រដ្ឋធានីវែលលីងតុន៖ រដ្ឋាភិបាលនូវែលហ្សេឡង់ បានអះអាងកាលពីថ្ងៃអាទិត្យទី៤ ខែឧសភាថា ខ្លួនបានត្រៀមថវិកាចំនួន២ពាន់លានដុល្លារនូវែលហ្សេឡង់ ឬស្មើ១,១៩ពាន់លានដុល្លារ ដើម្បីបញ្ជាទិញឧទ្ធម្ភាគចក្រល្បាតដែនសមុទ្ទ ជំនួសឧទ្ធម្ភាគចក្រល្បាតដែនសមុទ្ទចាស់វស្សារបស់កងកម្លាំងការពារជាតិរបស់ខ្លួន ខណៈភាពតានតឹងជាសកលកំពុងកើនឡើង។

រដ្ឋាភិបាលនូវែលហ្សេឡង់អះអាងថា ខ្លួននឹងបង្កើនការចំណាយមូលដ្ឋានចំនួន ជាង១៤២លានដុល្លារ សម្រាប់កងកម្លាំងការពារជារៀងរាល់ឆ្នាំក្នុងរយៈពេល៤ឆ្នាំខាងមុខ។ រដ្ឋមន្ត្រីក្រសួងការពារជាតិនូវែលហ្សេឡង់ លោកស្រី ជូឌីត ខូលលីនស៍ (Judith Collins) បានលើកឡើងនៅក្នុងសេចក្តីថ្លែងការណ៍មួយថា៖«វាច្បាស់ណាស់ថា នូវែលហ្សេឡង់មិនមានភាពស៊ាំពីភាពតានតឹង ដែលកំពុងកើនឡើងនៅជុំវិញពិភពលោកនោះទេ»។ លោកស្រីបានបន្ថែមថា៖«[ការណ៍នេះ]កំពុងកំណត់យើងលើការចំណាយលើវិស័យការពារជាតិដើម្បីឈានដល់២ភាគរយនៃGDP នៅឆ្នាំ២០៣២ ដល់២០៣៣»។

ជាងនេះ លោកស្រី ខូលលីន បានសង្កត់ធ្ងន់ថា៖«ប្រសិនបើគ្មានសន្តិសុខជាតិ នោះក៏គ្មានសន្តិសុខសេដ្ឋកិច្ចដែរ។ ភាពតានតឹងជាសកលកំពុងកើនឡើងយ៉ាងឆាប់រហ័ស ហើយបុគ្គលិកការពារជាតិត្រូវការឧបករណ៍ និងលក្ខខណ្ឌត្រឹមត្រូវដើម្បីបំពេញការងាររបស់ពួកគេ។ ក្នុងនាមជាប្រទេសដែនសមុទ្ទ យើងកំពុងផ្តល់អាទិភាពដល់សមត្ថភាពកងទ័ពជើងទឹក»។ កងកម្លាំងការពារជាតិរបស់ប្រទេសនូវែលហ្សេឡង់ បានស៊ាំជាមួយការចំណាយតិចជាប្រព័ន្ធ ក្នុងរយៈពេលជាច្រើនទសវត្សរ៍កន្លងមក ដែលស្មើនឹងជាង១ភាគរយនៃGDP ឥឡូវនេះ។ គេនៅចាំបានថា កាលពីខែមេសា រដ្ឋាភិបាលនូវែលហ្សេឡង់ បានបង្ហាញថា ខ្លួននឹងបង្កើនការចំណាយលើវិស័យការពារជាតិ ជាមួយមូលនិធិថ្មីចំនួនជាង៥ពាន់លានដុល្លារ ក្នុងរយៈពេល៤ឆ្នាំខាងមុខ៕