឋានច្បាស់លាស់ និងមានចេតនាចោទប្រកាន់ ទម្លាក់កំហុសមកលើកម្ពុជា ដើម្បីលាក់បាំងពីឧបាយកលឈ្លានពានរបស់ខ្លួនតែប៉ុណ្ណោះ។

កង​កម្លាំង​ថៃ ​អះអាងបន្ថែមថា ការចរចារបស់គណៈកម្មាធិការព្រំដែនរួមកម្ពុជា-ថៃ (JBC) ហាក់គ្មានសង្ឃឹមទាល់តែសោះ ក្រោយកម្ពុជាគ្រវីក្បាលមិនទទួលយកសំណើ [ថ្ពឹនភ្នែក]ទាំង៤ចំណុច នោះក៏ព្រោះតែមេដឹកនាំកម្ពុជាហាក់យល់ច្បាស់អំពីឧបាយកលទុច្ចរិតរបស់ក្រុមមេដឹកនាំយោធាថៃដ។ ចំណុចសំខាន់ៗទាំង៤ដែលភាគីថៃសុំយកមកចរចា នោះរួមមាន៖ សំណុំរឿងប្រាសាទទាំង៣ [តាមមាន់តូច តាមាន់ធំ និងតាក្របី] និងតំបន់មុំបី ដែលត្រូវបាននាំយកទៅតុលាការយុត្តិធម៌អន្តរជាតិ (ICJ) នាទីក្រុងឡាអេ ប្រទេសហូរឡង់។ ដូចកម្រោលចូលសន្ធិត! មេបញ្ជាការកងទ័ពជើងគោកបានណែនាំដល់គ្រប់អង្គភាពទាំងអស់ ត្រូវបង្កើនការត្រៀមលក្ខណៈសម្បត្តិឱ្យរួចរាល់ រួមទាំងបុគ្គលិកយោធា បរិក្ខារសឹក និងផែនការបន្ទាន់ ដើម្បីត្រៀមលក្ខណៈសម្រាប់សកម្មភាពយោធាដែលអាចកើតមាន ប្រសិនបើចាំបាច់ ដើម្បីការពារបូរណភាពទឹកដី និងការពារសាធារណជន។

លើសពីនេះ អគ្គស្នងការនគរបាលជាតិថៃ បានបញ្ជាក់ជំហរឥតងាករេលើការការពារអធិបតេយ្យភាពជាតិ និងបានបញ្ជាឱ្យនគរបាលល្បាតព្រំដែន និងជំរុញអង្គភាពព្រំដែនផ្សេងទៀតរៀបចំឱ្យបានពេញលេញ ទាំងកងកម្លាំង និងបរិក្ខារសឹក។ ជារួម កងទ័ពភូមិន្ទថៃ រួមជាមួយនឹងកងទ័ពជើងទឹក កងទ័ពអាកាស និងនគរបាលជាតិថៃ បានបង្ហាញពីចេតនាយ៉ាងច្បាស់ក្រឡែត ជុំវិញការវាយប្រហារ និងផែនការឈ្លានពានរបស់ខ្លួនលើកម្ពុជា៕