រាជធានីភ្នំពេញ៖ ក្រុមហ៊ុន Beijing Scitech Holdings Co., Ltd. បានបង្ហាញចំណាប់អារម្មណ៍ និងស្វែងរកឱកាសវិនិយោគលើការចម្រាញ់ប្រេងឆៅ និងការផលិត ផលិតផលផ្សេងៗដែលជាការកែច្នៃចេញពីសំណល់នៃការចម្រាញ់ប្រេងឆៅនៅកម្ពុជា..។

ការបង្ហាញចំណាប់អារម្មណ៍របស់លោក ជូ យីជៀង (Zhu Yujiang) ប្រធានក្រុមប្រឹក្សាភិបាលនៃក្រុមហ៊ុនចិន Beijing Scitech Holdings ធ្វើឡើងក្នុងជំនួបពិភាក្សាការងារជាមួយ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា កាលពីរសៀលថ្ងៃទី៥ ខែឧសភា ឆ្នាំ២០២៥។ ក្នុងជំនួបនោះ លោក ជូ យីជៀង បានវាយតម្លៃខ្ពស់ចំពោះការអភិវឌ្ឍលើគ្រប់វិស័យរបស់កម្ពុជា។ លោកថែមទាំងកត់សម្គាល់ថា កម្ពុជាតែងមានការផ្លាស់ប្ដូរជាវិជ្ជមានជានិច្ច​ នៅរាល់ពេលដែលលោកមកម្ដងៗ។

ទន្ទឹមគ្នានេះ លោក ជូ យីជៀង បានបង្ហាញក្ដីសោមនស្សរីករាយចំពោះទំនាក់ទំនង និងកិច្ចសហប្រតិបត្តិការចិន-កម្ពុជា​កាន់តែរឹងមាំ។ ប្រធានក្រុមប្រឹក្សាភិបាលនៃក្រុមហ៊ុនចិនរូបនេះ បានជម្រាបជូនសម្ដេចនាយករដ្ឋមន្ត្រី អំពីចំណាប់អារម្មណ៍របស់ក្រុមហ៊ុនក្នុងការស្វែងរកឱកាសវិនិយោគនៅកម្ពុជាលើការចម្រាញ់ប្រេងឆៅ។ លោកបញ្ជាក់ថា៖«ការវិនិយោគនេះនឹងរួមចំណែកក្នុងការអភិវឌ្ឍសង្គម-សេដ្ឋកិច្ច ក៏ដូចជាការជំរុញដល់ការបង្កើនផលិតភាពនៃផលិតកម្មរបស់កម្ពុជា ផងដែរ»។  

ជាការឆ្លើយតប សម្តេចធិបតីនាយករដ្ឋមន្ត្រី ស្វាគមន៍ចំពោះលោកប្រធានក្រុមប្រឹក្សាភិបាលក្រុមហ៊ុន និងសហការី ដែលបានអញ្ជើញមកបំពេញទស្សនកិច្ចនៅកម្ពុជា និងបានសម្ដែងក្ដីសោមនស្សរីករាយចំពោះក្រុមហ៊ុន ដែលមានចំណាប់អារម្មណ៍ស្វែងរកឱកាសវិនិយោគនៅកម្ពុជា។ មេដឹកនាំកម្ពុជាគូសបញ្ជាក់ថា៖«កម្ពុជាតែងតែស្វាគមន៍ចំពោះបណ្ដាក្រុមហ៊ុនវិនិយោគនានា​ ដែលចាប់អារម្មណ៍ក្នុងការស្វែងរកឱកាសវិនិយោគនៅកម្ពុជា»។

បន្ថែមលើនេះ សម្តេចនាយករដ្ឋមន្ត្រី ក៏បានគូសរំលេចអំពីការដាក់ចេញនូវគោលនយោបាយ និងវិធានការនានារបស់រាជរដ្ឋាភិបាល ក្នុងការលើកទឹកចិត្តដល់បណ្ដាក្រុមហ៊ុន ដែលវិនិយោគលើខ្សែច្រវាក់ផ្គត់ផ្គង់។ ការវិនិយោគលើខ្សែច្រវាក់ផ្គត់ផ្គង់ ​ គឺជាទិសដៅដ៏សំខាន់របស់កម្ពុជា ក្នុងការជំរុញការផលិតនូវផលិតផលពាក់កណ្ដាលសម្រេច ក៏ដូចជាផលិតផលសម្រេច ដើម្បីបម្រើទៅដល់ការផ្គត់ផ្គង់ទីផ្សារក្នុងស្រុក និងសម្រាប់ការនាំចេញទៅតំបន់​ និងសកលលោក។ បន្ថែមលើនេះ ប្រមុខរាជរដ្ឋាភិបាល លើកទឹកចិត្តឱ្យក្រុមហ៊ុន Beijing Scitech Holdings ពិនិត្យ និងពិចារណាក្នុងការវិនិយោគលើខ្សែច្រវាក់ផ្គត់ផ្គង់នៅកម្ពុជា ព្រមទាំងបន្តផ្សារភ្ជាប់ទំនាក់ទំនង និងសិក្សាលម្អិតជាមួយក្រសួងស្ថាប័នពាក់ព័ន្ធកម្ពុជា ដើម្បីចាប់យកកាលានុវត្តភាពក្នុងការវិនិយោគនៅកម្ពុជា។  

សូមរំឭកដែរថា កាលពីចុងឆ្នាំ២០២០ កន្លងទៅ រាជរដ្ឋាភិបាលកម្ពុជាធ្លាប់បានផ្តល់សិទ្ធិឱ្យក្រុមហ៊ុនរបស់សិង្ហបុរីមួយឈ្មោះ Kris Energy បូមប្រេងនៅដែនសមុទ្ទកម្ពុជា។ យ៉ាងណាក្រោយដំណើរកាលបានមួយរយៈ នៅដើមខែមិថុនា ឆ្នាំ២០២១ ក្រុមហ៊ុនក៏បានប្រកាសក្ស័យធន មិនអាចបន្តអាជីវកម្មបានតទៅទៀត៕