រាជធានីភ្នំពេញ៖ ដើម្បីអបអរពិធីបើកជាផ្លូវការ «ឆ្នាំទេសចរណ៍ កម្ពុជា-ចិន ២០២៥» ក្រសួងទេសចរណ៍ សហការជាមួយស្ថានទូតចិន នឹងរៀបចំឱ្យមានការសម្ដែងទស្សនីយភាពសិល្បៈទ្វេភាគី រយៈពេលពីរថ្ងៃ គឺថ្ងៃទី២៤ និង២៥ឧសភា ឆ្នាំ២០២៥ តាមបណ្តោយផ្លូវថ្មើរជើង (Walk Street) នាមាត់ទន្លេចតុម្មុខ..។

ក្រសួងបញ្ជាក់ថា ព្រឹត្តិការណ៍បើកជាផ្លូវការ «ឆ្នាំទេសចរណ៍ កម្ពុជា-ចិន ២០២៥» ត្រូវបានប្រមុខរាជ/រដ្ឋាភិបាលទាំងពីរឯកភាពគ្នា ក្នុងដំណើរទស្សនកិច្ចផ្លូវរដ្ឋរបស់លោក ស៊ី ជីនពីង ប្រធានាធិបតី នៃសាធារណរដ្ឋប្រជាមានិតចិន មកកាន់កម្ពុជាកាលពីខែមេសា។ ចំពោះការរៀបចំកម្មវិធី នឹងមានការសម្ដែងទស្សនីយភាពសិល្បៈរួមគ្នា កម្ពុជា-ចិន នាល្ងាចថ្ងៃទី២៣ឧសភា នៅសាលសន្និសីទចតុម្មុខ។ ដោយឡែក នៅថ្ងៃទី២៤ និងថ្ងៃទី២៥ ខែឧសភា ឆ្នាំ២០២៥ នឹងមានការសម្ដែងទស្សនីយភាពសិល្បៈរួមគ្នា កម្ពុជា-ចិន សម្រាប់មហាជនទស្សនា នៅបរិវេណសួនច្បារតេជោមាសតេជោយ៉ត តាមបណ្តោយផ្លូវថ្មើរជើងមាត់ទន្លេចតុម្មុខ។

សូមជម្រាបថា បន្ទាប់ពីឆ្នាំ២០២៤ ដែលជា «ឆ្នាំនៃការផ្លាស់ប្ដូរប្រជាជន និងប្រជាជនកម្ពុជា-ចិន» រដ្ឋាភិបាលប្រទេសទាំងពីរ បានឯកភាពបន្តកំណត់យកឆ្នាំ២០២៥ជា «ឆ្នាំទេសចរណ៍កម្ពុជា-ចិន និងលើកទឹកចិត្តប្រជាពលរដ្ឋខ្លួនឱ្យធ្វើដំណើររវាងប្រទេសទាំងពីរ»។ ក្រោយការអនុវត្តកាលពីឆ្នាំមុនទទួលបានលទ្ធផលប្រកបដោយផ្លែផ្កា ពិសេស គឺលើវិស័យទេសចរណ៍។ ជាក់ស្តែង ឆ្នាំ២០២៤ កម្ពុជាទទួលបានទេសចរចិនប្រមាណ៨៥ម៉ឺននាក់ ដែលមានការកើនឡើងគួរឱ្យកត់សម្គាល់៕