រាជធានីភ្នំពេញ៖ ក្រោយមានបទបញ្ជាពីលោកឧបនាយករដ្ឋមន្ត្រី ស សុខា រដ្ឋមន្រ្តីក្រសួងមហាផ្ទៃ ស្នងកានគរបាលរាជធានីភ្នំពេញ លោក ជួន ណារិន្ទ ចាប់ផ្តើមណែនាំឱ្យមន្ត្រីនគរបាលនៅតាមបណ្តាខណ្ឌទាំង១៤ ដែលមានក្បាលពោះធំៗ ទៅហាត់ប្រាណសម្រកក្បាលពោះ ឬទម្ងន់។ នេះបើតាមការឱ្យដឹងពីលោក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញ។

ថ្លែងប្រាប់អង្គភាព SBM News កាលពីរសៀលថ្ងៃទី២ឧសភា ឆ្នាំ២០២៥ លោក សំ វិច្ឆិកា លើកឡើងថា ការហាត់ប្រាណ [ដោយមានគ្រូបង្វឹកនេះ] ដើម្បីឱ្យមន្ត្រីនគរបាលទទួលបានសុខភាពល្អ ជាពិសេសមន្ត្រីដែលមានក្បាលធំៗ ឱ្យមានរូបរាងសក្ដិសមជាមន្ត្រីនគរបាល។ បើតាម លោក សំ វិច្ឆិកា នគរបាលនៃអធិការដ្ឋានខណ្ឌកំបូល ចាប់ផ្តើមហាត់ប្រាណមុនគេ ដោយចាត់មន្ត្រីមានក្បាលពោះធំៗទៅហាត់ប្រាណចាប់ពីថ្ងៃទី១ឧសភាតទៅ នៅឯក្លឹបហាត់ប្រាណអាណាចក្រកំបូល​។

យ៉ាងណា ចំពោះចំនួនមន្ត្រីដែលមានក្បាលពោះធំៗត្រូវបញ្ជូនទៅហាត់ប្រាណ អ្នកនាំពាក្យមិនអាចបញ្ជាក់បានទេ ខណៈការងារស្ថិតិនេះស្ថិតក្រោមការគ្រប់គ្រងរបស់នគរបាលខណ្ឌនីមួយៗ។ សូមរម្លឹកថា កាលពីកំលុងខែតុលា ឆ្នាំ២០២៤ លោកឧបនាយករដ្ឋមន្ត្រី ស សុខា ធ្លាប់ចេញវិធានការមិន​ឱ្យមន្ត្រីដែលមានក្បាលពោះធំៗចេញទៅធ្វើការងារខាងក្រៅ ជាពិសេសការងារចរាចរណ៍ និងប្រតិបត្តិការនានា។ យ៉ាងណា ចំពោះមន្ត្រីនគរបាលដែលចង់ចេញប្រតិបត្តិការខាងក្រៅ ត្រូវធ្វើលំហាត់ប្រាណ តមអាហារ ឬធ្វើយ៉ាងណាឱ្យស្រកទម្ងន់សក្ដិសមជាមន្ត្រីនគរបាល៕