រាជធានីបាងកក៖ កងទ័ពកម្ពុជា-ថៃ បានប៉ះទង្គិចគ្នាមួយប្រាវនៅព្រំដែនឆងបក ខេត្តឧប្បលរាជធានី (อุบลราชธานี) ជាប់ព្រំប្រទល់ជាមួយខេត្តព្រះវិហារ(ច្រកមុំបី)។ រដ្ឋមន្ត្រីក្រសួងការពារជាតិថៃ លោក ភូមិថាំ វិជ្យៈឆ័យ (ภูมิธรรม เวชยชัย) បញ្ជាក់ថា ទាហានកម្ពុជា បានបាញ់ទៅលើទាហានថៃមុន ទើបទាហានថៃ ចាំបាច់ត្រូវតែបាញ់តដៃវិញ ដើម្បីការពារខ្លួន និងអធិបតេយ្យភាព។ នេះបើតាមការចុះផ្សាយរបស់កាសែតថៃ The Nation។
ទាក់ទិននឹងការប៉ះទង្គិចគ្នាមួយប្រាវរវាងទាហានខ្មែរ និងទាហានថៃ នៅច្រកព្រំដែនឆងបក (មុំបី) ក្នុងខេត្តឧប្បលរាជធានី (ថៃ) និងខេត្តព្រះវិហារ (កម្ពុជា) នៅព្រឹកថ្ងៃពុធទី២៨ឧសភានេះ លោក ភូមិថាំ ជាឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិថៃផងនោះ បានបញ្ជាក់ថា លោកបានទទួលរបាយការណ៍អំពីឧបទ្ទវហេតុនេះហើយ។ មេការពារជាតិរូបនេះ បានពន្យល់យ៉ាងក្បោះក្បាយថា ហេតុការណ៍នេះកើតឡើងនៅតំបន់ជម្លោះ ដែលភាគីទាំងសងខាងទាមទារត្រួតស៊ីគ្នា។ កន្លងមកកម្ពុជាបានជីកលេណដ្ឋាន ឬត្រង់សេនៅតំបន់ភ្នំ៧៤៥ នៅច្រកព្រំដែនឆងបក។ នេះជាលើកទី២ ហើយដែលកម្ពុជាបានដាក់ពង្រាយទ័ពដើម្បីទាមទារយកតំបន់ជម្លោះនេះ។ យ៉ាងណាក៏ដោយ ទាហានថៃកំពុងល្បាតនៅតំបន់នោះ ខណៈការប៉ះទង្គិចក៏បានផ្ទុះឡើង។ លើសពីនេះ លោកបានបញ្ជាក់ថា កម្ពុជាបាញ់មុន ទើបថៃបាញ់តដៃវិញ។ នេះបើតាមការចុះផ្សាយរបស់កាសែត The Nation។
កាសែតដដែលបានចុះផ្សាយថែមទៀតថា ក្រោយកើតហេតុ ជំនួយការជិតស្និទ្ធរបស់លោក ទៀ សីហា រដ្ឋមន្ត្រីក្រសួងការពារជាតិកម្ពុជា បានទូរសព្ទទៅលោកឧត្តមសេនីយ៍ ណាត់ថៈផុន ណាក់ផានិច (ณัฐพล นาคพาณิชย์) ដែលជាអនុរដ្ឋមន្ត្រីក្រសួងការពារជាតិថៃ ជំរុញឱ្យភាគីទាំង២ បន្ថយកម្តៅនៃភាពតានតឹង។ បច្ចុប្បន្នកងកម្លាំងទាំងថៃ និងកម្ពុជា កំពុងត្រូវបានដាក់ពង្រាយនៅតំបន់នោះ។ បន្ថែមពីនោះ ប្រមុខការពារជាតិថៃ បានសង្កត់ធ្ងន់ថា៖«ខ្ញុំត្រូវបានគេជូនដំណឹងថា ការបាញ់តបតវិញគឺជារឿងចាំបាច់ដើម្បីការពារខ្លួនយើង និងការពារអធិបតេយ្យភាពរបស់ប្រទេសថៃ។ ខ្ញុំបានណែនាំឱ្យមានការប្រុងប្រយ័ត្ន។ ទោះបីជាឈប់បាញ់ភ្លាមៗក៏ដោយ ក៏ភាគីទាំង២ នឹងនៅតែបន្តប្រឈមមុខដាក់គ្នាដដែល»។ កាសែត The Nation គូសបញ្ជាក់បន្ថែម។
លើសពីនេះ នៅពេលសួរថា តើការចូលបំពានតំបន់ជម្លោះបានរំលោភលើអនុស្សរណៈនៃការយោគយល់គ្នា ឆ្នាំ២០០០ ឬអត់? ស្រាប់តែប្រមុខការពារជាតិថៃរូបនេះ ចេញមុខបញ្ជាក់ថា តំបន់នេះមិនទាន់បានកំណត់ព្រំដែនជាផ្លូវការទេ ហើយក៏មិនមានការព្រមព្រៀងលើកម្មសិទ្ធិណាមួយដែរ។ លោកបន្ថែមថា ភាគីទាំង២ [កម្ពុជា-ថៃ] ធ្លាប់បានព្រមព្រៀងគ្នាមិនសាងសង់មូលដ្ឋានទ័ព ឬការចល័តយោធាក្នុងតំបន់នោះទេ លើកលែងតែការល្បាតរួមដែលគ្មានអាវុធតែប៉ុណ្ណោះ។
មិនទាន់ចប់ឡើយ លោកឧត្តមសេនីយ៍ ផាណា ក្លែវផ្លូតធូក (พนา แคล้วปลอดทุกข์) អគ្គមេបញ្ជាការនៃកងទ័ពភូមិន្ទថៃ បានកោះប្រជុំជាបន្ទាន់ជាមួយភាគីពាក់ព័ន្ធទាំងអស់ ដើម្បីធានាបាននូវគោលការណ៍ណែនាំប្រតិបត្តិការប្រកបដោយការសម្របសម្រួល និងឯកភាព។ ទន្ទឹមនឹងនេះ លោកឧត្តមសេនីយ៍ឯកថៃ ប៊ូនស៊ីន (บุญสิน) បានអះអាងថា មុនពេលប៉ះទង្គិចគ្នា ទាហានថៃបានព្យាយាមចរចា ប៉ុន្តែកម្ពុជាបែរជាយកកាណុងកាំភ្លើងមកឆ្លើយតបទៅវិញ ដែលនាំឱ្យមានការប្រឈមមុខដាក់គ្នាខ្លាំងបែបនេះ។ យ៉ាងណា បច្ចុប្បន្នមេបញ្ជាការនៅមូលដ្ឋានកំពុងពិភាក្សាគ្នា ដើម្បីស្វែងរកដំណោះស្រាយ។ នេះបើតាមខ្លឹមសារនៃការចុះផ្សាយរបស់កាសែតថៃ The Nation៕
