រាជធានីភ្នំពេញ៖ ធ្វើជាវាគ្មិនក្នុងវេទិកាសាធារណៈកម្រិតអន្តរជាតិមួយ នៅប្រទេសឥណ្ឌូណេស៊ី សម្តេច ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា លើកជាយោបល់ឱ្យថ្នាក់ដឹកនាំប្រទេសក្នុងតំបន់អាស៊ានយកទៅពិចារណាថា កងទ័ពចេញពីគ្រប់ប្រទេសជាសមាជិកអាស៊ាន ទៅបំពេញបេសកកម្មរក្សាសន្តិសុខ-សន្តិភាព តាមបណ្តាប្រទេសនានាក្រៅពីតំបន់អាស៊ាន គួរតែពាក់និមិត្តសញ្ញាអាស៊ាន (Logo) និងនាំយកទង់អាស៊ានទៅជាមួយ ដើម្បីបន្ថែមទម្ងន់តួនាទី និងពង្រីកវិសាលភាពអាស៊ាននៅលើឆាកអន្តរជាតិ ហើយគេនឹងដឹងថា កងទ័ពនោះចេញមកពីតំបន់អាស៊ាន។ 

សម្តេចប្រធានព្រឹទ្ធសភាកម្ពុជា បំពេញទស្សនកិច្ចនៅឥណ្ឌូណេស៊ី ពីថ្ងៃទី៥ ដល់ថ្ងៃទី៧ ខែឧសភា ហើយបន្ទាប់មក នឹងបន្តទៅបំពេញទស្សនកិច្ចនៅទីម័រខាងកើត ពីថ្ងៃទី៧ ដល់ថ្ងៃទី៩ ខែឧសភា ឆ្នាំ២០២៥។ ក្នុងវេទិកានៅប្រទេសឥណ្ឌូណេស៊ី សម្តេចបន្ថែមថា កងទ័ពពីប្រទេសសមាជិកអាស៊ាន ចេញទៅបំពេញបេសកកម្មរក្សាសន្តិសុខ-សន្តិភាពនៅប្រទេសដទៃ ដោយមាននិមិត្តសញ្ញាអាស៊ាន និងទង់អាស៊ានភ្ជាប់តាមខ្លួនបែបនេះ គឺបង្ហាញពីបេសកកម្មដែលស្ថិតក្រោមឆត្រអាស៊ាន [មិនមែនគ្រាន់តែស្ថិតក្រោមឆត្រអង្គការសហប្រជាជាតិនោះទេ]។ សម្តេច លើកជាឧទាហរណ៍ថា [បើអាស៊ានឯកភាពគ្នា] កងទ័ពមួកខៀវកម្ពុជា ដែលចេញទៅបំពេញបេសកកម្មនៅប្រទេសណាមួយ គឺនៅតែពាក់ឯកសណ្ឋានកងទ័ពកម្ពុជាដដែល តែថែមនិមិត្តសញ្ញាអាស៊ានលើអាវកងទ័ពនោះ និងនាំយកទង់អាស៊ានទៅជាមួយ។ សម្តេចបង្ហាញក្តីសង្ឃឹមថា៖«[អាស៊ាន]យើងអាចធ្វើបានរឿងនេះ»។

មិនត្រឹមតែប៉ុណ្ណឹងទេ ប្រធានគណបក្សកាន់អំណាចកម្ពុជា ថែមទាំងរម្លឹកឡើងវិញនូវយោបល់ថា មេដឹកនាំអាស៊ាន គួរតែបង្កើតក្រុមបាល់ទាត់ប្រចាំអាស៊ាន ដោយសមាជិកក្នុងក្រុមបាល់ទាត់នេះ មកពីគ្រប់ប្រទេសជាសមាជិកអាស៊ាន។ លើសពីនេះ សម្តេចក៏បានបញ្ចេញយោបល់ថា អាស៊ានក៏គួររួមគ្នាដេញថ្លៃធ្វើជាម្ចាស់ផ្ទះរៀបចំការប្រកួតបាល់ទាត់កម្រិតពិភពលោក (World Cup) ផងដែរ។ ដូចរឿងកងទ័ពពាក់និមិត្តសញ្ញាអាស៊ានដែរ សម្តេចជឿថា ការបង្កើតក្រុមបាល់ទាត់ និងការដេញថ្លៃរៀបចំការប្រកួតបាល់ទាត់កម្រិតវើលខាប់នេះ អាស៊ានអាចមានលទ្ធភាពធ្វើបាន។ គួរដឹងថា គំនិតចង់បង្កើតក្រុមបាល់ទាត់អាស៊ាន និងការរួមគ្នាដេញថ្លៃរៀបចំការប្រកួតបាល់ទាត់វើលខាប់នៅតំបន់អាស៊ាននេះ សម្តេចធ្លាប់លើកឡើងជាមួយមេដឹកនាំអាស៊ាន តាំងពីសម្តេចនៅធ្វើជានាយករដ្ឋមន្រ្តីមកម្ល៉េះ៕